12 މެއި 2022 - 11:03
އިދިކޮޅު ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމިން ހައްޔަރުކުރަން ގޮވާލައި ޕީޕީއެމްގެ އޮޮފީސް ދޮރަށާއި ގެކޮޅުގެ ފާރަށް ބަޔަކު ރޭ ސްޕްރޭ ޖަހައިފި އެވެ.
ޔާމިން ހައްޔަރުކުރަން ގޮވާލައި ހ. ދޫވެހި ގޭގެ ދޮރަށާއި ގަރާޖު ގޭޓަށް ކަޅުކުލައިގެ ސްޕްރޭކޮށްފައި ވަނީ ރޭގެ މެންދަމުގެ ވަގުތެއްގަ އެވެ. އަދި ޕީޕީއެމްގެ އޮފީހަށާއި އެ އޮފީހުގައި ހަރުކޮށްފައިވާ ޕޯސްޓަރަކަށް ވެސް ސްޕްރޭކޮށްފައި ވެ އެވެ.
ރައީސް ޔާމިންގެ ފޮޓޯ ހިމެނޭ ކުރެހުންތައް އެ ތަންތަނަށް ސްޕްރޭކޮށްފައިވާއިރު އެ އިމާރާތްތަކުގެ މަގުމައްޗަށް، ޔާމީނަށް ''ވަގަށް ގޮވާފައިވާ'' ކަރުދާސްތަކަކާއި އެ މަނިކުފާނު ހައްޔަރު ކުރުމަށް ގޮވާލާފައިވާ ކަރުދާސްތަކެއް ވެސް ހުރީ އަޅައިފަ އެވެ.
ޕީޕީއެމްގެ ސެކްރެޓަރީ ޖެނެރަލް މުހަންމަދު ތޮލާލް ''މިހާރު'' އަށް ވިދާޅުވީ ރައީސް ޔާމިންގެ ގެއަށާއި ޕީޕީއެމް އޮފީހަށް ސްޕްރޭކުރި މައްސަލަ ފުލުހަށް ހުށަހެޅުމަށް ތައްޔާރުވަމުންދާ ކަމަށެވެ.
"އެކަން އެބަ ކުރިއަށްދޭ، އަޅުގަނޑުމެންގެ ލީޑާޝިޕުން [އެކަމަށް] މަޝްވަރާކުރަނީ. ފުލުހަށް ހުށަހަޅާނަން. އެބަހުރި އެވިޑެންސްތައް ވެސް. އަޅުގަނޑުމެންގެ ކެމެރާތަކުގައި ވެސް ޕޮލިސް ކެމެރާތަކުގައި ވެސް ހުންނާނެ ދެއްތޯ،" ތޮލާލް ވިދާޅުވި އެވެ.
ތޮލާލް ވިދާޅުވީ އެކަން ކުރި ބަޔަކު ފުލުހުންނަށް ހޯދެން ޖެހޭނެ ކަމަށެވެ.
މި މައްސަލައާ ގުޅިގެން ފުލުހުންގެ ބަހެއް އަދި ނުލިބެ އެވެ.
ޔާމީން ހައްޔަރުކުރަން ގޮވާލައި، ދާދި ފަހުން ވެސް ބަޔަކު ވަނީ އެމަނިކުފާނުގެ ގޭ ކުރިމަތީގައި މުޒާހަރާ ކޮށްފަ އެވެ.