19 ޖުލައި 2022 - 17:24
އެތުލެޓިކް ފިޒިކް 175 ސީއެމްގައި ވާދަކޮށް ހުސައިން ހިމްޔާން ރާއްޖެ އަށް ރަން މެޑަލް ހޯދައި ދީފި އެވެ.
މި ކެޓަގަރީގެ ފައިނަލުގައި ހިމްޔާން އާ ވާދަކުރީ އިރާން، އިންޑިއާ، ވިއެޓްނާމް، އުޒްބެކިސްތާން، އިންޑޮނޭޝިއާ އަދި އިރާގުގެ އެތުލީޓުންނެވެ. ޖުމުލަ 15 އެތުލީޓުން ވާދަ ކުރި ކެޓަގަރީގައި ހިމްޔާން ވަނީ އެންމެ މަތިން ޕޮއިންޓް ހޯދައި ރަން މެޑަލް ހޯދައިފަ އެވެ.
އެ ކެޓަގަރީގައި އިބްރާހިމް ނަބީލް ވެސް ވާދަ ކުރި އެވެ. ހިމްޔާންގެ މެޑަލް އަކީ މިފަހަރުގެ މުބާރާތުގައި ރާއްޖެއިން ހޯދި ތިންވަނަ ރަން މެޑަލް އެވެ. މިއަދު ބޮޑީ ބިލްޑިން އަޕް ޓް 55 ކެޓަގަރީގައި ވާދަކޮށް މުހައްމަދު މޫސާ (މޯޑް) ވެސް ވަނީ ރާއްޖެ އަށް ރަން މެޑަލް ހޯދައިފަ އެވެ.
މިދިޔަ އާދިއްތަ ދުވަހު ރާއްޖޭގެ އަޒްނީން ރަޝާދު ވަނީ ސްޕޯޓް ފިޒިކް 170 ސީއެމް ކެޓަގަރީން ރަން މެޑަލް ހޯދައިފަ އެވެ. އޭނާ ރަން މެޑަލް ހޯދީ ގެ ފައިނަލުގައި އިންޑީއާ އާއި ޕާކިސްތާންގެ އެތުލީޓުން ފަހަތައް ޖައްސާލުމަށް ފަހު އެވެ.
އެތުލެޓިކް ފިޒިކް 160 ސީއެމް ކެޓަގަރީގެ ރިހި މެޑައްޔާއި ބްރޯންޒް މެޑަލް ވެސް ރާއްޖޭގެ އެތުލީޓުން ހޯދި އެވެ. ރިހި މެޑަލް ހޯދީ ރާއްޖޭގެ ފަތުހުﷲ މުހައްމަދެވެ. ބްރޯންޒް މެޑަލް ހޯދީ މުހައްމަދު ޒިދާން އެވެ.
ކުރީގެ މިސްޓަ މޯލްޑިވްސް ހުޝާމް ހަމީދު ވެސް ވަނީ އެތުލެޓިކް ފިޒިކް 160 ސީއެމް ކެޓަގަރީން ހަތަރުވަނަ ހޯދައިފަ އެވެ.
މުބާރާތުގައި ރާއްޖެއިން މިހާތަނަށް ވަނީ ހަ މެޑަލް ހޯދައިފަ އެވެ. މިދިޔަ އާދިއްތަ ދުވަހު، އޯވާ 180 ސީއެމް ކެޓަގަރީގައި ވާދަކޮށް މުހައްމަދު އިމްރާހް ވެސް ވަނީ ބްރޯންޒް މެޑަލް ހޯދައިފަ އެވެ. އަދި ހަމަ އެދުވަހު އަޕް ޓް 175 ސީއެމްގައި ވާދަކުރި އަލީ ސަލީމް ވަނީ ފަސް ވަނަ ހޯދައިފަ އެވެ.