04 ޖެނުއަރީ 2017 - 06:24
ބޮލީވުޑް ބަތަލާ ކަރީނާ ކަޕޫރުގެ އިންކަމް ޓެކްސް އެކައުންޓް ހެކްކޮށް ބައެއް މައުލޫމާތު އާންމުކުރި މައްސަލައެއްގައި ޒުވާނަކު ހައްޔަރުކޮށްފި އެވެ.
ކަރީގެ އެކައުންޓް ހެކްކުރީ އޭނާގެ ސަޕޯޓަރެއް ކަމަށާއި އެއީ 26 އަހަރުގެ މަނީޝް ތިވާރީ ނަމަކަށް ކިޔާ މީހެއް ކަމަށް ފުލުހުން ބުންޏެވެ. އެ މީހާ މިހާރު ވަނީ ސައިބަ ޕޮލިހުން ހައްޔަރުކޮށްފަ އެވެ. އޭނާ އަކީ ޕެރަމިލިޓަރީގައި މަސައްކަތްކުރާ މީހެކެވެ.
ފުލުހުން ހޯމަ ދުވަހު ބުނީ އެމީހާ ކަރީނާގެ އައިޓީ އެކައުންޓަށް ވަނީ އިންޓަނެޓުން ކަރީނާގެ ފޯނު ނަންބަރު ލިބޭތޯ ކުރި މަސައްކަތުގެ ތެރޭގައި ކަމަށް އެމީހާ ބުނެފައިވާ ކަމަށެވެ. މި މީހާ ވަނީ 17-2016 ގެ ކަރީނާގެ އިންކަމްޓެކްސްގެ ޑެކްލަރޭޝަން ފޯމް ފުރައި އަޕްލޯޑް ވެސް ކޮށްފަ އެވެ.
މިކަން ކުރިކަން ފަޅާއެރީ ކަރީނާގެ ޗާޓަޑް އެކައުންޓެންޓް ޕްރަކާޝް ކަރްކަރް އަށް ކަރީނާގެ ޑެކްލަރޭޝަން ފޯމު އިންޓަނެޓުން ފެނުމުންނެވެ. އެކައުންޓް ހެކްކުރުމަށްފަހު ޕާސްވޯޑް ވެސް ބަދަލުކޮށްފައި އޮތުމުން ކޮންމެވެސް ބަޔަކު އެކައުންޓާ ކުޅެފައިވާކަން ޔަގީންވެ ފުލުހުންނަށް މައްސަލަ ހުށަހެޅީ އެވެ.