11 ނޮވެމްބަރ 2021 - 10:12
މޯލްޑިވްސް ޕޫލް ބިލިއާޑް އެސޯސިއޭޝަނުން އިންތިޒާމް ކޮށްގެން ބޭއްވި 9 ބޯލް ޗެމްޕިއަންޝިޕް ދީނާ އަހުމަދާއި ހުސެއިން ފަޔާޒު ކާމިޔާބު ކޮށްފި އެވެ.
މާލޭގައި ހުންނަ ނެޝަނަލް ބިލިއާޑް ސެންޓަރުގައި މި މަހުގެ 4 ވަނަ ދުވަހު ފެށި މުބާރާތުގައި 74 ކުޅުންތެރިން ވާދަކުރި އެވެ. އެއީ ފިރިހެން 64 ކުޅުންތެރިންނާއި އަންހެން 10 ކުޅުންތެރިންނެވެ.
ޑަބަލް އެލިމިނޭޝަން އުސޫލުން ގެންދިޔަ މުބާރާތުގެ އަންހެން ބައިގެ ޗެމްޕިއަންކަން ދީނާ ހޯދީ ރޭގެ ފައިނަލުގައި 7-5 ފްރޭމުން އައިމިނަތު ފާތީ ބަލިކޮށްގެނެވެ. ދީނާ އާއި ފާތީގެ އިތުރުން މި ބައިގެ އެންމެ މޮޅު ހަތަރު ކުޅުންތެރިންނަށް ހޮވުނީ އައިމިނަތު ހަލީމާއި އައިޝަތު އަލީ އެވެ.
މު މުބާރާތް ކާމިޔާބު ނުކުރެވުނަސް ފާތީ ވަނީ މި އަހަރުގެ 8 ބޯލް ޗެމްޕިއަންޝިޕާއި 10 ބޯލް ޗެމްޕިއަންޝިޕް ކާމިޔާބުކޮށްފަ އެވެ.
އެސޯސިއޭޝަން ރޭންކިން އަށް ގުނާ މި މުބާރާތުގެ ފިރިހެން ބައިގެ ފައިނަލުގައި ފަޔާޒާ ދެކޮޅަށް ނުކުތީ މުހައްމަދު ޝަރީފެވެ. ފަޔާޒް ޗެމްޕިއަންކަން ހޯދީ 7-2 ފްރޭމުން މެޗުން މޮޅު ވެގެންނެވެ.
މުބާރާތުގެ އެންމެ މޮޅު ފިރިހެން އަށް ކުޅުންތެރިން ހޮވިއިރު، ފަޔާޒާއި ޝަރީފްގެ އިތުރުން ދެން ހިމެނެނީ ހަސަން ޝާޒް މުހައްމަދު، އިސްމާއިލް ޖީހާން، މުހައްމަދު ސާލިހް ހަމީދު، އަހްސަން ހާޝިމް، އަހުމަދު ޒިޔާން އަދި އަލީ ފަޔާޒެވެ.
މުބާރާތުގައި އެންމެ ގިނަ ރަންއައުޓް އަދި ބްރޭކް ރަންއައުޓް ޖެހީ ވެސް ފިރިހެން ބައިގެ ޗެމްޕިއަން ހުސެއިން ފަޔާޒެވެ. ފަޔާޒް ވަނީ މި އަހަރުގެ 8 ބޯލް އެސޯސިއޭޝަން ކަޕް ކާމިޔާބުކޮށްފަ އެވެ.
މި އަހަރުގެ މިހާތަނަށް ބިލިއާޑުގެ ހަ މުބާރާތެއްގެ ކުޅުން ނިމިފައިވާއިރު ދެން އޮންނާނީ އަހަރުގެ އެންމެ ފަހު މުބާރާތް ކަމުގައިވާ، ގައުމީ ބިލިއާޑް މުބާރާތެވެ. ގައުމީ މުބާރާތް ކުރިޔަށް ދާނީ ޑިސެމްބަރު 1-15 އަށެވެ.