15 މެއި 2022 - 14:05
ޔޫކްރޭންގެ ދެ ވަނަ އަށް އެންމެ ބޮޑު ސަހަރު ކަމަށްވާ ޚަރްކީވްގެ ވަށައިގެންވާ ސަރަހައްދުގައި ތިބެ، ހަފުތާތަކެއް ވަންދެން ހަމަލާ ދިނުމަށް ފަހު، ރަޝިޔާ ސިފައިން އެ ސަރަހައްދު ދޫކޮށް ދާން ފަށާފައިވާ ކަމަށް ޔޫކްރޭން ސަރުކާރުން ބުނެފި އެވެ.
ޔޫކްރޭންގެ ދިފާއީ ވަޒީރު އޮލެކްސީ ރެޒްނިކޯވް ވިދާޅުވި ގޮތުގައި ޚަރްކީވްގެ ރަށް ބޭރުގައި ތިބި ރަޝިޔާ ސިފައިން މިދިޔަ ދެތިން ހަފުތާގެ ތެރޭގައި އެ ސަހަރަށް ވަރަށް ވަރުގަދަ ހަމަލާތަކެއް ދިނެވެ. ވައިގެ މަގުން ބޮން އެޅުމުގެ އިތުރުން އެއްގަމު މަގުން ބޮޑުބަޑިން ވެސް ވަރުގަދަ ހަމަލާތަކެއް ދިނުމަށް ފަހު، މިހާރު ރަޝިޔާ ސިފައިން ވަނީ އެ ސަހަރާ ވަރަށް ދުރަށް ގޮސްފަ އެވެ.
ޚަރްކީވްގެ މޭޔަރު ވިދާޅުވި ގޮތުގައި އެ ސަހަރުގެ ރަށް ބޭރުގައި ތިބި ރަޝިޔާ ސިފައިން ބަރު ހަތިޔާރުތަކާ އެކު އެ ސަހަރު ދޫކޮށް ދިއުމުން، ރަށުތެރެ މިހާރު އޮތީ ވަރަށް ހަމަހިމޭންކޮށެވެ. މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށީއްސުރެ، ޚަރްކީވް އޮތީ ޔޫކްރޭން ސިފައިންގެ ފުރިހަމަ ބާރުގެ ދަށުގަ އެވެ.
ރަޝިޔާ ސިފައިން ދޭތެރެ ދޭތެރެ އިން ޚަރްކީވް އަށް ހަމަލާތައް ދިން ނަމަވެސް، ރަޝިޔާ ސިފައިންގެ ހަމަލާތައް ވަރުގަދަވެގެން ދިޔައީ މިދިޔަ ދެތިން ހަފުތާގެ ތެރޭގަ އެވެ. ހަނގުރާމަ ފެށިތާ ދެ މަހަށް ވުރެ ގިނަ ދުވަސް ވެގެން ދިޔައިރު ވެސް، ޔޫކްރޭންގެ ވެރިރަށް ކިޔޭވް ހިފުމުގައި ކާމިޔާބު ނުލިބުމުން، ރަޝިޔާ ސިފައިން ވަނީ ކިޔޭވް ދޫކޮށްލައި، ޔޫކްރޭންގެ އިރުމަތީ ސަރަހައްދަށް ދޭ ހަމަލާތައް ވަރުގަދަ ކޮށްފަ އެވެ.
ޚަރްކީވް އަކީ ޔޫކްރޭންގެ އިރުމަތީ ދޮންބާސް ސަރަހައްދާއި ވެރިރަށް ކިޔޭވްއާ ދެމެދުގައި އޮންނަ ސަހަރަކަށް ވުމުން، ރަޝިޔާ ސިފައިން އެ ސަހަރުގެ ކައިރީގައި ހަމަލާތައް ވަރުގަދަކުރީ، ކިޔޭވް އިން އިރުމަތީ ސަރަހައްދަށް، ޔޫކްރޭން ސަރުކާރުގެ އަސްކަރީ މަދަދު ފޯރުކޮށްދިނުމަށް ހުރަސް އެޅުމުގެ ގޮތުން ކަމަށް ބެލެވެ އެވެ.
ޔޫކްރޭންގެ އިރުމަތީގައި އޮންނަ، ވަކިވެގަތުމަށް މަސައްކަތް ކުރާ ދޮންބާސް ސަރަހައްދަށް ދޭ ހަމަލާތައް ވަރުގަދަ ކުރުމުގެ އިތުރުން، ޔޫކްރޭންގެ ހުޅަނގު ސަރަހައްދަށް ވެސް، ރަޝިޔާ ސިފައިން އިއްޔެ ވަނީ މިސައިލް ހަމަލާތަކެއް ދީފަ އެވެ. އިއްޔެގެ މެންދުރު ކުރީގެ ވަގުތުތަކުގައި ރަޝިޔާ ސިފައިން މިސައިލް ހަމަލާތަކެއް ދިނީ، ޔޫކްރޭންގެ ހުޅަނގުގައި އޮންނަ ލެވީވް ސަރަހައްދަށެވެ.
ލެވީވް އަކީ ޔުކްރޭނާއި ޕޮލެންޑް ގުޅޭ ސަރަހައްދީ ރޮނގާ ވަރަށް ކައިރީގައި އޮންނަ ސަރަހައްދެކެވެ. ރަޝިޔާ ސިފައިން އެ ސަރަހައްދަށް ހަމަލާ ދެމުން އަންނަނީ، އެމެރިކާ އާއި ވިލާތުގެ ގައުމުތަކުން، ޕޮލެންޑް މެދުވެރިކޮށް ޔޫކްރޭނަށް ފޮނުވާ ހަތިޔާރުތައް، ޔޫކްރޭނަށް އެތެރެ ކުރުމަށް ހުރަސް އެޅުމުގެ ގޮތުންނެވެ.