01 ޑިސެމްބަރ 2021 - 22:46
އަދުލުވެރި އިންސާފުވެރި ޝަރީއަތަކުން ގައިކޮޅުގައި އަތް ނުލެވޭނެ ކަމަށް ކުރީގެ ރައީސް އަބްދުﷲ ޔާމީންގެ މިރޭ ވިދާޅުވެއްޖެ އެވެ.
މަނީ ލޯންޑްރިންގެ ކުށް ސާބިތުވެ ނޮވެމްބަރު، 28، 2019 ގައި ޔާމީން ޖަލަށް ލުމަށް ކްރިމިނަލް ކޯޓުން ކުރި ހުކުމް ސުޕްރީމް ކޯޓުން އިއްޔެ ބާތިލްކުރުމުން ފުރަތަމަ ފަހަރަށް އާންމުކޮށް ދެއްކެވި ވާހަކާގައި ޔާމީން ވިދާޅުވީ ރައްޔިތުންގެ ހިތަށް މިއަދު އެންމެ ބޮޑު ނުތަނަވަސް ކަމެއް ލިބެނީ އަދުލުވެރި ކަމުގެ ދާއިރާ އޮތް ގޮތުން ކަމަށެވެ.
ޔާމީން ޖަލުން މިނިވަންވެ ވަޑައިގަތުމުން އެކަމުގެ އުފަލުގައި "ޝުކުރިއްޔާ ރައްޔިތުން" ގެ ނަމުގައި މިރޭ ޕީޕީއެމް އޮފީހުގައި ބޭއްވި ޖަލްސާގައި ޔާމީން ވަނީ އެ މަނިކުފާނު ޖަލަށް ލާފައި ވަނީ އިންސާފުވެރި ޝަރީއަތެއްގެ ތެރެއިން ނޫން ކަމަށް ވިދާޅުވެ ކުރިން ދެެއްކެވި ވާހަކަތައް ތަކުރާރު ކުރައްވައިފަ އެވެ.
"ދައުލަތުގެ ފައިސާގައި ޖެހިގެން ހައްގު ޝަރީއަތެއް ކޮށްފިއްޔާ، އަދުލުވެރިކަމާ އެކީ ކަމެއް ބަލައިފިއްޔާ ހަމަ މީގެ ކުރިން މި ޕޯޑިއަމްގައި ބުނި ގޮތަށް އަޅުގަނޑުގެ ގައިގައި އަތެއް ނުލެވޭނެ،" ޔާމީން ވިދާޅުވި އެވެ.
ޔާމީން ވިދާޅުވީ ސިޔާސީ މީހެއްގެ ފަރާތުން ކިރިޔާ ވެސް ކަމެއް ހިނގައިފި ނަމަ "ތީރުތައް އަންނަނީ ހާހުން ދެހާހުން" ކަމަށެވެ.
"އެކަމަކު ކޮބައިތޯ އަދުލުގެ ދާއިރާއިން ކަމެއް ގޯސްކޮށް ދިޔައިމާ އެއަށް ވުރެ ބޮޑަށް ރަނގަޅުކުރަން ޖެހޭ ކަމެއް އެބަ އޮތްތޯ ... މިހާރު ވެސް ނުނިމި ހުރި މައްސަލަތަކުގެ ތެރޭގައި އޯޑިއޯގެ މައްސަލަ ހިމެނޭ. އެތަނުން އެއް ފަނޑިޔާރެއްގެ އޯޑިއޯ އެއީ ސައްހަ ކަމަށް ގަބޫލުކުރެވި އެ ފަނޑިޔާރު ވެސް އެހެރީ ސަސްޕެންޑްކޮށްފައި،" ޔާމީން ފަސް އަހަރަށް ޖަލަށް ލަައި، ފަސް މިލިއަން ޑޮލަރުން ޖޫރިމަނާކުރަން ކްރިމިނަލް ކޯޓުން ހުކުމްކުރި ބެންޗުގައި ހިމެނިވަޑައިގެންނެވި ގާޒީ ހުސެއިން ފާއިޒު ރަޝާދުގެ ލީކުވެފައިވާ އޯޑިއޯގެ މައްސަލަ އަށް އިޝާރާތް ކުރައްވައި ޔާމީން ވިދާޅުވި އެވެ.
ގާޒީ ފާއިޒުގެ ނަޒާހަތްތެރިކަމާ މެދު ސުވާލު އުފެދޭގޮތަށް އާންމުވި އޯޑިއޯގެ އަޑާއި ފާއިޒުގެ އަޑާ ދިމާވާ ކަމަށް އޯޑިއޯ އެނާލިސިސްގައި ކަނޑައަޅާފައި ވާތީ އޭނާ ސަސްޕެންޑް ކުރީ މިދިޔަ މަހުގެ ކުރީކޮޅެވެ.
ޔާމީން ވިދާޅުވީ އާންމުވި އޯޑިއޯ އިން އެނގެނީ ގާޒީންގެ މެދުގައި ކަންތައްތަކެއް ހިނގާފައިވުން ކަމަށެވެ.
"އެކަން އޮންނަ ގޮތަށް ފާޑެއް ދަންނަވާކަށް ނެތިން. އެކަމަކު ދުނިޔެއާ ބުއްދީގެ ހަމަތަކަށް ބަލާއިރު އެއްވެސް ގޮތަކަށް މީހަކާ ދޭތެރޭގައި އަދުލުވެރިކަމާ އެކީގައި ހުކުމެއް ކުރަން ބެންޗުގައި އިންނަ މީހުންގެ ތެރެއިން އެކެއްގެ ފަރާތުން ވިޔަސް އަދުލުވެރިކަން ގެއްލިއްޖެ ކަމަށް ސާބިތުވިޔަސް އެ އުފެދެނީ ސުވާލުތަކެއް،"
ޔާމީން ވަނީ އޯޑިއޯތަކުގެ ހަގީގަތް ނޭނގި ދިގުލައިގެންދާތީ އެކަމަށް ފާޑުވިދާޅުވެފަ އެވެ.
"ފަނޑިޔާރުންގެ ސުލޫކާއި ފަނޑިޔާރުންގެ އަހުލާގީ މިންގަނޑާ ހިލާފަށް އަދުލުން އެއްކިބާވާ ހިސާބުން އެ ބޭފުޅުން އެ ކުރެއްވި ކަމެއްގެ ތުހުމަތުން ބަރީއަ ނުވެވޭ ނަމަ، އަބަދުވެސް ރައްޔިތުންގެ ހިތްތަކުގައި ސުވާލު އުފެދޭނެ. ޝައްކު އޮންނާނެ،" ރާއްޖޭގައި އެންމެ ކޮރީ އަދުލުގެ ނިޒާމު ކަމަށް ސިފަކުރައްވަމުން ޔާމީން ވިދާޅުވި އެވެ.
މި ވާހަކަ މިގޮތަށް ދައްކައިގެން ޖަލަށް ލިޔަސް އެއްވެސް މައްސަލައެއް ނެތް ކަމަށް ވެސް ޔާމީން ވިދާޅުވި އެވެ.
"އަދުލުގެ ނިޒާމަކީ ހުރިހާ ކަމަކުން އެއްކިބާވެގެން ހިނގާ އަދުލުގެ ނިޒާމެއް ކަމަށް ރައްޔިތުން ގަބޫލުނުކުރާ ނަމަ ރާއްޖޭގައި ދިރުމެއް ނެތް. ރާއްޖޭގައި ކުރިއެރުމެއް ނެތް،" ޕާޓީގެ އިސް ބޭފުޅުންނާއި ސަޕޯޓަރުން ގިނަ އަދަދަކަށް ބައިވެރިވި ޖަލްސާގައި ޔާމީން ވިދާޅުވި އެވެ.
ޔާމީން މިނިވަންކުރުމަށް މަސައްކަތްކޮށްދިން އެންމެންނަށް ޝުކުރު އަދާކުރައްވަމުން ވިދާޅުވީ ލިބުނު އެންމެ ބޮޑު ހިތްވަރަކީ ރައްޔިތުން އެ މަނިކުފާނާ އެކު ހިތްވަރު އެލުވާނުލައި ތިބުން ކަމަށެވެ.
ފަސް އަހަރުގެ ޖަލު ހުކުމުން ސަލާމަތް ވިޔަސް އަދިވެސް މަނީ ލޯންޑަރިން އާއި ރިޝްވަތުގެ ދައުވާތަކެއް އޮތް ޔާމީން ވިދާޅުވީ އެހެން ދައުވާއެއްގައި އަނބުރާ ޖަލަށްލުމާ ހަމައަށް ވެސް ސިޔާސީ މަސައްކަތުގައި ހުންނަވާނެ ކަމަށެވެ.
މިރޭ އިދިކޮޅުގެ ޖަގަހަ ޖަލްސާގައި ޕީޕީއެމް/ ޕީއެންސީގެ ލީޑާޝިޕާއި ސަޕޯޓަރުން ވެސް ބައިވެރިވި އެވެ. އެކަމަކު އެ ޖަލްސާގައި އޮތީ ޔާމީންގެ ވާހަކަ ދެއްކެވުން އެކަންޏެވެ.
ސުޕްރީމް ކޯޓުން އިއްޔެ ބާތިލްކުރީ ގއ. ވޮޑަމުލާ ކުއްޔަށް ދިން މުއާމަލާތުގައި ދައުލަތަށް ލިބެންޖެހޭ ކަމަށް ބުނާ އެއް މިލިއަން ޑޮލަރު އެމްއެމްޕީއާރްސީން އެސްސޯއެފް ކުންފުންޏަށް ޖަމާކޮށް އެ ކުންފުނިން ޔާމީނަށް އެއް މިލިއަން ޑޮލަރު ޖަމާކުރި މައްސަލާގައި ޔާމީނަށް ދަށު ކޯޓުން ސާބިތުވި މަނީ ލޯންޑަރިންގެ ދައުވާގެ ހުކުމެވެ.
ސުޕްރީމް ކޯޓުގެ ހުކުމުގައި ވަނީ ޔާމީނަށް އެސްއޯއެފުން ލިބުނު ފައިސާ އަކީ ކޮން ފައިސާއެއްކަމާ މެދު އޮތް ޝައްކު ތަހުގީގުން ފިލާފައި ނުވާ ކަމަށާއި އެހެންވެ ދައުވާގައި ބުނާ ގޮތަށް، އެއީ ވޮޑަމުލާގެ ފައިސާކަން ޝަރީއަތަށް ޔަގީންވާނެ ހެކި ހުށަހަޅާފައި ނެތް ކަމަށެވެ. ނަމަވެސް ޔާމީނަށް ޖަމާވި ފައިސާ އަކީ ކޮން ފައިސާއެއްކަން ހޯދައި އެއީ ދައުލަތަށް ލިބެންޖެހޭ ފައިސާ ކަމަށްވާ ނަމަ އެ ފައިސާ އާއި އެއިން ލިބިފައިވާ މަންފާ ދައުލަތަށް ނެގިދާނެ ކަމަށް ވެސް ހުކުމުގައިވެ އެވެ.