19 ޑިސެމްބަރ 2021 - 09:52
ލީޑްސް (ޑިސެމްބަރު 19) - އިނގިރޭސި ޕްރިމިއާ ލީގުގައި ރޭ އާސެނަލް އިން ރަށުން ބޭރުގައި ލީޑްސް ޔުނައިޓެޑް 4-1 އިން ބަލިކޮށް، ޓޭބަލްގެ ހަތަރު ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.
އާސެނަލް ހަތަރު ވަނައިގައި އޮތީ ކުޅުނު 18 މެޗުން 32 ޕޮއިންޓް ހޯދައިގެންނެވެ. އެއް މެޗު މަދުން ކުޅެގެން 28 ޕޮއިންޓާ އެކު ވެސްޓް ހޭމް ޔުނައިޓެޑް ފަސް ވަނައިގައި އޮތް އިރު، އާސެނަލް އަށް ވުރެ ދެ މެޗު މަދުން 27 ޕޮއިންޓާ އެކު ހަވަނައިގައި އޮތީ މެންޗެސްޓާ ޔުނައިޓެޑެވެ. އަދި ހަތް ވަނައިގައި ޓޮޓެންހަމް އޮތީ އާސެނަލް އަށް ވުރެ ހަތަރު މެޗު މަދުން ކުޅެ، 25 ޕޮއިންޓް ހަމަކޮށްގެންނެވެ.
ރޭގެ މެޗުގައި އާސެނަލް ވަނީ ފުރަތަމަ ހާފުގައި ތިން ގޯލުގެ ލީޑެއް ނަގައިފަ އެވެ. ލީޑްސްގެ ޑިފެންޑަރުންނަށް އޭރިއާ ތެރެއިން ބޯޅަ ރަނގަޅަށް ކޮންޓްރޯލް ނުވެ އުޅެނިކޮށް އެލެކްޒެންޑަ ލަކަޒޭޓްގެ އެހީރެތިކަމާ އެކު، މެޗުގެ 16 ވަނަ މިނިޓުގައި އާސެނަލްގެ ފުރަތަމަ ލަނޑު ޖެހީ ބްރެޒިލް ފޯވާޑް ގަބްރިއެލް މާޓިނޭލީ އެވެ.
ގްރޭނިޓް ޒާކާ ދިން ބޯޅައެއް ހިފައިގެން އޭރިއާ ތެރެއަށް ވަދެ، ކީޕަރު ބޯ މަތިން ގޯލުތެރެއަށް ފޮނުވާލައިގެން 28 ވަނަ މިނިޓުގައި މާޓީނޭލީ ރޭގެ ދެވަނަ ލަނޑު ވެސް ޖެހިއިރު، ފުރަތަމަ ހާފު ނިމެން ތިން މިނިޓަށްވެފައި ވަނިކޮށް އާސެނަލްގެ ތިންވަނަ ލަނޑު ޖެހީ ބުކާޔޯ ސަކާ އެވެ.
މެޗު ނިމެން 15 މިނިޓަށްވެފައި ވަނިކޮށް ލިބުނު ޕެނަލްޓީ އަކުން ލީޑްސް ޔުނައިޓެޑުގެ ހަމައެކަނި ލަނޑު ރަފީނިއާ ޖަހައިދީފައި ވަނިކޮށް 84 ވަނަ މިނިޓުގައި އާސެނަލްގެ ހަތަރު ވަނަ ލަނޑު ޖެހީ ބަދަލު ކުޅުންތެރިއެއް ގޮތުގައި ނުކުތް އެމީލް ސްމިތު ރޯ އެވެ. ސްމިތު ރޯ ކުޅެން ނުކުމެފައި ވަނީ ލީޑްސް އިން ޕެނަލްޓީ ކާމިޔާބު ކުރި ފަހުންނެވެ.
އާސެނަލް ވަނީ އެ ޓީމުގެ ގެބޮންގެ ފޯވާޑް ޕިއޭ އެމެރިކް އޮބާމަޔަން އަތުން ކެޕްޓަން ބޭންޑް ނެގި ފަހުން މިހާތަނަށް ކުޅުނު ތިން މެޗު ވެސް ކާމިޔާބު ކޮށްފަ އެވެ.
މިއީ ލީޑްސްގެ ކޯޗު މާސެލޯ ބިއެލްސާގެ އިރުޝާދުގެ ދަށުން ލީގުގައި އެ ޓީމު ޖެހިޖެހިގެން ބަލިވި ތިންވަނަ މެޗެވެ. މި މެޗުގެ ކުރިން މެންޗެސްޓާ ސިޓީއާ ވާދަކޮށް 7-0 އިން ބަލިވިއިރު، އޭގެ ކުރިން ކުޅުނު މެޗުގައި 2-3 އިން ޗެލްސީ އަތްދަށުވީ އެންމެ ފަހު ސިކުންތުކޮޅުގެ ތެރޭގަ އެވެ.
ލީޑްސް ޔުނައިޓެޑަށް މި އަހަރު ދެން ބާކީ އޮތީ ލިވަޕޫލް އާއި އެސްޓަން ވިލާއާ ދެކޮޅަށް ކުޅޭ މެޗެވެ. ނަމަވެސް ކޮވިޑާ ގުޅިގެން އިނގިރޭސި ޕްރިމިއާ ލީގު ގިނަ މެޗުތަކެއް ފަސް ކުރަން ޖެހިފައިވާއިރު، ރޭ ކުޅެން ތާވަލުކޮށްފައި އޮތް އެސްޓަން ވިލާ އާއި ބާންލީ ބައްދަލުކުރާ މެޗު ފަސް ކުރީ މެޗު ފެށެން ދެ ގަޑިއިރަށްވެފައި ވަނިކޮށެވެ. މެޗު ފަސްކުރަން ޖެހުނީ އިއްޔެ ކޮވިޑް-19 ގެ ނަތީޖާތައް ލިބުނުއިރު، އެސްޓަން ވިލާ ޓީމުގައި ޕޮޒިޓިވް ނަތީޖާތައް ގިނަ ވުމުންނެވެ.
އެސްޓަން ވިލާ-ބާންލީ މެޗަކީ ކޮވިޑާ ހުރެ މި ހަފްތާ ބަންދުގެ ޝެޑިއުލް އިން ކެންސަލް ކުރަން ޖެހުނު ހަވަނަ މެޗެވެ. މިހާތަނަށް ލީގުގައި ވަނީ ކޮވިޑްގެ ސަބަބުން 10 މެޗު ފަސް ކޮށްފަ އެވެ.