13 ޖެނުއަރީ 2022 - 19:47
ބަނގުރާ ހިފައިގެން ބާރު ސްޕީޑެއްގައި ދުއްވާފައި ދިޔަ ސައިކަލެއް މުލީއާގެ ފާރުގައި ޖެހި އެކްސިޑެންޓްވެއްޖެ އެވެ.
ފުލުހުން ބުނީ މިއަދު ހަވީރު 4:30 ހާއިރު މަޖީދީމަގުން ބާރު ސްޕީޑުގައި ދުއްވާފައި ދިޔަ ސައިކަލެއް މަޑުކުރަން ފުލުހުން އެންގުމުން މަޑުނުކޮށް ބާރު ސްޕީޑްގައި އަލިކަލޭގެފާނު މަގުން ގޮސް ޖެހުނީ މުލިއާގެ ފާރުގައި ކަމަށެވެ.
އެކްސިޑެންޓުވި ސައިކަލުގައި އަޅުވާފައި އޮތް ކޮތަޅުގެ ތެރެއިން ބަނގުރާ ފުޅިތަކެއް ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ ސައިކަލު ދުއްވަން އިނީ ބަންގްލަދޭޝްގެ މީހެއް ކަމަށެވެ. އަދި އޭނާ އަށް އަނިޔާވުމުން ފުލުހުންގެ ބެލުމުގެ ދަށުގައި ބާއްވައިގެން އައިޖީއެމްއެޗުން ފަރުވާ ދެމުން އަންނަ ކަމަށް ފުލުހުން ބުންޏެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ.