14 ޖޫން 2022 - 06:45
ސްރީ ލަންކާގައި ޑިޖިޓަލް އައިޑީ ސިސްޓަމެއް ގާއިމުކުރުމަށް އިންޑިއާ އިން ދޭ ހިލޭ އެހީގެ ދަށުން އެ މަސައްކަތަށް ޝައުގުވެރިވާ އިންޑިއާ ކުންފުނިތައް ހޯދަން ބިޑަށް ހުޅުވާލަން ތައްޔާރުވެއްޖެ އެވެ.
ސްރީ ލަންކާގެ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ އެޖެންސީ (އައިސީޓީއޭ) އިން ނިންމާފައިވަނީ ލަންކާގެ ބޮޑެތި މީހުންގެ އާބާދީގައި ހިމެނޭ އެންމެން އަލުން މި ސިސްޓަމްގައި ރަޖިސްޓްރީކުރާށެވެ. އަލުން ރަޖިސްޓްރީކުރާއިރު މީހުންގެ ބަޔޮމެޓްރިކްސް ވެސް ނަގާނެ އެވެ.
އިންޑިއާގެ 3.9 މިލިއަން ޑޮލަރުގެ ހިލޭ އެހީގައި ހަދާ މި ސިސްޓަމަކީ އިންޑިއާގައި ބޭނުންކުރާ، ދުނިޔޭގެ އެންމެ ބޮޑު ބަޔޮމެޓްރިކް އައިޑީ ސިސްޓަމް "އާދާރް" އާ އެއްގޮތް ސިސްޓަމަކަށް ވެދާނެ ކަމަށް ބެލެވެ އެވެ.
އައިސީޓީއޭގެ އޮފިޝަލަކާ ހަވާލާދީ ލަންކާގެ ބައެއް ނޫސްތަކުން ބުނެފައިވަނީ ޑިޖިޓަލް އައިޑީ ހަދާއިރު ފިންގަޕްރިންޓާއި މޫނުގެ ސިފަތައް ވެސް ދެނެގަންނާނެ ކަމަށެވެ. އަދި މީގެ ތެރޭގައި ކަޅި ސްކޭން ކުރުން ވެސް ހިމެނިދާނެ ކަމަށް އޮފިޝަލް ވިދާޅުވެފައިވެ އެވެ.
އިންޑިއާއާ އެކު މެއި މަހު ސޮއިކުރި އެމްއޯޔޫގެ ދަށުން، މި ޑިޖިޓަލް އައިޑީ ސިސްޓަމްގެ ބިޑަށް ކުރިމަތިލެވޭނީ ހަމައެކަނި އިންޑިއާގެ ކުންފުނިތަކަށެވެ. މިއީ ޕްރައިވެސީގެ ބޮޑު މައްސަލައެއް ދިމާވެ ގައުމީ ސަލާމަތަށް ނުރައްކަލަކަށް ވެދާނެ ކަމަށް އިދިކޮޅު ބައެއް ފަރާތްތަކުން ވަނީ ކުރިން ވެސް ބުނެފަ އެވެ.
ކަންބޮޑުވުންތަކާ ބެހޭ ގޮތުން އޮފިޝަލް ވިދާޅުވެފައިވަނީ ބޭރު ގައުމުތަކާ އެކު ހަދާ މިފަދަ ކޮންމެ އެމްއޯޔޫއެއްގައި ވެސް އެންމެ އާންމު އެއް ސިފަޔަކީ އެހީ ދޭ ގައުމުގެ ބަޔަކު ލައްވާ މަސައްކަތްކުރުވުން ކަމަށެވެ. ދާދި ފަހުން ފިލިޕިންސްގައި ވެސް ޑިޖިޓަލް އައިޑީ ހަދަން ބަޔަކު ހޯދަން ހުޅުވާލުމުން ބިޑް ކާމިޔާބުކުރީ އިންޑިއާ ކުންފުންޏަކުން ކަމަށާއި އެ ސިސްޓަމްގައި މިހާތަނަށް 50 މިލިއަނަށް ވުރެ ގިނަ މީހުން ރަޖިސްޓްރީކޮށްފި ކަމަށް އައިސީޓީއޭގެ އޮފިޝަލް ވިދާޅުވެފައިވެ އެވެ.
"ކޮންމެ ކުންފުޏަކުން މަސައްކަތް ކުރިޔަސް. ބަލަންވީ މަސައްކަތްކުރާ ބަޔަކަށް ނޫން. ބަލަންވީ އޭގެ ކޮންޓްރޯލް އޮތުމަށް. މަސައްކަތްކޮށްދޭ ފަރާތަށް، ނުސީދާ ގޮތުން ވިޔަސް އެކްސެސްއެއް އެއް ނުދިނުން،" އޮފިޝަލް ވިދާޅުވި އެވެ.