05 ޖުލައި 2022 - 21:18
ޖީއެސްޓީ އާއި ޓީޖީއެސްޓީ އަންނަ އަހަރު ބޮޑު ކުރަން ސަރުކާރުން ނިންމާފައި ވަނީ އެމްޑީޕީ އާއި ރައްޔިތުންގެ މަޖިލީހުގެ އެ ޕާޓީގެ މެމްބަރުންނާ ވެސް މަޝްވަރާ ނުކޮށް ކަަމަށް ވިދާޅުވެ ޓެކްސް ބޮޑުކުރުމާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެކޮޅު ހައްދަވައިފި އެވެ.
ނަޝީދު ވިދާޅުވީ ސަރުކާރުގެ އިގްތިސާދީ ހިސާބުތައް ދިމާނުވާ ކަމަށެވެ. އެމަނިކުފާނަށް، އެ ޖަހާ ހިސާބުތަކެއް ބަލައެއް ވެސް ނުގަނެވޭ ކަމަށް ވިދާޅުވި އެވެ.
އަންނަ އަހަރުން ފެށިގެން ޓެކްސް ބޮޑުކުރާނެ ކަން އިއުލާންކުރެއްވައި ފިނޭންސް މިނިސްޓަރު އިބްރާހިމް އަމީރު ވިދާޅުވީ ޖީއެސްޓީ ބޮޑުކުރަން ނިންމާފައި ވަނީ ހަ ޕަސެންޓުން އަށް ޕަސެންޓަށެވެ. އަދި ޓީޖީއެސްޓީ 12 ޕަސެންޓުން 16 ޕަސެންޓަށް ބޮޑުކުރުމާ އެކު ތަކެތީގެ އަގު އުފުލުމުގެ ފުރުސަތު އެބައޮތް ކަމަށް ވެސް އޭނާ ވިދާޅުވި އެވެ.
އިންފްލޭޝަން އެއް ޕަސެންޓަށް މައްޗަށް ޖެހޭނެ ކަމަށް އަމީރު ވިދާޅުވުމާ އެކު ނަޝީދު އެމްޑީޕީގެ ރަސްމީ ގްރޫޕްތަކަށް ފޮނުއްވި މެސެޖެއްގައި ވަނީ އެ ނިންމުމާ މެދު ނުރުހުންފާޅުކުރައްވައިފަ އެވެ. އެންމެ ބޮޑަށް ފާޑުކިއުން އަމާޒުކުރެއްވީ އެފަދަ ނިންމުމެއް ނިންމިއިރު އެމްޑީޕީގެ ރައީސްގެ ހައިސިއްޔަތުން އެމަނިކުފާނަށް އެކަން އަންގަވާފައި ވެސް ނުވުމެވެ.
ނަޝީދު ވިދާޅުވީ ޓެކްސް ބޮޑުނުކޮށް އިގްތިސާދީ ހާލަތު ރަނގަޅު ކުރެވެން އެބައޮތް ކަަމަށެވެ. އެމަނިކުފާނު އެއް ކަމަކަށް ތަކުރާރު ކުރެއްވީ ދަރަނި ރީސްޓްރަކްޗާ ކުރުމެވެ. އެއާއެކު، ހަރަދުކުޑަކޮށްފި ނަމަ ސަރުކާރުން ޓެކްސް ބޮޑުކުރަން ނުޖެހޭނެ ކަމަށް ވިދާޅުވި އެވެ.
"އަޅުގަނޑުމެންނާ އެއްވެސް މަޝްވަރާއެއް ނުކޮށް ޓެކްސް ބޮޑުކުރަން ނިންމީ. އަޅުގަނޑަކީ އެމްޑީޕީގެ ރައީސް އަދި އެމްޑީޕީގެ އެމްޕީއެއް. އަޅުގަނޑަށް ސަރުކާރުން ޖައްސަވާ ހިސާބު ބަލައެއް ނުގަނެވޭ، ދިމައެއް ނުވޭ،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި އެކަން އެގޮތަށް ދިމާވަނީ އެކަންކަން ރައީސް އިބްރާހިމް މުހައްމަދު ސޯލިހް ގާތުން ނުބައްލަވާތި އެވެ.
"ރާއްޖެ މި ދަނީ ދަރާން [ދަރަނިވެރިވާން]. ސަރުކާރުން ހެދި ގޯސް ބަލައިގަނެ އަވަހަށް ޕާޓީ އާއި މަޝްވަރާ ކުރައްވަން ފައްޓަވާ. އަޅުގަނޑު ދެކޭ ގޮތުގައި މިކަން ނުކޮށްފި ނަމަ އަޅުގަނޑުމެންގެ އިތުބާރު ސަރުކާރަށް ގެއްލޭނެ،" ނަޝީދު ވިދާޅުވި އެވެ.
އެމަނިކުފާނު ވަނީ މީގެ ކުރިން ވެސް އިގްތިސާދީ ހާލަތާ ގުޅުވައި ސަރުކާރަށް އެކި ފަހަރު މަތިން ފާޑުވިދާޅުވެފަ އެވެ. ދަރަނި ރީސްޓްރަކްޗާ ކުރަން ގޮވާއްލަވާތީ ރައްދު ދެއްވަމުން މިނިސްޓަރު އަމީރު ވިދާޅުވެފައި ވަނީ އެ ހާލަތަށް ރާއްޖެ އަދި ނުދާ ކަަމަށެވެ. މިކަން ރަނގަޅަށް މެނޭޖްކުރެއްވޭނެ ކަމުގެ ޔަގީންކަން އޮތް ކަމަށް ވެސް ވިދާޅުވި އެވެ.
އަމީރު ވިދާޅުވެފައި ރާއްޖެއަށް ހާލަތު އައީ ދަރަނި ރީސްޓްރަކްޗާ ނުކޮށްގެން ނޫން ކަމަށާއި ކޮވިޑާ ހެދި ދައުލަތުގެ އާމްދަނީ ބޮޑުތަނުން ދަށްވެ، ޖީޑީޕީ ދަށަށް ދިއުމުން ކަމަށެވެ. އޭނާ ވިދާޅުވީ މި އަހަރު ނިމޭ އިރު ކޮވިޑް ހާލަތުން އަރައިގަނެވޭނެ ކަމަށާއި، އިގްތިސާދީ ހާލަތު ރަނގަޅުވާނެ ކަމަށް އަންޒާދާ ކުރެވޭ ކަމަށެވެ.
"ހަރަދުތައް ވެސް ކުޑަ ކޮށްގެން އަދި އާމްދަނީ ވެސް އިތުރު ކުރަން ފިޔަވަޅުތަކެއް އަޅަން މި ޖެހެނީ. އައިއެމްއެފްގެ ރިކޮމެންޑޭޝަންގައި ވެސް އެބައޮތް ރާއްޖެއާ އެއްކަހަލަ އިގްތިސާދެއް އޮންނަ ގައުމުތަކާ އަޅާ ބަލާއިރު ރާއްޖޭގެ ޖީއެސްޓީ އަދި ޓީޖީއެސްޓީ ރޭޓް ވެސް ކުޑަކަން،" އޭނާ ވިދާޅުވެފައިވެ އެވެ.