24 ޖެނުއަރީ 2022 - 22:54
ކޮވިޑް-19 އަށް 24 ގަޑިއިރު ތެރޭ 7،681 ސާމްޕަލް ޓެސްޓުކުރުމުން 2،707 ޕޮޒިޓިވް ކޭސް ފެނިއްޖެ އެވެ.
މިއީ ރާއްޖޭން ކޮވިޑްގެ އާ ވެރިއަންޓް އޮމިކްރޮން ފެނުނު ފަހުން އެއް ދުވަހަކު އެންމެ ގިނަ މީހުން ޓެސްޓްކުރި އަދި އެންމެ ގިނަ ޕޮޒިޓިވް ކޭސް ފެނުނު ދުވަހެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކުރި ހިސާބުތަކުގައިވާ ގޮތުން، މިދިޔަ 24 ގަޑިއިރު ތެރޭ މާލޭން އެކަނިވެސް 4،273 މީހަކު ކޮވިޑަށް ޓެސްޓްކުރި އެވެ. މީގެ ތެރެއިން ކޮންމެ 100 އިން 33 މީހުން ވަނީ ބައްޔަށް ޕޮޒިޓިވް ވެފަ އެވެ. އެއީ 1،420 އެވެ.
ހުރިހާ ސާމްޕަލެއް އެއްކޮށް ބަލާ ނަމަ ކޮންމެ 100 އިން 35 މީހުން ޕޮޒިޓިވް އެވެ.
އޮމިކްރޮން ވެރިއަންޓް ފެތުރެން ފެށި ފަހުން، އެހެން ގައުމުތަކަކޭ އެއްގޮތަށް ރާއްޖޭގައި ވެސް ވަނީ ކޮވިޑްގެ ކޭސްތައް ރެކޯޑް އަދަދަކަށް އިތުރުވެފަ އެވެ. އެއާ އެކު، މި ބަލީގައި އެޑްމިޓްކުރަންޖެހޭ މީހުންގެ އަދަދު ވެސް މަދުމަދުން ދަނީ އިތުރުވަމުންނެވެ. މިއަދު އިރުއޮއްސި 6:00 އާ ހަމައަށް 52 މީހަކު އެޑްމިޓްކޮށްފައި އެބަތިބި ކަމަށް އެޗްޕީއޭގެ ހިސާބުތަކުގައިވެ އެވެ. އާ ކޭސްތަކާ އެކު އެކްޓިވް ކޭސްތަކުގެ އަދަދު ވަނީ 15،700 އިން މައްޗަށް ގޮސްފަ އެވެ.
ރެކޯޑް އަދަދަކަށް މިއަދު މީހުން ޓެސްޓްކޮށްފައި މި ވަނީ ވަގުތުން ނަތީޖާ ލިބޭ ރެޕިޑް ޓެސްޓް ވެސް ހަދައިގެން ފެށުމާ އެކުގަ އެވެ.
ކޮވިޑްގެ އާ ވެރިއަންޓް ރާއްޖޭން ފެނުނީ މިދިޔަ މަހުގެ 27 ވަނަ ދުވަހު އެވެ. އޭގެ ފަހުން ކޭސްތައް އިތުރުވަމުން އަންނައިރު ޓެސްޓުކުރާ އަދަދު ވެސް އަންނަނީ އިތުރުވަމުންނެވެ. އެކަމަކު މިއަދަކީ އެންމެ ގިނައިން ޓެސްޓްކުރި ދުވަހެވެ. އޮމިކްރޮން ފެނުނު ފަހުން އެއް ދުވަހަކު 7،000 އަށް ވުރެ ގިނައިން ޓެސްޓުކޮށްފައި ވަނީ އެންމެ ހަތް ދުވަހު އެވެ. އެންމެ ގިނައިން ވެސް ޓެސްޓްކޮށްފައި ވަނީ މީގެ އެއް ދުވަސް ކުރިން، 7،536 އެވެ. އެ ދުވަހު 2،484 މީހުން ޕޮޒިޓިވް ވެފައިވެ އެވެ. އެއީ 32 ޕަސެންޓެވެ.
އޮމިކްރޮން ވެރިއަންޓްގެ ވައިރަސް ފަސޭހައިން ފެތުރުނަސް ބަލީގައި ހާލު ދެރަވާ މީހުންގެ އަދަދު ކުރިއާ އަޅާބަލާއިރު ވަރަށް މަދެވެ. އެއީ ކުރިން ކޮވިޑް ޖެހިފައިވާ މީހުންނާއި ކޮވިޑުން ދިފާއުވާން ވެކްސިން ޖަހާފައިވާ މީހުންނަށް ބަލި ޖެހޭތީ ފެންނަ ތަފާތަކަށް ވެދާނެ ކަމަށާއި މި ވެރިއަންޓާ މެދު ވެސް ފަރުވާ ކުޑަކޮށްގެން ނުވާނެ ކަމަށް ތަޖުރިބާކާރުން ވިދާޅުވެ އެވެ.
ކޮވިޑް އިތުރުވަމުން އަންނަ އިރު ރާއްޖެއިން މިހާރު ވަނީ ވެކްސިންގެ ދެ ޑޯޒަށް ފަހު ބޫސްޓަ ޑޯޒް ޖެހުމުގެ ފުރުސަތު ވެސް ހުޅުވާލައިފަ އެވެ. މިހާތަނަށް 369،000 އަށް ވުރެ ގިނަ މީހުން ކޮވިޑްގެ ދެވަނަ ޑޯޒް ފުރިހަމަ ކޮށްފައިވާ އިރު ބައި ލައްކަ އަށް ވުރެ ގިނަ މީހުން ވަނީ ބޫސްޓަ ޑޯޒް ވެސް ޖަހައިފަ އެވެ.