06 މާޗް 2022 - 10:48
ގދ. ނަޑެއްލާގެ ގެއަކަށް މިދިޔަ މަހު ދެ ލައްކަ ރުފިޔާގެ ކަރަންޓު ބިލެއް އޮޅިގެން ފޮނުވުނު މައްސަލައެއް ފެންމަތިވެއްޖެ އެވެ.
އެ ރަށު ފެހި ވިލެޖް ގެއަށް ފޮނުވި މިދިޔަ ފެބްރުއަރީ މަހުގެ ކަރަންޓް ބިލްގެ ފޮޓޯއެއް ސޯޝަލް މީޑިއާގައި ދައުރުވަމުން ދާއިރު، އެ ބިލްގައިވާ ގޮތުން އެ ގޭގެ ކަރަންޓް ބިލަށް އެ މަހު އެކަނިވެސް ވަނީ 243،016ރ. އަރައިފަ އެވެ.
ނަޑެއްލާ ފެނަކަ އޮފީހުން "މިހާރު" އަށް ބުނީ، ފެހި ވިލެޖްގޭގެ ބިލަށް އެހާ ބޮޑު އަދަދެއް އެރި ކަމަށް ދެއްކީ އެ ގޭގައި ހަރުކޮށްފައި ހުރި ދެ މީޓަރުގެ ރީޑިން އޮޅިގެން ކަމަށެވެ.
"އެ ގެއަކީ ދެ މީޓަރު ހަރުކޮށްފައި އިންނަ ގެއެއް. ބިލް ޕްރިންޓް ކުރަން ދިޔަ މީހުންނަށް ހުރީ ދެ މީޓަރުގެ ރީޑިން އޮޅިފައި،" ނަޑެއްލާ ފެނަކަ އޮފީހުން ބުންޏެވެ.
އެ ގޭގެ މީހުން އެ މައްސަލަ ފެންމަތިކުރުމާއެކު، 30 މިނެޓްގެ ތެރޭގައި އެކަން ހައްލުކޮށްފައިވާ ކަމަށް ވެސް ފެނަކަ އޮފީހުން ބުނެ އެވެ.
ފެހި ވިލެޖްގޭގެ ބިލަށް 1،000ރ. ވެސް ނާރާ ކަމަށާއި އެ ދުވަހުން އެ ދުވަހަށް އަލުން ބިލް ފޮނުވުމުން އެ މީހުން ބިލް ދައްކާފައިވާ ކަމަށް އެ އޮފީހުން ބުންޏެވެ.