02 ޖެނުއަރީ 2017 - 11:49
ނިއު ރޭޑިއަންޓަށް ބަދަލުވެފައިވާ ގޯލްކީޕަރު އިމްރާން މުހައްމަދު ނެތްތަން ފޫބެއްދުމަށް މާޒިޔާ އިން އެ ޓީމަށް ކުރިން ކުޅުނު ކިރްގިސްތާން ގައުމީ ޓީމުގެ ގޯލްކީޕަރު ޕަވެލް މަޓިއަޝް ގެނައުމުގެ މަސައްކަތް ފަށައިފި އެވެ.
މާޒިޔާ އިން މީގެ ކުރިން ޕަވެލް ގެނައީ 2015 ވަނަ އަހަރު އިމްރާނުގެ ކަކުލަށް ސީރިއަސް އަނިޔާއެއް ކުރިމަތިވުމުންނެވެ. އެ ފަހަރު އޭނާ ވަނީ މާޒިޔާ އިން ޕްރެޒިޑެންޓްސް ކަޕް ކާމިޔާބުކުރިއިރު މުހިއްމު ދައުރެއް އަދާކޮށްފަ އެވެ. އެގޮތުން ސެމީ ފައިނަލުން ޓީސީ ސްޕޯޓްސް ކްލަބް އަތުން މާޒިޔާ ޕެނަލްޓީ ޖަހައިގެން މޮޅުވީ ޕަވެލް މަތަކުރި ޕެނަލްޓީތަކާ އެކު އެވެ.
"އޭނާއާ ވާހަކަދައްކަމުން މި އަންނަނީ. ވަރަށް އަވަހަށް އެއްބަސްވުމަކަށް އާދެވޭނެ،" މާޒިޔާގެ ސީއީއޯ ހުސެއިން ޝާފިއު (ކޮއްކީ) ވިދާޅުވި އެވެ.
ރާއްޖޭގައި 2014 ވަނަ އަހަރު ބޭއްވި އޭއެފްސީ ޗެލެންޖް ކަޕުގައި ކިރްގިސްތާން ގައުމީ ޓީމުގެ ގޯލް ބެލެހެއްޓި ޕަވެލް މާޒިޔާ ދޫކޮށްލުމަށް ފަހު މިދިޔަ އަހަރު ކުޅުނީ މެލޭޝިއާ ޕްރިމިއާ ލީގުގެ ޔޫއައިޓީއެމް އެފްސީ އަށެވެ. އޭނާ އަކީ ފަހަކަށް އައިސް ރާއްޖޭގައި ކުޅުނު އެންމެ މޮޅު އެއް ބިދޭސީ ކީޕަރެވެ.
ޝާފިއު ވިދާޅުވީ މާޒިޔާ އިން ބިދޭސީ ޑިފެންޑަރަކާއި ފޯވާޑެއް ވެސް ގެނައުމުގެ މަސައްކަތްކުރަމުން އަންނަ ކަމަށާއި ވަރަށް އަވަހަށް ކުޅުންތެރިން ރާއްޖެ އައިސް ޓީމާ ގުޅޭނެ ކަމަށެވެ.
މިދިޔަ ސީޒަނުގެ ދިވެހި ޕްރިމިއާ ލީގު ކާމިޔާބުކުރި މާޒިޔާ އިން މިހާތަނަށް ދިވެހި އެއްވެސް ކުޅުންތެރިޔެއްގެ ސޮއި ހޯދާފައި ނުވެ އެވެ. އެކަމަކު އެ ޓީމުގެ މެޖޯރިޓީ ކުޅުންތެރިން ވަނީ ކްލަބުގައި މަޑުކޮށްފަ އެވެ. ކްލަބް ދޫކޮށް ގޮސްފައިވަނީ ކީޕަރު އިމްރާނާއި އަހުމަދު ނާޝިދު (ނައްޓޭ) އެވެ.
މާޒިޔާ އިން ވަނީ އަންނަ ސީޒަނުގައި އެ ޓީމުގެ ކޯޗަކަށް މެސެޑޯނިއާގެ މަރްޔަން ސެކުލޮސްކީ ހަމަޖައްސައިފި އެވެ. މިދިޔަ އަހަރުގެ އޭއެފްސީ ކަޕުގައި މާޒިޔާއާ ވާދަކުރި މިޔަންމާގެ ޔަންގޮން ޔުނައިޓެޑަށް ކޯޗުކޮށްދިން ސެކުލޮސްކީއާ އެކު މާޒިޔާ އިން އެއްބަސްވުމަކަށް އައިސްފައިވާއިރު އެ ޓީމާ ހަވާލުވާން އޭނާ އަންނަ މަހުގެ 5 ވަނަ ދުވަހު ރާއްޖެ އަންނާނެ އެވެ.
މާޒިޔާ އިން 2006 ވަނަ އަހަރު ފުރަތަމަ ޑިވިޝަނުގައި ވާދަކުރަން ފެށި ފަހުން މިހާތަނަށް ކޯޗުކޮށްދީފައިވަނީ ދިވެހި ދެ ކޯޗުން ކަމަށްވާ އިސްމާއިލް މަހަފޫޒް (އިންމަ) އާއި އަލީ ސުޒޭނެވެ. މީގެ ތެރެއިން ސުޒޭން މިދިޔަ ސީޒަނަށް ފަހު އިސްތިއުފާ ދިން ހިސާބުން މާޒިޔާގެ ބޯޑުން ބިދޭސީ ކޯޗެއް ގެންނަން ނިންމީ އެވެ.