16 އެޕްރީލް 2022 - 13:41
ތިލަމާލެ ބްރިޖުގެ މަސައްކަތަށް ވިލިމާލޭގެ ހުޅަނގު ދެކުނު ފަރާތުގެ ފަޅު ހުސްކުރަން ސިޓީ ކައުންސިލުން އަންގައިފި އެވެ.
އެ ކައުންސިލުން މިދިޔަ ބުރާސްފަތި ދުވަހު ކުރި އިއުލާނުގައި ބުނީ ބްރިޖުގެ މަސައްކަތަށް ވިލިނގިލީގެ ފަޅުތެރެ އާއި އެއްގަމުން ހާއްސަކޮށްފައިވާ ސަރަހައްދު ވަކިކުރަން ފެންސް ޖެހުމުގެ މަސައްކަތް ފަށާފައިވާ ކަމަށެވެ. އެހެންވެ، އެ އުޅަނދުތައް ބަދަލުކުރުމަށް ކަނޑައަޅާފައިވާ ސަރަހައްދަށް އަންނަ އަންގާރަ ދުވަހުގެ އިރުއޮއްސި 6 ގެ ކުރިން ބަދަލުކުރުމަށް އެދިފައިވެ އެވެ.
އެ މުއްދަތުގެ ތެރޭގައި ނުނަގާ ހުންނަ އުޅަނދުތައް ކައުންސިލުން ނަގައި އެ ބެހެއްޓުމަށް ކަނޑައަޅާފައިވާ ސަރަހައްދަށް ބަދަލުކުރާނެ ކަމަށާއި އެ ބަދަލުކުރުމުގެ ތެރޭގައި އުޅަނދަށް ލިބޭ ގެއްލުމަށް ޒިންމާ ނުވާނެކަމަށް ވެސް ކައުންސިލްގެ އިއުލާނުގައިވެ އެވެ.
މާލެ، ވިލިމާލެ، ތިލަފުށި އަދި ގުޅިފަޅު ގުޅައިގެން ހަދާ "ތިލަމާލެ ބްރިޖު" ގެ ސާވޭގެ މަސައްކަތް ވަނީ ފަށައިފަ އެވެ. އަދި އެކަމަށް، އިންޑަސްޓްރިއަލް ވިލެޖުގެ ބިމެއް ހާއްސަކޮށްފައިވެ އެވެ.
އިންޑިއާގެ އެގްޒިމް ބޭންކުގެ ލޯނަކާއި އެ ގައުމުން ދޭ އެހީއެއް އެއްކޮށްލައިގެން ހަރަދުކުރާ ގޮތަށް ހިންގަން ނިންމާފައިވާ ތިލަމާލެ ބްރިޖުގެ މަސައްކަތް އިންޑިއާގެ އެފްކޮންސްއާ ހަވާލުކޮށް، އެއްބަސްވުމުގައި ސޮއިކުރީ މިދިޔަ އަހަރު އޮގަސްޓް މަހު 26 ގަ އެވެ.
މި މަޝްރޫއުގެ ދަށުން ގްރޭޓާ މާލެ ސަރަހައްދު ގުޅައިލުމަށް 6.7 ކިލޯމީޓަރުގެ ބްރިޖެއް އަޅާނެ އެވެ. އެއީ 500 މިލިއަން ޑޮލަރު (7.7 ބިލިއަން ރުފިޔާ) ގެ މަޝްރޫއެކެވެ. އެއީ ލައިން އޮފް ކްރެޑިޓްގެ ދަށުން ދޭ 400 މިލިއަން ޑޮލަރާއި އިންޑިއާގެ ސަރުކާރުން ހިލޭ އެހީގެ ގޮތުގައި ލިބޭ 100 މިލިއަން ޑޮލަރެވެ.