19 ޖެނުއަރީ 2022 - 11:54
ހިޔާ ފްލެޓްތައް ކައިރީގައި ކާރު ޕާކުކުރަން ހާއްސަ ޖާގައެއް ނެތުމުން މަގުމަތީގައި ބާއްވާ ވެހިކަލްތައް ގިނަވެ، މަގުމަތީގައި ޕާކުކުރާ ވެހިކަލްތަކުން އުނދަގޫތަކާ ކުރިމަތިވާން ފަށައިފި އެވެ.
ހިޔާގެ 16 ޓަވަރު ހަދާފައި ހުރީ އެތަންތަނުގެ ތިރީގައި ސައިކަލު ޕާކުކުރެވޭ ގޮތަށެވެ. ބައެއް ޓަވަރުތަކުގެ ކައިރީގައި ސައިކަލު ޕާކުކުރެވޭ ގޮތަށް ޕާކިން ޒޯނު ވެސް ހަދާފައިވެ އެވެ.
އެކަމަކު ޓަވަރުތައް ޑިޒައިންކޮށްފައި ހުރީ އެތަނުގެ އެންމެ ތިރީގައި ކާރު ޕާކުކުރެވޭ ގޮތަކަށް ނޫނެވެ. އަދި އެ ސަރަހައްދުގައި ކާރަށް ހާއްސަ ޕާކިން ޒޯނެއް ވެސް ނެތް އިރު މަގުތައް ހަނިކަމުން، މަގުމަތީ ޕާކުކުރާ ވެހިކަލްތަކުން މަގުގެ ބޮޑު ބައެއް އޮންނަނީ ބަންދުވެފަ އެވެ.
ގިނަ ބަޔަކު ހިޔާ ފްލެޓްތަކުގައި ދިރިއުޅެމުން އަންނައިރު އެތަނުގައި އުޅޭ މީހުންގެ ކާރު ޕާކުކުރެވޭނެ ގޮތެއް ނެތިގެން އެ ސަރަހައްދުން މިހާރު ފެންނަނީ އެތަނުގެ ކައިރީ އޮތް މަގުތަކުގައި ކާރުތައް ބަރިއަކަށް ޕާކުކޮށްފައި އޮތް މަންޒަރެވެ.
ވިނަރެސް ފްލެޓްތައް ކައިރީ މަގުން ހިޔާ ފްލެޓާވީ ސަރަހައްދުގެ މަގުގައި ވެސް ބައެއް މީހުން ކާރު ޕާކުކުރުން އާންމެވެ. އަދި ހުޅުމާލޭ ބޮޑު މަގުން ދެވަނަ ފިޔަވައްސަށް އަރާ ބްރިޖުން ގޮސް، ހިޔާ ފްލެޓާ ދިމާލަށްދާއިރު ހުންނަ ހުރަސް މަގުތަކުގައި ވެސް ބައެއް މީހުން އެ މީހުންގެ ކާރު ޕާކުކޮށްފައި ހުރެ އެވެ.
އެކި ތަންތަނުގައި މީހުން ޕާކު ކުރި ނަމަވެސް އެތަނުގައި ކާރަށް ހާއްސަ ޕާކިން ޒޯނެއް ހެދުމުގެ މަސައްކަތްކުރަން ހަމަޖެހިފައިވާ ކަމެއް ސާފެއް ނުވެ އެވެ.
އެތަނުގައި ކާރުތަކަށް ޕާކިން ޒޯނެއް ނެތުމުން އެކަމުގެ އުނދަގޫ ޓެކްސީ ޑްރައިވަރުންނަށް ވެސް ކުރިމަތިވެ އެވެ.
މާލޭ ސަރަހައްދުގައި ޓެކްސީގެ ހިދުމަތްދެމުން އަންނަ، "އަވަސް ރައިޑް" ގެ އޮފިޝަލަކު ބުނީ ފޭސް ދޭއްގައި ކާރު ޕާކިން ޒޯނެއް ނެތުމުން މިހާރު ޓެކްސީ ޑްރައިވަރުން ޖެހެނީ ފޭސް އެކެއްގެ ޕާކިން ޒޯނެއްގައި ޓެކްސީ ޕާކުކުރުމަށް ފަހު، އެތަނަށް އެހެން ވެހިކަލެއްގައި ދާން ކަމަށެެވެ.
"ވަރަށް ދަތިވޭ އަސްލު އެތަނުގައި ކާރު ޕާކުކުރެވެން ނޯންނާތީ. ފޭސް އެކެއްގެ ޕާކިންތަކުގައި ޕާކުކޮށްފައިދާން ޖެހެނީ ކޮންމެސް މީހަކު ބަލައި އައިމަ އެމީހެއްގެ ސައިކަލަކަށް އަރައިގެން ނޫނީ ބަސް އައިމަ ބަހަށް އަރައިގެން،" އޭނާ ބުންޏެވެ.
އޭނާ ބުނި ގޮތުގައި ޓަވަރުުތަކުގެ މެދުގައި އޮންނަ ހުސް ބިމުގައި ޓެކްސީ ބޭއްވިޔަސް އެއްވެސް ރައްކާތެރިކަމެއް ނޯވެ އެވެ. އެހެންވެ، ގެއަށް ވަދެލާ ވަގުތު ވެސް އެތަނުގައި ޓެކްސީ ބާއްވަން ޑްރައިވަރުން ފަސް ޖެހެ އެވެ.
"ފްލެޓްތަކުގެ މެދުގައި އޮންނަ ހުސް ޖާގަތަކުގައި ބޭއްވީމަ ވަރަށް ގިނަ ފަހަރަށް އެބަ ގެއްލުންވޭ ޓެކްސީއަށް. އެތަނުގައި މަސައްކަތްކުރާ މީހުން އެއްގޮތަކަށް ވެސް ނުބަލާ ޓެކްސީތަކަށް. އެހެންވީމަ ގެއްލުން ލިބޭތީ އާއި އަދި އެހާ ބޮޑަށް ހިރަފުސް އަރާތީ އެތަނަކު ނުބާއްވާ،" އަވަސް ރައިޑްގެ އޮފިޝަލު ބުންޏެވެ.
ޕްރައިވެޓް ކާރުތައް ގެންގުޅޭ މީހުންގެ ކާރުތައް މަގުތަކުގެ އެއް ފަޅީގައި ބާއްވާފައި އޮންނައިރު އެ މީހުންގެ ކަންބޮޑުވުމަކީ ވެސް އެތަނުން ކާރަށް ރައްކާތެރިކަން ނުލިބޭ މައްސަލަ އެވެ.