10 ނޮވެމްބަރ 2021 - 12:19
ރާއްޖޭގައި މުދަލާއި ހިދުމަތުގެ އަގުތަކާއި އިންފްލޭޝަން އަންނަ އަހަރު މައްޗަށް ނުދާނެ ކަމަށް ސަަރުކާރުން ބުނަނީ ނުބައިކޮށް ހިސާބު ހަދައިގެން ކަމަށް މަހިބަދޫ ދާއިރާގެ ޕީޕީއެމްގެ މެމްބަރު އަަހުމަދު ތޯރިގް (ޓޮމް) މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އޮތް ބަޖެޓް ބަހުސްގައި އޭނާ ވިދާޅުވީ، ބޮޑެތި ގައުމުތަކުގައި ވެސް އަންނަ އަހަރު އިންފްލޭޝަން ރޭޓް މަތިވާނެ ކަމަށް ލަފާކޮށްފައި ވާއިރު، ރާއްޖޭގެ އިންފްލޭޝަން ރޭޓް 1.1 ޕަސެންޓްގައި ހިފެހެއްޓޭނެ ކަމަށް ސަރުކާރުން ބުނަނީ ނުބައިކޮށް ހިސާބު ހަދާތީ ކަމަށެވެ. އިންފްލޭޝަން ރޭޓް މައްޗަށް ދާނެ ކަމަށް ލަފާކުރާ ބޮޑު ގައުމެއްގެ މިސާލެއްގެ ގޮތުގައި އޭނާ ދެއްކެވީ އެމެރިކާ އެވެ.
މުދަލާއި ހިދުމަތުގެ އަގުތައް ދުނިޔޭގައި އުފުލޭ ސަބަބުތަކުގެ ތަފުސީލު ދެއްވަމުން ތޯރިގް ވިދާޅުވީ، ޑިމާންޑް ބޮޑުވުމުގެ ސަބަބުން، ގިނަ އަދަދެއްގެ މުދާ ބަނދަރުތަކަށް ޖަމާކޮށް ބަނދަރުތައް ތޮއްޖެހިފައިވާ ކަަމަށެވެ. އަންނަ އަހަރު ރާއްޖޭގައި މުދަލާއި ހިދުމަތުގެ އަގު އުފުލިޔަ ނުދީ ހިފެހެއްޓޭނެ ކަމަށް ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވި ނަމަވެސް، "ސަޕްލައިޗެއިން" އަށް ނުކުޅަދާނަ ވާ ވަރަށް ޑިމާންޑް އެބައޮތް ކަމަށް އޭނާ ވެސް ވިދާޅުވި އެވެ.
ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުން ވެސް ކުރިން ވިދާޅުވީ، މުދާ އުފުލުމުގެ އަގު އިންތިހާ އަށް މައްޗަށް ގޮސް، ރާއްޖެ އަށް ކޮންޓެއިނާއެއް ގެނެވޭ އަގު 7،000 ޑޮލަރަށް އަރާފައިވާ ކަަމަށެވެ.
"އަޅުގަނޑުމެން ކުރިން 3،000 ޑޮލަރަށް ގެންނަ ކޮންޓެއިނާ މިއަދު 7،000 ޑޮލަރަށް އަރައިގެން ދިޔައީމާ، ލިލީ ސްޓޯރާއި ބީއެޗްއެމާއި ރެޑްވޭވުން އެ މީހުންގެ މުދަލުގެ އަގު ބޮޑު ނުކުރާނެ ކަމަށް މިނިސްޓަަރު ވިދާޅުވުމަކީ ގޯހެއް. އެއީ ނުބައެއް. އެހެންވީމާ މި ދަންނަވަނީ ނަމްބަރު ނުބައި ނުކުރާށޭ،" ތޯރިގް ވިދާޅުވި އެވެ.
މިއަދުގެ ޖަލްސާގައި އަމީރު ވިދާޅުވީ، އާއްމު ދުނިޔޭގެ ބާޒާރުގައި މުދަލާއި ހިދުމަތުގެ އަގު ބޮޑުވި ނަމަވެސް، ރާއްޖޭގައި ހިދުމަތުގެ އަގު ދަށްކުރަން ސަރުކާރުން މަސައްކަތްތައް ކުރަމުން އަންްނަ ކަމަށެވެ. ރާއްޖޭގައި އަގުހެޔޮކުރަން މަސަައްކަތް ކުރަމުން އަންނަ އެއް ހިދުމަތަކީ އޭނާ ވިދާޅުވި ގޮތުގައި އިންޓަނެޓެވެ. ބޭހުގެ އަގު ދަށްކުރަން ވެސް އަންނަ އަހަރު ފިޔަވަޅުތަކެއް އަޅަން ސަރުކާރުން ރާވާފައިވާ ކަމަށް މިނިސްޓަރު ވިދާޅުވި އެވެ.
"މާނައަކީ ޖުމުލަކޮށް، އަޅުގަނޑުމެން މިހާރު ވެސް ހަމަ އަންދާޒާ ކޮށްފައިވާ ގޮތަށް ކޮންސިއުމާ ބާސްކެޓްގެ އިންފްލޭޝަން މާ މަތި ނުވެ، 2022 ވަނަ އަހަރު ހިފެހެއްޓޭނެކަން،" އަމީރު ވިދާޅުވި އެވެ.
ނަމަވެސް އޭނާ ވިދާޅުވީ، 2020 ގައި [ކޮވިޑް-19 ގެ ބަލިމަޑުކަމާ ހެދި] ހުއްޓިފައި އޮތުމަށް ފަހު، ދުނިޔޭގެ އިގްތިސާދު މިހާރު ކުރިއަަރަމުން އަންނަނީ ވަރަށް ބާރު ސްޕީޑެއްގައި ކަމަށެވެ. އެހެންވެ، ސަޕްލައިޗެއިނަށް ނުުކުޅަދާނަ ވާ ވަރަށް މުދަލާއި ހިދުމަތުގެ ޑިމާންޑް ބޮޑުވެފައިވާ ކަމަށް ވިދާޅުވި އެވެ. އެކަމުގެ އަސަރު ރާއްޖޭގެ ބާޒާރަށް ވެސް ކުރާނެކަން އެނގިވަޑައިގަންނަވާ ކަމަށް އޭނާ ވިދާޅުވި އެވެ.