02 މާޗް 2022 - 12:37
ހދ. ކުޅުދުއްފުށީގެ ޕަވާ ހައުސްގެ އިންޖީނެއްގައި އަލިފާން ރޯވެ، ކަރަންޓުގެ ހިދުމަތަށް މިއަދު ބުރޫ އަރައިފި އެވެ.
މޭޔަރު މުހައްމަދު އާތިފް "މިހާރު" އަށް ވިދާޅުވީ މިއަދު ހެނދުނު ރޯވީ ޕަވާ ހައުސްގައި ހުރި 1.2 މެގަވޯލްޓުގެ އިންޖީނެއްގައި ކަމަށާއި އެ ތަނުގައި ހުރި އެހެން އިންޖީނަކަށް ނުވަތަ ޕަވާ ހައުސްއަކަށް އެއްވެސް ގެއްލުމެއް ނުލިބޭ ކަމަށެވެ.
އެ ގަޑީގައި މުޅި ރަށުން ކަރަންޓް ދިޔަ ނަމަވެސް އެހެން ޖެނަރޭޓަރުތައް ބޭނުން ކޮށްގެން 45 ވަރަކަށް މިނިޓް ފަހުން އަލުން ކަރަންޓް ދޭން ފެށި ކަމަށް އާތިފް ވިދާޅުވި އެވެ. އެކަމަކު، ލޯޑު ބޮޑުވާ ވަގުތުތަކުގައި ބައެއް ސަރަހައްދުތަކުން އަދިވެސް ކަރަންޓު ކެނޑިދާނެ ކަމަށް އޭނާ ވިދާޅުވި އެވެ.
"އަޅުގަނޑު އިލްތިމާސް ކުރަން މި މައްސަލަ ހައްލު ކުރެވެންދެން ކަރަންޓު ބޭނުންކުރާ ނިސްބަތް މަދު ކުރުން،" އާތިފް ވިދާޅުވި އެވެ.
އޭނާ ވިދާޅުވިގޮތުގައި ރޯވި އިންޖީނު މަރާމާތު ކުރުމުގެ މަސައްކަތް އަދިވެސް ނުފަށަ އެވެ. އެއީ އަލިފާނުގެ ހާދިސާއާ ގުޅިގެން އަދިވެސް އިންޖީނު ވަރަށް ބޮޑަށް ހޫނުވެފައިވާތީ ކަމަށް ވިދާޅުވި އެވެ.
އާތިފް ވިދާޅުވީ، ލިބިފައި ވަނީ ކިހާ ވަރެއްގެ ގެއްލުމެއް ކަން އެނގޭނީ އެ އިންޖީނު ރޫޅުމުން ކަމަށާއި ބޮޑު ގެއްލުމެއް ނުވެ ސްޕެއާއެއް ބަދަލު ކުރަން ޖެހޭ ނަމަ އަވަހަށް މައްސަލަ ހައްލު ކުރެވޭނެ ކަމަށް އޭނާ ވިދާޅުވި އެވެ.
"މިހާރު ރަށުގައި އެވޭލަބަލް ސްޕެއާއެއް ބަދަލު ކޮށްލަން ޖެހޭ ނަމަ ގިނަ އިރެއް ނުވާނެ. މާލެ ތަނަކުން ސްޕެއާ ގަނެ ބޮޑު މަރާމާތު ކުރަން ޖެހިއްޖެ ނަމަ ވަގުތު ނަގާނެ މައްސަލަ ހައްލު ކުރަން،" އޭނާ ވިދާޅުވި އެވެ.
އާބާދީގައި 10،200 އަށް ވުރެ ގިނަ މީހުން ދިރިއުޅެމުން އަންނަ ކުޅުދުއްފުށީ ޕަވާ ހައުސްގައި އާ އިންޖީނެއް އިންސްޓޯލް ކުރުމުގެ މަސައްކަތް ވެސް ފެނަކަ ކުންފުނިން ވަނީ ފަށައިފަ އެވެ. މި ހާދިސާ އާ ބެހޭ ގޮތުން އެ ކުންފުނީގެ ބަހެއް އަދި ނުލިބެ އެވެ.