15 ނޮވެމްބަރ 2021 - 16:26
ނަތީޖާ ނުނެރެވޭ ކޮންމެ ފަހަރަކު ބަޔަކު ގޯސްކޮށް އެ ބައެއްގެ ބޮލުގައި ކަންކަން އަޅުވައިގެން ރާއްޖޭގެ ފުޓްބޯޅަ އަށް ހައްލެއް ނުހޯދޭނެ ކަމަށް ގައުމީ ފުޓްބޯޅަ ޓީމުގެ ކޯޗް ފްރެންޗެސްކޯ މޮރިއޭރޯ ބުނެފި އެވެ.
ލަންކާގައި މިހާރު ކުރިއަށްދާ، މަހިންދަ ރާޖަޕަކްސަ ފުޓްބޯޅަ މުބާރާތުގައި މާދަމާ ސީޝެލްސްއާ ދެކޮޅަށް ނުކުންނައިރު މޮރިއޭރޯ އަށް ވަނީ ބޮޑު ޕްރެޝަރެއް ކުރިމަތިވެފަ އެވެ. ފުރަތަމަ މެޗުގައި ހަތަރު ލަނޑުގެ ލީޑެއް ނަގާފައި ވަނިކޮށް ސްރީ ލަންކާ އަތުން އެއްވަރުވުމާއި ދެވަނަ މެޗުގައި ބަންގްލަދޭޝް އަތުން ބަލިވުމުން ގިނަ ބަޔަކު ދަނީ ގައުމީ ޓީމާއި ފުޓްބޯޅަ އަށް ވަރަށް ބޮޑަށް ފާޑު ކިޔަމުންނެވެ.
މޮރިއޭރޯ ބުނީ ނަތީޖާ ގޯސްވެގެން ނެގެޓިވް ވާހަކަ ދައްކަނީ އޭނާ އާއި ގައުމީ ޓީމުން ކުރަމުންދާ ބުރަ މަސައްކަތް ނޭނގޭތީ ކަމަށެވެ. އޭނާ ބުނީ ޓީމުގެ ގޭމް އާއި ޓެކްނިކަލް ކަންތައްތަކަށް އެއްވެސް މީހަކު ނުބަލާ ކަމަށެވެ.
"ހަމައެކަނި ނަތީޖާ އަށް ބަލަންޏާ އަހަރެމެން މަސައްކަތް ކުރާ ގޮތް ނޭނގެނީ. ކަލޭމެން [ނޫސްވެރިން] އެއްވެސް ވަރަކަށް މަސައްކަތް ކުރިންތަ އަހަރެމެން ކުރިން ކުޅުނު ދެ މެޗުގެ ޓެކްޓިކަލް އެނަލިސިސްއެއް ހަދަން," މޮރިއޭރޯ ބުންޏެވެ.
"އެކަމަކު ކަލޭމެން އަންނަނީ އަބަދުވެސް ކޮންމެ ވެސް މީހަކު ކުށްވެރިކޮށް އެމީހަކާ ދިމާލަށް އިނގިލި ދިއްކުރުމަށްޓަކައި. ކޯޗެއްގެ ގޮތުގައި އަހަރެން މިދަނީ ވަރަށް ބުރަކޮށް މަސައްކަތް ކުރަމުން. ކުރިން ފުޓްބޯޅަ ކުޅުނު މީހެއްގެ ހައިސިއްޔަތުން އަދި 13 އަހަރު ކުރިން ފެށިގެން ކޯޗެއްގެ ގޮތުގައި މަސައްކަތް ކުރާ މީހެއްގެ ހައިސިއްޔަތުން އަހަންނަށް އެނގޭ ފުޓްބޯޅައިގައި ކަންކަން ހިނގާގޮތް. އަހަންނަށް އެނގޭ އަހަރެން ކުރަން ޖެހޭ މަސައްކަތަކީ ކޮބައިކަން. އަހަންނަށް އެނގޭ މި ޓީމުން ކުރިއެރުން ހޯދާނެކަން. ސަބަބަކީ މި ކުޅުންތެރިން ވެސް ދަނީ ގިނަކަންކަން ދަސްކުރަމުން. އެކަމަކު އަހަރެމެންނަށް ވަގުތު ދޭށޭ ރަނގަޅު ސިސްޓަމެއްގެ ތެރެއިން މަސައްކަތް ކުރަން."
އޭނާ ބުނީ މާދަމާ ސީޝެލްސް އާ ދެކޮޅަށް ނުކުންނަ ޓީމަށް ބަދަލުތަކެއް ގެންނާނެ ކަމަށެވެ. އެ ބަދަލުތަކަކީ އިދިކޮޅު ޓީމަށް ބަލައި ގެންނަ ބަދަލަތަކެއް ކަމަށް މޮރިއޭރޯ ބުންޏެވެ.
"އަހަރެމެން މިހާހިސާބުން ގިވްއަޕް ނުކުރާނަން. ޓީމަށް އެކަން އެނގޭނެ. މިދިޔަ ދެމެޗުން އަހަރެމެންނަށް ވަރަށް ގިނަ އެއްޗެހި ދަސް ކުރެވޭނެ. އޭގެ ތެރެއިން ކުރިއެރުން ހޯދޭނެ،" މޮރިއޭރޯ ބުންޏެވެ.
އޭނާ ބުނީ ސީޝެލްސް އަކީ ވަރަށް އޮގަނައިޒްކޮށް ކުޅޭ ޓީމެއް ކަމަށެވެ. ކުރިން ކުޅުނު ދެ މެޗަށް ވުރެ އެ މެޗުގެ ޗެލެންޖު ބޮޑުވާނެ ކަމަށް މޮރިއޭރޯ ބުންޏެވެ. އޭނާ ބުނީ ޓީމުގެ ފުރަތަމަ 11 އޭނާ ހަމަކުރަނީ އެންމެ ފަހު 20 މިނިޓް ތެރޭގައި ކަމަށެވެ.
"ބޭނުމަކީ ޓީމުގެ ކޮންމެ ކުޅުންތެރިޔަކު ވެސް ތައްޔާރަށް ބޭތިއްބުން،" އޭނާ ބުންޏެވެ. "އަހަރެމެން ކުޅެނީ ފަހަތުން އަރައިގެން ކުރިއަރައިގެންދާ ގޮތަށް ކުޅޭ ވަރަށް ހައި އިންޓެންސިޓީ ގޭމެއް. އެ ސިސްޓަމަށް ކުޅޭއިރު ބަދަލުގައި އަރާ ސްކޮޑްގެ 23 ކުޅުންތެރިން ވެސް ވަރަށް މުހިންމު."
ސީޝެލްސް އާ ދެކޮޅަށް ކުޅޭ މެޗު ފަށާނީ މާދަމާ ހަވީރު 3:30 ގަ އެވެ. ސީޝެލްސް ބަލިކޮށްގެން ރާއްޖެ އަށް ފައިނަލަށް ދެވިދާނެ އެވެ. އެކަމަކު އެ މެޗަށް ފަހު މާދަމާ ރޭ ބަންގްލަދޭޝް އާއި ލަންކާ ކުޅޭ މެޗަށް ވެސް ބަލަން ޖެހެ އެވެ. އެ މެޗުން ބަންގްލަދޭޝް މޮޅުވެއްޖެނަމަ ދެވަނަ ޓީމުގެ ގޮތުގައި ރާއްޖެ އަށް ފައިނަލަށް ދެވޭނެ އެވެ.