13 މާޗް 2022 - 23:09
ހިޔާ މަޝްރޫއުގެ ދަށުން ހުޅުމާލޭ ދެވަނަ ފޭސްގައި އިމާރާތްކޮށްފައިވާ ޓަވަރެއްގެ ކޮމާޝަލް ޔުނިޓެއްގެ ތަނބެއް ތަޅާލަނިކޮށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެކަން ހުއްޓުވައިފި އެވެ.
ސޯޝަލް މީޑިއާގައި އާންމުވެފައިވާ ފޮޓޯއަކުން ފެންނަނީ ވިޔަފާރީގެ ބޭނުމަށް ދޫކޮށްފައިވާ ޔުނިޓެއްގެ މަސައްކަތްކުރާ ބަޔަކު އެތަނުގެ ތަނބު ތަޅާލަމުންދާ މަންޒަރެވެ. ފޮޓޯ އާންމުކުރިއިރު ވެސް ތަނބުގެ ބޮޑު ބައެއް އޮތީ ތަޅާލައިފަ އެވެ.
ހުޅުމާލޭ ބަލަހައްޓަމުން އަންނަ ކުންފުނި، އެޗްޑީސީ ޓެގްކޮށް އެ ފޮޓޯ އާންމުކުރި މީހާ ވަނީ އެކަމުގެ ނުުރުހުން ފާޅުކޮށްފަ އެވެ. އަދި އެކަހަަލަ މަސައްކަތްތައް ބަލަހައްޓަނީ ކޮން ބައެއްތޯ ސުވާލު އުފެއްދި އެވެ.
އެ ޓްވީޓަށް ޖަވާބު ދެމުން އެޗްޑީސީން ބުނީ އެކަން ސަމާލުކަމަށް އައުމާ އެކު އެ މީހުންގެ މަސައްކަތް ވަގުތުން ހުއްޓުވާފައިވާ ކަމަށެވެ.
"އެޗްޑީސީގެ ޓީމުން ވީއެންމެ އަވަހަކަށް މި މައްސަލަ ތަހުގީގުކުރާނެ. މިކަން ސަމާލުކަމަށް ގެނެސްދީ ހުޅުމާލޭގެ ރައްކާތެރިކަން ކަށަވަރުކުރަން ކުރާ މަސައްކަތަށް އެހީވުމުން ޝުކުރުވެރިވަން،" އެޗްޑީސީން ކުރި ޓްވީޓުގައި ބުންޏެވެ.
ފްލެޓްތަކުގެ މަސައްކަތް ކުރަމުން އަންނައިރު އެއްވެސް ކަހަލަ ބެލުމެއް ނެތި ބައެއް މީހުން ފްލެޓްގެ މަސައްކަތް ކުރަމުންދާ ކަމުގެ އަޑު ކުރިން ވެސް އެރި އެވެ. އެކަމަކު އެތަންތަން އިންސްޕެކްޓް ނުކުރާ ކަމަށް ބުނެ ބައެއް މީހުން ކަންބޮޑުވުން ފާޅުކުރި އެވެ.
ކޮމާޝަލް ޔުނިޓްތަކުން ވެސް އެއްވެސް ކަހަލަ ބެލުމެއް ނެތި އެ ޔުނިޓްތަކުގެ ބެރިތައް ތަޅައި ފާރުކަނޑަމުން ގެންދާ ނަމަ އެ ފަދަ އުސް އިމާރާތްތަކަށް ދިގު މުއްދަތަށް ވިސްނާއިރު ބޮޑެތި ގެއްލުންތައް ވެދާނެކަމުގެ ބިރުބޮޑު ކަމަށް ތަޖްރިބާކާރުން ބުނެ އެވެ.
އެކަމަކު މީގެ ކުރިން ފެންމަތިވި މައްސަލަތަކާ އެކު އެޗްޑީސީން ބުނީ އެ ޔުނިޓްތަކުގެ މަސައްކަތް ކުރަނީ އިންޖިނޭރުންނާ މަޝްވަރާކުރުމަށް ފަހު އެ މީހުން އަންގާފައިވާ ގޮތަށް ކަމަށެވެ.
ފްލެޓްތަކުގެ ފިނިޝިންގެ އުސޫލުގައިވާ ގޮތުން ހިޔާ ފްލެޓްގެ ސްޓްރަކްޗާއަަށް އެއްވެސް ބަދަލެއް ގެނައުމަކީ މަނާ ކަމެކެވެ. ފްލެޓްގެ އެތެރޭގައި ޕާޓިޝަނެއް ހަރުކުރާ ނަމަ، އިމާރާތުގެ އެތެރޭގެ ވައި ދައުރުވުމަށް ހުރަސް ނޭޅޭ ގޮތަށް އަދި ޓަވަރަށް ލޯޑް ބޮޑުނުވާނެ ގޮތަށް އެކަން ކުރެވިދާނެ ކަމަށް ވެސް އުސޫލުގައިވެ އެވެ. ކޮންކްރީޓް ޝީޓަށް އިސްކޫރެއް ނުވަތަ އެ ޒާތުގެ އެއްވެސް އެއްޗެއް ޖަހާ ނަމަ އެތެރެއަށް އެއް އިންޗިއަށް ވުރެ ފުންކޮށް ތޮރުފުން މަނަލެވެ.
އެ އުސޫލާ ހިލާފުވި ބައެއް މީހުން މީގެ ކުރިން 10،000ރ. އިން ޖޫރިމަނާކޮށްފައިވެ އެވެ.