19 ޖޫން 2022 - 14:04
މިސްކިތްތަކުގެ ދަފްތަރުން އުނިކޮށްފައިވާ ފ. ދަރަނބޫދޫގެ ކުރީގެ މިސްކިތް އިމާރާތުގައި މީހުން ދިރިއުޅެން ކުއްޔަށް ދޫނުކުރަން އެ ކައުންސިލުން މިއަދު ނިންމައިފި އެވެ.
އެ ކައުންސިލްގެ ކުއްލި ނިންމުން މި އައީ އެ އިމާރާތުގައި ބިދޭސީން ނިދައި، ކައިބޮއެ ހަދާ ވީޑިއޯއެއް ސޯޝަލް މީޑިއާގައި އިއްޔެ އާންމުވެ ބޮޑެތި ފާޑުކިޔުންތައް އަމާޒުވުމުންނެވެ.
ގަބުރުމަތީގައި އަޅާފައި ހުރި މިސްކިތެއް ކަމަށް ބެލެވޭތީ ދަރަނބޫދޫގެ "ދާރުލްއުލޫމް" މިސްކިތުގައި 2017 ވަނަ އަހަރުން ފެށިގެން ނަމާދުކުރުން ހުއްޓާލައި، މިސްކިތްތަކުގެ ދަފްތަރުން ވެސް ވަނީ އުނިކޮށްފަ އެވެ.
މާލޭގެ މޭޔަރު ޑރ. މުހައްމަދު މުއިއްޒު ޓުވީޓް ކުރެއްވި ވީޑިއޯއަކުން ފެންނަނީ މިސްކިތުގެ ނަމާދުކުރާ ބައިގައި ބިދޭސީން ގޮދަޑި އަޅައިގެން ތިބި ތަނެވެ. މިސްކިތުގެ ފެންޑާ ތެރެ އާއި ގޯތި ތެރޭގައި ރޯނު ދަމައިގެން އަންނައުނު ހިއްކަން އަޅާފައި ހުރިއިރު، ތުވާލި އަނދެގެން ބައެއް ބިދޭސީން އުޅޭ މަންޒަރު ވެސް ފެނެ އެވެ.
އެކަން ކުށްވެރިކޮށް ކައުންސިލުން މިއަދު ނެރުނު ބަޔާނެއްގައި ބުނީ މިސްކިތްތަކުގެ ދަފްތަރުން އެ ތަން އުނިކުރުމަށް ފަހު، އެ އިމާރާތް އެކި ކަންކަމަށް ބޭނުންކޮށްފައިވާ ކަމަށެވެ. މެއި، 2020 ވަނަ އަހަރުން ފެށިގެން އެ އިމާރާތް ކުއްޔަށް ދޫކުރަމުންދާ ކަމަށް ވެސް ކައުންސިލުން ބުންޏެވެ.
މީގެ ކުރިން އެ އިމާރާތް، 10،000ރ. އަށް ކުއްޔަށް ހިފީ ރަށުގެ ބަނދަރު ހެދުމުގެ މަސައްކަތް ކުރި އެމްޓީސީސީންނެވެ. އެ ކުންފުނީގެ މުވައްޒަފުން ދެ އަހަރު ވަންދެން ތިބުމަށް ފަހު، އެ ތަނުން ދިޔައީ މީގެ ދޮޅުމަސް ކުރިން ކަމަށް ކައުންސިލުން ބުންޏެވެ.
މިހާރު އެ އިމާރާތުގައި ތިބީ ފެނާއި ނަރުދަމާގެ މަސައްކަތްކުރާ އިންޑިއާގެ އެސްއެމްސީ އިންފްރަސްޓްރަކްޗާ ކުންފުނީގެ 15 ވަރަކަށް މުވައްޒަފުންނެވެ.
"މި އިމާރާތް އެއްވެސް ބަޔަކަށް ދޫކުރުމަށް އެދި ދިވެހި ސަރުކާރުގެ އެއްވެސް އިދާރާއަކުން މި ކައުންސިލްގައި އެދިފައިނުވާ ކަމުގައި ވެސް ދަންނަވަމެވެ،" ބަޔާނުގައި ވެ އެވެ.
"ކައުންސިލުން މިހާރު ނިންމާފައިވަނީ މި އިމާރާތުގައި މީހުން ދިރިއުޅުމަށް ކުއްޔަށް ދޫކުރަމުން އައި އައުން ނިމުމަކަށް ގެނެސް ކުރިއަށް އޮތްތާގައި މިފަދަ ބޭނުންތަކަށް ދޫނުކުރުމަށެވެ."
ނަމާދުކުރުން ހުއްޓާލައި އެ އިމާރާތުގައި ގުރުއާން ކްލާހެއް ހިންގަން ވެސް ކައުންސިލުން އުޅުނެވެ. އެކަމަކު، އެ އަތޮޅު ނިލަންދޫން މީހަކު ގެންގޮސްގެން ވެސް ދެމެހެއްޓެނިވި ގޮތެއްގައި އެކަން ގެންދެވޭ ގޮތެއް ނުވުމުން، އެކި ބޭނުންތަކަށް ބާ މިސްކިތުގެ އިމާރާތް ބޭނުންކުރަން އެވެ.
ކައުންސިލުން ބުނީ މިސްކިތެއްގައި ބިދޭސީން ދިރިއުޅޭ ކަމަށް ބުނެ ދައުރުކުރަމުންދާ ވީޑިއޯއަކީ ވަކި ސިޔާސީ މަގުސަދެއް ހާސިލްކުރުމަށް ހަގީގަތް އޮޅުވާލާފައިވާ އަދި ސަރުކާރާއި ދަރަނބޫދޫ ކައުންސިލް ބަދުނާމުކުރުމަށް ރާވައިގެން ހިންގާފައިވާ އަމަލެއް ކަމަށެވެ.