17 ޖޫން 2022 - 21:26
ނ. ލަންދޫ ސުކޫލްގެ 55 އަހަރުގެ ދިގު ތާރީހުގައި އެ ސްކޫލްގެ ދަރިވަރުންތަކެއް ފުރަތަމަ ފަހަރަށް އޯލެވެލްގެ ގަދަ 10 ގައި ހިމެނިއްޖެ އެވެ.
ސްކޫލްގެ ނަތީޖާ ރަނގަޅުކުރަމުން އައިސް 2019 ވަނަ އަހަރުގެ އޯލެވެލް އިމްތިހާނުގައި، 200 އަށް ވުރެ ގިނަ ދަރިވަރުން އުޅޭ މި ސްކޫލުން ވަނީ ހުރިހާ ކުދިން ފާސްވެފަ އެވެ.
އެ ސްކޫލުގެ 2019-2021 ވަނަ އަހަރުގެ އިނާމު ދިނުމުގެ ޖަލްސާ ރޭ ބޭއްވީ އޯލެވެލްގައި ސްކޫލަށް ލިބުނު ކާމިޔާބީ ފާހަގަކުރުމާ އެކުގަ އެވެ.
ލަންދޫ ސުކޫލު ދެ ދަރިވަރަކު ވަނީ އެންމެ ފަހުގެ އޯލެވެލްގެ ގަދަ 10 އިން ޖާގަ ހޯދައިފަ އެވެ. އެއީ މަރިޔަމް އީނާޝް އަލީ އާއި މުހައްމަދު މައިޝަން އެވެ. ގަދަ 10 ގެ 10 ވަނައިގައި އީނާޝް ހިމެނުނުއިރު، މައިޝަން ވަނީ އަށް ވަނައިގައި ހިމެނިފަ އެވެ.
ލަންދޫ ސުކޫލުގެ ޕްރިންސިޕަލް ޔޫސުފް އަބްދުއްރަހްމާން "މިހާރު" އަށް ވިދާޅުވީ، މިދިޔަ އަހަރުތަކުގައި މި ނަތީޖާ ނުލިބި އޮތް ސަބަބެއް އެނގިވަޑައިނުގަންނަވާ ކަމަށާއި އޭނާ މީގެ ތިން އަހަރު ކުރިން ސްކޫލާ ހަވާލުވެ ވަޑައިގަތް ފަހުން ކޮންމެ އަހަރަކު ވެސް އައީ ނަތީޖާ ރަނގަޅުވަމުން ކަމަށެވެ. ނަތީޖާ ރަނގަޅުކުރުމަށް ދަރިވަރުންނާއި ޓީޗަރުން ގުޅިގެން މަސައްކަތްކުރާ ކަމަށް ޕްރިންސިޕަލް ވިދާޅުވި އެވެ.
"ޓީޗަރުންގެ ތެރޭގައި އުޅުނީމާ އެ މީހުންގެ ކަންބޮޑުވުންތައް އެނގުނު. ސްކޫލަކީ އުފާވެރި މާހައުލަކަށް ހެދޭތޯ އަޅުގަނޑު މަސައްކަތް ކުރީ،" ޔޫސުފް ވިދާޅުވި އެވެ.
"ވަރަށް ބޮޑު ކާމިޔާބީއެއް މިއީ. މުޅި ރަށުގެ ރައްޔިތުން ގިނަ އަހަރުތަކެއް ވަންދެން ކުރި އުންމީދެއް މިއީ. ސުކޫލަށް ފަންސާސްފަސް އަހަރު މިވީ. އެހެންވީމަ މިއީ ވަރަށް ބޮޑު އުފަލެއް."
އޭނާ ވިދާޅުވީ މި ކާމިޔާބީ ދެމެހެއްޓުމަކީ ގޮންޖެހުމަކަށް ވާނެ ކަމަށާއި ނަމަވެސް މިހާރު ކީ ސްޓޭޖުގައި ކިޔަވަމުން އަންނަ ދަރިވަރުންނަކީ ވަރަށް އުންމީދީ ދަރިވަރުންތަކެއް ކަމަށެވެ. އަދި އެ ދަރިވަރުން މިއަށްވުރެ ވެސް ރަނގަޅު ނަތީޖާތަކެއް ހޯދާނެ ކަމަށް އުންމީދުކުރައްވާ ކަމަށް ޔޫސުފް ވިދާޅުވި އެވެ.
ރާއްޖޭގައި އެންމެ ފުރަތަމަ މީހުން ވަޒަންވެރިވި ރަށްތަކުގެ ތެރޭގައި ހިމެނޭ ކަމަށް ބެލެވޭ ލަންދޫގައި އެންމެ ފުރަތަމަ ސްކޫލް ހުޅުވީ މަކްތަބުއްސަގާފާގެ ނަމުގައި 1967 ވަނަ އަހަރު އެވެ. ޖެހިގެން އައި އަހަރު މަކްތަބުއްނަޖާހްގެ ނަމަަށް ނަން ބަދަލުވި އެވެ. އޭގެ އަށް އަހަރު ފަހުން ލަންދޫ މަކްތަބުގެ ނަމަށް ބަދަލުވި އެވެ. އަދި މިހާރު ހިންގަމުން އަންނަ ލަންދޫ ސްކޫލު އެ ނަމުގައި ޒަމާނީ ތައުލީމާ އެކު ހުޅުވުނީ 1989 ވަނަ އަހަރު އެވެ.