27 ނޮވެމްބަރ 2021 - 10:20
ކޮވިޑް-19ގެ އާ ވޭރިއަންޓް، "އޮމިކްރޯން" ފެތުރެން ފެށުމާ އެކު ދުނިޔޭގެ ބާޒާރުގައި ތެލުގެ އަގު 13 ޕަސެންޓަށް ވެއްޓިއްޖެ އެވެ.
މިއީ މިދިޔަ އަހަރުގެ އޭޕްރިލް މަހަށް ފަހު އެއް ދުވަހުގެ ތެރޭގައި މިހާ ބޮޑު އަދަދަކުން ތެލުގެ އަގު ވެއްޓުނު ފުރަތަމަ ފަހަރެވެ.
ދުނިޔޭގެ ބާޒާރުގައި ތެލުގެ އަގު ވެއްޓުނީ އެފްރިކާގެ ބައެއް ގައުމުތަކުން ފެނިފައިވާ ކޮވިޑުގެ އާ ވޭރިއަންޓުގެ ސަބަބުން އަނެއްކާ ވެސް ދަތުރުފަތުރު ހުއްޓިދާނެތީ އެވެ. މިހާރު ވެސް ގިނަ ގައުމުތަކުން ވަނީ މި ވޭރިއަންޓު ފެނިފައިވާ ގައުމުތަކުން ދަތުރުފަތުރުކުރުން މަނާކޮށްފަ އެވެ.
އިއްޔެއާ ހަމައަށް ބާޒާރުގައި ތެލުގެ އަގު ހުރީ ފީފާއެއް 74.11 ޑޮލަރު (1،142ރ.)ގަ އެވެ. ފާއިތުވި 24 ގަޑިއިރު ތެރޭގައި މި އަގު ވަނީ 68.15 (1،050ރ.) ޑޮލަރަށް ވެއްޓިފަ އެވެ. މިދިޔަ އަހަރު މުޅި ދުނިޔެ ހުއްޓިފައި އޮތް އިރު ވެސް ތެލުގެ އަގު ވެއްޓުނީ 20 ޕަސެންޓަށެވެ.
ބާޒާރުގައި ތެލުގެ އަގު ވެއްޓިފައިވަނީ ތެލުގެ އަގު ދަށްކުރަން، ތެޔޮ އުފައްދާވަރު އިތުރުކުރާނެ ކަމަށް އެމެރިކާއިން ބުނެފައިވާ ދަނޑިވަޅެއްގަ އެވެ. އެ ގައުމުން ވަނީ އަންނަ ހަފުތާ ތެރޭ ބާޒާރަށް ތެލުގެ ސަޕްލައި އިތުރުކުރާނެ ކަމަށް ބުނެފަ އެވެ. ނަމަވެސް މި އައި ބަދަލާ އެކު އެމެރިކާއިން އެ ނިންމުން ބަދަލު ކުރާނެ ކަމަށް ތަޖުރިބާކާރުން ބުނެ އެވެ.
ބައެއް ތަޖުރިބާކާރުން ބުނެފައިވާ ގޮތުގައި އަންނަ ހަފުތާގައި ބާއްވާ އޯޕެކް ޕްލަސް ގައުމުތަކުގެ ބައްދަލުވުމުގައި ތެޔޮ އުފައްދާ މިންވަރާ ގުޅޭ މަޝްވަރާތައް ކުރާނެ އެވެ. އަދި އުފައްދާ މިންވަރު ދަށް ކުރަން ނިންމާނެ ކަމަށް ވެސް ވަނީ ލަފާކޮށްފަ އެވެ.
ތަޖުރިބާކާރުންނާ ހަވާލާދީ ބޭރުގެ ބައެއް ނޫސްތަކުން ބުނެފައިވާ ގޮތުގައި އާ ވޭރިއަންޓާ އެކު ދުނިޔޭގެ ދަތުރުފަތުރު އަނެއްކާވެސް ހުއްޓިދާނެ ކަމުގެ ބިރު އެބައޮތެވެ. މިކަމުގެ ސަބަބުން ތެލަށް މިހާރު ވެސް ޑިމާންޑު ދަށްވެއްޖެ ކަމަށާއި އެހެންވެ، އޯޕެކުން ވެސް ސަޕްލައި ދަށްކުރާނެ ކަމަށް ލަފާކުރެވޭ ކަމަށް ވަނީ ބުނެފަ އެވެ.
ކޮވިޑް-19ގެ އާ ވޭރިއަންޓް އެފްރިކާގެ ގައުމުތަކުން ފެނުން އިތުރު ވެފައި ވާއިރު ޑަބްލިޔުއެޗްއޯ އިން ބުނެފައި ވަނީ މިއީ ފަސޭހައިން ފެތުރޭ ވެރިއެންޓެއްތޯ ދެނެގަންނަން އަދި ހަފްތާތަކެއް ނަގާނެ ކަމަށެވެ. މިއީ މިހާރު ހުރި ވެކްސިންތަކުން ރައްކާތެރިކަން ނުލިބޭ ވެރިއެންޓެއް ކަމަށް ވެދާނެ ކަމުގެ ކަންބޮޑުވުން އޮތަސް ސިއްހީ ތަޖުރިބާކާރުން ވިދާޅުވަނީ މި ވެރިއެންޓާ ދެކޮޅަށް ވެސް ވެކްސިން މަސައްކަތްކުރާނެ ކަމަށާއި އެކަމަކު ރައްކާތެރިކަން ލިބޭ މިންވަރު ކުޑަވެދާނެ ކަމަށެވެ.