17 އޯގަސްޓް 2022 - 06:45
އާދިއްތަ ދުވަހާ ގުޅޭ
"ކޮން ހިސާބެއްގަ ގެ ހުންނަނީ؟" މަލްސާ އަހައިފައި އޮތެވެ.
އެ ސުވާލަށް އަހަރެން ޖަވާބުދޭކަށް ނުޖެހެއެވެ. އެހެނަސް ޖަވާބު ނުދީފި ނަމަ، މަލްސާއަށް ފިލަން އަހަރެން މަސައްކަތްކުރާކަން ވަރަށް ސާފުކޮށް އެނގުނީއެވެ. ގެ ހުރި ތަން ބުނެފި ނަމަ، އަނެއްކާ ވެސް މަލްސާ އަންނާނެއެވެ. އަހަރެން ކުރި ހުރިހައި މަސައްކަތަކާއި، ހޭދަކުރި ފައިސާ ބޭކާރުވީއެވެ. ދެން ހަދާނީ ކިހިނެއް ހެއްޔެވެ؟ މަލްސާ އަމިއްލައަށް ގެ ހޯދައިފިއްޔާ އޭނަގެ އުނދަގޫ ވަރަށް ބޮޑުވެދާނެއެވެ.
"ކިހާ ބޮޑު އުނދަގުލެއް؟" އަހަރެން މަޝްވަރާކުރުމުން އަލްވާން ބުންޏެވެ. "މީ އަހަރެން ބުނި ވާހަކަ. މިހާރު ވެސް އިތުރުގަޑީގަ މަސައްކަތްކޮށްގެން ދަރަނިތައް މި އަދާކުރަނީ."
"އެހެންވެ އަހަރެން ބުނީ ރާއްޖެއިން ބޭރަށް ހިނގާށޭ،" އަހަރެން ބުނީމެވެ. "ދިޔަ ނަމަ މިހެނެއް ނުވީސް."
އަލްވާން ގާތަށް ރުޅިއައެވެ. އެކަމަކު އޭނަ ރުޅި ކޮންޓުރޯލުކުރިއެވެ.
"ހައިބާ! އަހަރެންނަށް ވެސް ރަނގަޅީ ތި ގޮތޭ،" އަލްވާން ބުންޏެވެ. "އެކަމަކު ކޮން ތާކުން ލާރި ހޯދަނީ؟ ތަންކޮޅެއް ދުރާލައި ހައިބާ ވިސްނާލާ ނަމަ.."
ކުރިން ވާނެ ގޮތް އެނގޭ ނަމަ ދިރިއުޅުން ކިހައި އުފާވެރިވީސް ހެއްޔެވެ؟ ކުޑަކުޑަ އުސައިދު ގެއަށް ގެނައި އިރު، ފަހުން ބޮޑު މައްސަލަގަނޑެއް ހިލޭނެކަމަކަށް ހިޔެއްނުކުރަމެވެ. މައްސަލައަކީ އުސައިދެއް ނޫނެވެ. ހެދިފައިވާ އެއްބަސްވުމަށް މަލްސާއާއި ތައުފީގު ޢަމަލުނުކުރުމެވެ. އުސައިދަށް އަށާރަ އަހަރު ފުރެންދެން މަޑުމަޑުން ތިބެފައި، ދާނެ މަގެއް އިހުތިޔާރުކުރަން އުސައިދަށް ދޫކޮށްލީމައި ނިމުނީއެވެ. ހިތަށްއެރިއެވެ. އެއްބަސްވުމެއް ހެދުނުކަން ނަސީބެކެވެ.
އަހަރެން މަލްސާއަކަށް ޖަވާބެއް ނުދެމެވެ. އަހަރުމެން އުޅުނީ ފިލައިގެންނެވެ. އެކަމަކު ޑުރަގު ބޭނުންކުރާ މީހުން ނެތް މަގެއް، ގޯޅިއެއް މާލެއަކު ނެތެވެ. އެ މީހުން އެމީހުންނާ ނުލާހިކު ގުޅުން ބޮޑެވެ. ފަޅާއަރާނެކަން އަހަންނަށް ޔަގީނެވެ. ނޭނގެނީ ކޮން ދުވަހަކުންކަމެވެ. މަގުމަތިން މީހަކު ނުގޮތަކަށް އުސައިދަށް ބަލައިލިޔަސް އަހަރެންނަށް ޝައްކުވެއެވެ. ނުދަންނަ އެތައް ނަންބަރަކުން އަހަންނަށް ފޯނުއާދެއެވެ. އަހަރެން ޖަވާބެއް ނުދެމެވެ. ގިނައިން މީހުން އެއްވާ ތަންތަނަށް ދިޔުން ވެސް ހުއްޓައިލީމެވެ. ހަމަ އެންމެ "ދަރިޔަކަށް" ޓަކައެވެ. އަހަންނަށް އޮތީ އެންމެ ބިރެކެވެ. އުސައިދުގެ އިސްކޫލު ދޮށަށް މަލްސާ ދިޔުމެވެ. ނުވަތަ އެ ހިސާބުން ފެށިގެން އަހަންނަށް ފާރަލުމެވެ. އެ ކަމެއް މަލްސާ ނުކުރެއެވެ. ކީއްވެގެންކަމެއް ނޭނގެއެވެ.
އެއްދުވަހަކު ދަރިފުޅު ބަލައި އިސްކޫލަށް ދިޔަ އިރު، އުސައިދުގެ މޫޑު އެހައި ރަނގަޅު ނޫންކަން ފާހަގަކުރެވުނެވެ. އަހަންނަށް އެންމެ ފުރަތަމަ ވެސް ޝައްކުކުރެވުނީ މަލްސާއަށެވެ. ގެއަށް އައި މަގުމަތީގައި އެކި ގޮތްގޮތަށް އުސައިދާ ސުވާލުކުރީމެވެ. ޖަވާބެއް ނުދިނެވެ. ކާން އިން އިރު ވެސް އުސައިދު އިނީ ފާޑަކަށެވެ. ކާކަށް ނޫޅެއެވެ.
"ކިހިނެއްވީ ދަރިފުޅާ؟" އަލްވާން ސުވާލުކުރިއެވެ. "ކަމެއް ދިމާވެގެން އުޅެންޏާ ހިނގާ އެ ވާހަކަދައްކާލަމާ ދޯ؟ އަހަރުމެން އަޑުއަހާނަމޭ."
ދެން ވެސް އިރުކޮޅެއްވަންދެން ވިސްނަން އިނދެފައި އުސައިދު ވާހަކަދެއްކިއެވެ.
"އަހަރެންގެ އަސްލު ބައްޕައަކީ ކާކު؟" އިނގެރޭސި ބަހުން އުސައިދު އެހިއެވެ.
އަނެއްކާ އަނެއް ކަންތަކެވެ. އަދި މި އުޅެނީ އެއް ކަމަކުން ސަލާމަތްނުވެވިގެންނެވެ. އުސައިދަށް ވަސްވާސްލައިދެނީ ކާކު ހެއްޔެވެ؟
"ތީތަ އަހަރެންގެ އަސްލު ބައްޕަ؟" އަލްވާނަށް ބަލައިލައިފައި އުސައިދު އެހިއެވެ.
"އުހުނ!" އަލްވާން ޖަވާބުދިނެވެ. "ދަރިފުޅު ބޭނުންތަ އަސްލު ބައްޕަޔާ ބައްދަލުކުރަން؟"
އިސްޖަހައިގެން އިނދެ އުސައިދު ބޯޖަހައިލިއެވެ. އެހެނަސް އެއީ ކާކުކަމެއް އަހަރުމެންނަކަށް ނޭނގެއެވެ. ބައްދަލެއްނުވެއެވެ. އަލްވާން އަހަންނަށް ބަލައިލިއެވެ. ބުނާނެ އެއްޗެއް އަހަންނަކަށް ވެސް ނޭނގުނެވެ. އެނގޭ ހަމަ އެކަނި އެއްޗަކީ، އުސައިދުގެ ބައްޕަ ކަމުގައި މަލްސާ ބުނާ މީހާ އުސައިދު ގަބޫލުކުރަން ބޭނުން ނުވާ ކަމެވެ. އެ ފަދަ މީހެއް ގާތަށް އުސައިދު ގެންދާނީ ކިހިނެއް ހެއްޔެވެ؟ ބާރަ އަހަރުގެ ކުއްޖަކަށް އެ ވާހަކަ ބުނެދޭނީ ކިހިނެއް ހެއްޔެވެ؟
ތައުފީގަށް ފޯނުން ގުޅައިގެން އަލްވާން ވާހަކަދެއްކިއެވެ. އެ ކަމުގެ ތެރެއަށް ވަންނަން އަހަރެން ބޭނުން ނުވީއެވެ. ހަގީގަތުގައި އަލްވާން ވެސް ބޭނުމެއް ނޫނެވެ. އޭނަ އެ ކަން ކުރީ، އަހަރެން ބުނީތީ ކޮށްދޭ އުސޫލުންނެވެ. ދެން ކުރިމަތިވީ މާ އުނދަގޫ މައްސަލައެކެވެ. އުސައިދުގެ މަންމައަށް ނުދިން ފުރުސަތެއް އުސައިދުގެ ބައްޕައަށް ދޭކަށް ތައުފީގު ބޭނުމެއް ނުވިއެވެ. ސަބަބެއް ވެސް ދެއްކިއެވެ.
"އުސައިދު އުފަންވުމުގެ ކުރިން ވެސް އޭނަގެ ބައްޕަޔާ ވާހަކަދެއްކިން. ހަމަ ދިމާލަށް ބުނީ، އެއީ ތިމަންނަގެ ދަރިއެއްކަން ކިހިނެއްހޭ އެނގެނީ؟" ހިތްހަމަނުޖެހިފައި ތައުފީގު ބުންޏެވެ. "ކީއްކުރަން އެ ވަރުގެ މީހެއް އުސައިދަށް ދައްކަންވީ؟ ބޭނުމެއް ނޫން ދައްކާކަށް. އެއަށް ވުރެ މާ ރަނގަޅެއްނު އުސައިދު ދެކޭ ހިތުން އުޅޭ އުސައިދުގެ މަންމަޔާ ބައްދަލުކުރިއްޔާ! ކަލޭމެން މިހާރު ވެސް ގެ ބަދަލުކޮށްގެން ތި އުޅެނީ މަލްސާއަށް ފިލަން. ހީވޭތަ ފިލޭނެހެން؟ މަލްސާ ފޯނުކުރީ ނޭނގިގެނެއް ނޫނޭ."
އެއް މައްސަލަ ތެރެއިން އަނެއް މައްސަލައެވެ. އުސައިދު ބޭނުންވަނީ މަލްސާއަށް ފިލާށެވެ. ތައުފީގު ބޭނުންވަނީ މަލްސާޔާ ބައްދަލުކުރުވާށެވެ. ދެ ކަންތައް ކުރާނީ ކިހިނެއް ހެއްޔެވެ؟ ދުވަސްތައް ވެއަތުވަމުންދިޔައެވެ. އުސައިދަށް ހީވަނީ އޭނަގެ ބައްޕަޔާ ބައްދަލުކުރުވަން ބޭނުން ނުވަނީ އަހަރެންހެންނެވެ. ހަގީގަތް ކިޔައިދިނުމުން އަރުތެރޭގައި ކިހައި ގަދަ ހިތިރަހައެއްލާނެކަން އޭނައަކަށް ނުވިސްނެއެވެ.
"އަހަރެންނަކީ މަންމަގެ ދަރިއަކަށް ނުވީމަ ދޯ ބައްޕަ ކައިރިއަށް ނުގެންދަން ތި އުޅެނީ؟" ނޭވަޔަކު ދެ ކޮޅު ކުރާ ސުވާލު، އެ ފަހަރު ވެސް އުސައިދު ކުރިއެވެ. "އަހަންނަށް ވެސް މިހާރު އެ ވަރު ވިސްނެޔޭ!"
އުސައިދު އެހެން ބުނާ ކޮންމެ ފަހަރަކު އަހަރެންގެ ހިތް ކުދިކުދިވެއެވެ. ހަތަރުދަމު އަހަރެން މި ވިސްނަނީ އުސައިދު ހިތްހަމަޖައްސައިދޭކަށް ނޫން ހެއްޔެވެ؟ ފިރިމީހާގެ ކަމެއް، އަހަރުމެންގެ ދަރިންގެ ކަމެއް ނުވަތަ އަހަރެންގެ ކަމަކާ ދޭތެރޭ ވިސްނާލާކަށް ވެސް ވަގުތެއް ނުވެއެވެ. ސިކުނޑިއަށް އަރާމެއް ނުލިބެއެވެ. އެންމެ ފަހުން، ކުރަން އެންމެ ބޭނުންނުވި ކަންތައް ވެސް ޖެހުނީ ކުރާށެވެ. އެއީ މަލްސާއަށް ގުޅުމެވެ. އޭގެ ސަބަބުން ދެން ނުކުންނާނެ މައްސަލަތައް އޭރު ވެސް އެނގެއެވެ.
"ހާދަހާ ދުވަހެއް ފަހުން އަހަރެންގެ މިސްކޯލުތައް ފެނުނީ؟" ފޫހިވެފައިވާ ރާގެއްގައި މަލްސާ ބުންޏެވެ. "ކޮން ކަމެއް ބޭނުންވީ؟ އަހަންނަށް ޔަގީން ކަމެއް ނުވެއެއް ނުގުޅާނެކަން."
ވީ ގޮތް ވަރަށް ސާފެވެ. ތައުފީގަށް އަލްވާން ގުޅި ވާހަކަ ތައުފީގު ބުނީއެވެ. އެހެން ނޫން ނަމަ މަލްސާ އެހެނެއް ނުބުނީހެވެ. އަހަރެން ހިތަށްއެރިއެވެ. ދުރުދުރުން ވާހަކަ ގެންދިޔުމުގެ ބޭނުމެއް ނެތެވެ. ވާން ހުރި ފަލީހަތެއް ވާނެއެވެ. އަހަރެން ބޭނުމީ އުސައިދުގެ ލޯތްބެވެ.
"މަލްސާއަށް އެނގޭނެ އަހަރެން މި ގުޅީ ކީއްވެގެންކަން،" އަހަރެން ބުނީމެވެ. "އެ ކަން ހަމަޖައްސައިދީބަލަ! އުސައިދު އެ ކަމާ ކުސްތަޅާތާ ވަރަށް ގިނަ ދުވަސް ވެއްޖެ!"
"ނުޖެހޭ އޭނަ ކައިރިއަށް އަހަރެންގެ ދަރިފުޅު ގެންދާކަށް. އޭނަ ކަންތައްކުރި ގޮތް އަދި ވެސް އަހަރެން ހަނދާނެއް ނުނެތެޔޭ!" ނަފުރަތުގެ ރާގެއްގައި އެހެން ބުނެފައި މަލްސާ ރާގު ބަދަލުކޮށްލިއެވެ. "އެހެން އަހަރެން ބުނަންވީ. އެކަމަކު ނުބުނާނަން. އުސައިދު ބައްޕަގެ ނަމާ، ފޯނު ނަންބަރު ވެސް ބުނެދޭނަން. އެކަމަކު، ޝަރުތެއްގެ މަތިން. ދަރިފުޅާ ބައްދަލުކުރަން އަހަންނަށް ވެސް ޗާންސުދޭން ޖެހޭނެ."
ނޫނެކެވެ. އެއީ ފަސޭހަކަމެއް ނޫނެވެ. އަހަރެން އެ ގޮތް ބޭނުން ނުވާތީއެއް ނޫނެވެ. އުސައިދު ބޭނުން ނުވާތީއެވެ. އުސައިދަށް ޓަކައި ޑުރަގު ދޫކޮށްލެވޭކަށް މަލްސާއަކަށް ނެތެވެ. އަހަރެން އެ ވާހަކަ އަނެއްކާ ވެސް ކިޔައިދިނީމެވެ. ދަރިފުޅަށް ޓަކައި މަސްތުގެ ދުނިޔެއާ ދުރަށް ދިޔުމަށް ނަސޭހަތްތެރިވީމެވެ. އަހަންނަށް އެނގެއެވެ. ޑުރަގާ ދުރަކަށް މަލްސާއަކަށް ނުދެވޭނެއެވެ.
"ހައިބާ އަޑުއަހާބަލަ! އަހަންނަށް އެނގެޔޭ ތި ގެ ހުންނަނީ ކޮން ހިސާބެއްގަކަން. އަހަންނަށް އެނގެޔޭ އުސައިދުގެ ސްކޫލް ހުންނަ ތަން. އަހަރެން ނާންނަމެއްނު!" މަލްސާ ބުންޏެވެ. "އަހަރެން ބޭނުންވީ އުސައިދު ބޭނުންވާ ކަހަލަ މަންމައަކަށް ވެގެން އޭނަގެ ކުރިމައްޗަށް އަންނަން. އެ މަސައްކަތް މި ކުރަނީ. މިހާރު އަހަންނަކީ ކުރީގެ މަލްސާއެއް ނޫން."
އަހަރެންގެ ހިތް ވަރަށް ބާރަށް ތެޅިގަތެވެ. ވާން ބޭނުން ނުވި ކަންތައް ވެދާނެކަމުގެ ކުލަވަރު، ފުރަތަމަ ފަހަރަށް އަހަންނަށް ފެނުނެވެ. އަހަރެންގެ ހިތްސާފު ނަމަ، ވަގުތުން މަލްސާއަށް ޝުކުރުއަދާކޮށް، ތައުރީފު ވެސް ކުރެވުނީހެވެ. އެެހެނަސް އެހެނެއް ނުވިއެވެ. ހިތުގައި އުފެދުނީ ނުތަނަވަސްކަމެވެ. ބިރުވެރިކަމެކެވެ.
"އުފާވާ ކަހަލަ އެއްޗެއް ނޫން ދޯ މި ބުނެވުނީ؟" މަލްސާ ހީނގެންފައި އެހިއެވެ. "ޑީލެއް މި ދިނީ. ބޯޅަ މިހާރު އޮތީ ތި ކޮޅުގަ."
މަލްސާ ފޯނުކަނޑައިލިއެވެ. އަހަރެންގެ ކަށްވަޅު އަހަރެންގެ ދެ އަތުން ކޮނެވުނު ކަހަލައެވެ. އަހަރެން އަލްވާނާ މަޝްވަރާކުރީމެވެ. ގޮތެއް ނިންމަން އޭނަ ދޫކޮށްލީ އަހަންނަށެވެ. މައްސަލައިގެ ނާރެހަކީ އަހަރެން ކަމުގައި ވީތީއެވެ. ހުރިހައި ކަމެއް އެނބުރެނީ އަހަރެން ވަށައިގެންނެވެ. އަހަރެންގެ އަމާޒަކީ އުސައިދުގެ ހިތެވެ. އެ ހިތް ފަތަހަކުރުމެވެ. ހިތަށްއެރިއެވެ. އުސައިދުގެ ބައްޕައަށް އުސައިދެއް މުހިންމެއް ނުވާނެއެވެ. އުސައިދަށް މަލްސާއެއް މުހިންމެއް ނުވާނެއެވެ. ކުޅިފަސް ލިބޭނީ އަހަންނަށެވެ. ބިރެއްގަންނާނެކަމެއް ނެތެވެ.
މަލްސާގެ ހުށައެޅުން އަހަރެން ގަބޫލުކުރީމެވެ. އެ ނޫން ގޮތެއް ނެތެވެ. އަހަރެން އެ ކަން އެންގީ މެސެޖަކުންނެވެ. ވަގުތުން އުސައިދުގެ ބައްޕަގެ ނަމާއި ފޯނު ނަންބަރު އަހަންނަށް ލިބުނެވެ. އޭނަގެ ނަމަކީ ޖަދުވާނެވެ. ވަނަމަކަށް ޖޭޑެވެ. އަހަރެން ވަގުތުން އޭނައަށް ގުޅީމެވެ. ފޯނެއް ނުނެގިއެވެ. ފަހުން ޖަދުވާން ގުޅިއެވެ. އެއީ ސަތޭކަ ޕަސަންޓު ޕާޓޭ އަޑެކެވެ. ރާގާއި ބަހުރުވަ ވެސް ހަމަ އެ ފަދައެވެ. އަހަރެން ހުރިހައި ވާހަކައެއް ކިޔައިދިނީމެވެ. ނަންބަރު ލިބުނު ގޮތް ވެސް ބުނީމެވެ.
"އެ ** ނުޖެހޭ އަހަރެންގެ ނަންބަރު ކައެއަށް ދޭކަށް،" ޖަދުވާންގެ އަނގަ ހުޅުވައިލުމާ އެކު މާތައް އޮހިގަތެވެ. "މަގޭ ދަރިއެއް ނުހުންނާނެ. މަލް ތެޅޭނެ ވައްތަރަކަށް ތެޅިފަ ތިހެން މަގޭ ބޮލަކަށް ނުކެނޑޭނެ. ދެން ނުގުޅާތި މަށަށް. ކިހާ ބޮޑު ***"
ނުނިމޭ