13 ޖެނުއަރީ 2022 - 06:16
ކޮވިޑް-19 ގެ އަލާމާތްތަކަށް ފަރުވާދޭން ހާއްސަ ފްލޫ ކްލިނިކެއް ނަހަދައި ޗައިނާގެ ހޮސްޕިޓަލެއްގައި ބަލި މީހުންނަށް ފަރުވާ ދެމުން ގެންދިޔަ ޑޮކްޓަރަކަށް ދައުވާކޮށްފި އެވެ.
އެ ގައުމުގެ ރަސްމީ ނޫސް އެޖެންސީ ޒިންހުއާ އިން ރިޕޯޓްކޮށްފައިވާ ގޮތުގައި ކޮވިޑްގެ އަލާމާތްތަކަށް، ހާއްސަ ފްލޫ ކްލިނިކަކާ ނުލައި ފަރުވާ ދެމުން ދިޔަ މައްސަލައެއްގައި ދައުވާކުރީ ޒޯކޫ ސިޓީ އަށް ނިސްބަތްވާ ގުއޯ ނަމަކަށް ކިޔާ ޑޮކްޓަރަކަށެވެ. އޭނާ މަސައްކަތްކުރައްވަމުން ގެންދެވި ހޮސްޕިޓަލްގެ ވައިސް ޑިރެކްޓަރު ވެސް މެ އެވެ.
އޭނާގެ މައްޗަށް ދައުވާކުރީ ފްލޫ ކްލިނެއް ނެތި ކޮވިޑާ ގުޅުން ހުރި ފަރުދޭ ކަމަށް ފެންމަތިވި މައްސަލައާ ގުޅިގެންނެވެ. އެގޮތުން މިދިޔަ އޮކްޓޯބަރު މަހުގެ 29 އިން ނޮވެމްބަރު 2 އަށް ބަލި މީހުންތަކަކަށް ފަރުވާ ދީފައިވާ ކަމަށް ހެނާން ޕްރޮވިންސްގެ ރަސްމީ އިދާރާތަކުން ބުންޏެވެ.
ޗައިނާ އިން ކޮވިޑާ ދެކޮޅަށް ވަރަށް ވަރުގަދަ އަށް މަސައްކަތްކުރާ އިރު، ކޮވިޑާ ގުޅުން ހުރި ބަލިތަކަށް ފަރުވާދޭނީ އެކަމަށް ހުއްދަ ދީފައިވާ ފްލޫ ކްލިނިކުތަކުންނެވެ.
އެ އުސޫލާ ހިލާފުވެގެން ޑޮކްޓަރަކަށް ދައުވާކުރި އިރު، ކުށް ސާބިތުވެއްޖެ ނަމަ މަދުވެގެން ހަތް އަހަރުގެ ޖަލު ހުކުމެއް އަންނާނެ އެވެ.