10 ނޮވެމްބަރ 2021 - 11:33
އަންނަ މަހު ބާއްވާ ޖޫނިއާ ޓީޓީ ވޯލްޑް ޗެމްޕިއަންޝިޕަށް ތައްޔާރުވާ ރާއްޖޭގެ ގައުމީ ޗެމްޕިއަން ފާތިމަތު ދީމާ އަލީގެ ފިޒިކަލް ތަމްރީނުތައް ނަސީރު ސްޕޯޓްސް އެކަޑެމީގައި ފަށައިފި އެވެ.
ރާއްޖޭގެ ކުރީގެ އެއްވަނަ ދުވުންތެރިޔާ ނަސީރު އިސްމާއީލްގެ ބެލުމުގެ ދަށުން ދީމާގެ ތަމްރީނުތައް މީގެ ކުރިން ވެސް ވަނީ ކުރިއަށް ގެންގޮސްފަ އެވެ.
"އެސޯސިއޭޝަނުން ރެކޮމެންޑް ކުރި ލިސްޓްގައި ނަސީރު ވެސް ހިމެނޭ. ދެން ދޭތެރެ ދޭތެރެއިން ލަންކާގައި ހުރެފައި ދީމާ މާލެ އަންނައިރު ކުރިން ވެސް ޓްރޭނިންތަކަށް ނަސީރު ކައިރިއަށް ގެންދަން،" ދީމާގެ ބައްޕަ، އަބްދު ސައްތާރު އަލީ ބުންޏެވެ.
ޒުވާން ގިނަ އެތުލީޓުންނަށް މިހާރު ވެސް ފިޒިކަލް ތަމްރީނުތައް ކުރިއަށް ގެންދާ ނަސީރު ބުނީ ދީމާ ކަހަލަ އެތުލީޓަކަށް ކޯޗުކޮށްދިނުމަކީ އޭނާ އަށް ލިބޭ ބޮޑު އުފަލެއް ކަމަށެވެ.
"ދީމާ އަކީ ވަރަށް ކޮމިޓެޑް އެތުލީޓެއް. ކެއުމުގައި ވެސް ވަކި ހަމަތަކެއް ގެންގުޅޭ. ކޯޗުކޮށްދޭން ވެސް ފަސޭހަ،" ވޯލްޑް ޗެމްޕިއަންޝިޕަކަށް ކޮލިފައިވި ރާއްޖޭގެ ފުރަތަމަ ޓީޓީ ކުޅުންތެރިޔާގެ ޓްރޭނިންތަކާ ބެހޭގޮތުން ނަސީރު ބުންޏެވެ.
އަންނަ މަހު 2-8 އަށް ބާއްވާ ވޯލްޑް ޗެމްޕިއަންޝިޕަށް ދީމާ ކޮލިފައިވީ ވޯލްޑް ރޭންކިންގައި އޭނާ އޮތް މަގާމުގެ ސަބަބުންނެވެ. ދީމާ އަކީ 15 އަހަރުން ދަށުގެ ދުނިޔޭގެ ރޭންކިންގެ 18 ވަނަ އެވެ. މިދިޔަ މަހު އޭނާ އޮތީ 20 ވަނައިގަ އެވެ. އޭޕްރީލް މަހު ރޭންކިންގެ، އަށް ވަނަ އަށް ވެސް ދީމާ ޖެހިލި އެވެ. އަދި 17 އަހަރުން ދަށުގެ ކެޓެގެރީން ދުނިޔޭގެ 41 ވަނައިގައި އޭޕްރީލް މަހު ހިމެނުނެވެ.
އެންމެ ފަހުގެ ސައުތު އޭޝިއަން ގޭމްސް އާއި އިންޑިއަން އޯޝަން އައިލެންޑް ގޭމްސްގައި މެޑަލް ހޯދި ދީމާ ވަނީ މިދިޔަ މަހު އޮމާންގެ މަސްކަޓްގައި ބޭއްވި ވޯލްޑް ކޮންޓެންޑާ މުބާރާތުގެ 15 އަހަރުން ދަށުގެ ކެޓެގެރީގައި ވާދަކޮށް ކުއާޓާ ފައިނަލަށް ދަތުރުކޮށްފަ އެވެ. އެ މުބާރާތުގެ ކުއާޓާއާ ހަމައަށް އޭނާ ދަތުރު ކުރީ ޕާކިސްތާނާއި އުޒްބެކިސްތާންގެ ކުޅުންތެރިން ބަލި ކުރުމަށް ފަހު އެވެ.
ޓިއުނީޝިއާގެ ވެރިރަށް ތޫނިސްގައި ސެޕްޓެމްބަރު މަހު ބޭއްވި ވޯލްޑް ކޮންޓެންޑާ މުބާރާތުގައި ވެސް ދީމާ ވާދަކުރި އެވެ. ވޯލްޑް ކޮންޓެންޑާ މުބާރާތުގައި ވާދަކުރުމުގެ ފުރުސަތު ލިބެނީ އުމުރު ފުރައިގެ ރޭންކިންގައި ދުނިޔޭގެ ގަދަ 30 ގެ ތެރޭގައި ހިމެނޭ ކުޅުންތެރިންނަށެވެ.