02 ސެޕްޓެމްބަރ 2022 - 23:02
ބެންކް އޮފް މޯލްޑިވްސްއިން ކުރިއަށް ގެންދާ އިންޓަންޝިޕް ޕްރޮގްރާމުގެ ބެޗު 2 އާާއި ބެޗު 3ގެ ދަސްވެނިވުން މިރޭ ބާއްވައިފިއެވެ.
ހޮޓެލް ޖެންގައި ބޭއްވި ރަސްމިއްޔާތުގައި ދަސްވެނިވި 30 ބައިވެރިންނަށް ސެޓްފިކެޓު ވަނީ ދީފަ އެވެ. އެއީ ބެޗު ދޭއްގެ 15 ބައިވެރިންނާއި ބެޗު ތިނެއްގެ ފަނަރަ ބައިވެރިންނެވެ. އެ ޕްރޮގްރާމަކީ ބީއެމްއެލްއިން އިންސާނީ ވަސީލަތް ތަރައްގީ ކުރުމަށާއި، މަތީ ސާނަވީ ތައުލީމު ފުރިހަމަ ކޮށްފައިވާ ދަރިވަރުންނަށް ވަޒީފާގެ މައިދާނުގެ އަމަލީ ތަޖުރިބާ ދިނުމަށް ކުރިއަށް ގެންދާ ޕްރޮގުްރާމެއް ކަމަށް ބެންކުން ބުނެއެވެ.
ބެންކުން ބުނީ އެ ޕްރޮގްރާމުގައި އެ ބެންކުގެ އެކި ޑިޕާޓްމެންޓުތަކުގެ އަމަލީ ތަޖުރިބާ އިންޓާނުންނަށް ދީފައިވާ ކަމަށެވެ. އޭގެތެރޭގައި، ބޭންކިން އާއި ފައިނޭންސިން އަދި ކަސްޓަމާ ކެއާ ހިމެނޭ ކަމަށް ވެސް ބުންޏެވެ.
އެ ރަސްމިއްޔާތުގައި ބީއެމްއެލްގެ އެކްޓިން މެނޭޖިން ޑިރެކްޓާ އަދި އިންޗާޖް އައިޝަތު ނޫރައްދީން ވިދާޅުވީ ގްރެޖުއޭޓް ވި 80 ޕަސެންޓު ކުދިންނަށް ބީއެމްއެލް އާއި އެހެން އިދާރާތަކުން ވަޒީފާ ހަމަޖެހިފައިވާ ކަމަށެވެ. އަދި އެ ޕްރޮގްރާމަކީ ބެންކަށް ދިމާވާ އިންސާނީ ވަސީލަތްތައް ދަތިވުމުގެ މައްސަލަ ހައްލުކޮށް، ބެންކުގެ ހިދުމަތްތައް ރަނގަޅު ތަމްރީނުތަކެއް ދީފައިވާ ޕްރޮގްރާމެއް ކަމަށް ވެސް ވިދާޅުވިއެވެ. އަދި ބޭރުގެ ބެންކުތަކާއި އެއް ސަފެއްގައި ފައިތިލަ ސާބިތުކުރުމަށް އެ ފަދަ އިންސާނީ ވަސީލަތްތައް ތަރައްގީ ކުރުމުގެ ޕްރޮގުރާމުތަކުގެ މުހިންމުކަން ވެސް ފާހަގަ ކުރެއްވި އެވެ.
އެ ރަސްމިއްޔާތުގައި މި އަހަރުގެ އިންޓާންޝިޕަށް ހޮވުނު ފަރާތްތަކަށް ވެސް ވަނީ ސެޓުފިކެޓު ހަވާލު ކޮށްފައެވެ. މި އަހަރުގެ އިންޓާންޝިޕަށް ވެސް ހޮވާފައި ވަނީ 15 ބައިވެރިންނެވެ.
ބެންކުން ބުނީ އިންޓާންޝިޕް ޕްރޮގްރާމުގެ ބައިވެރިންނަށް ކިޔެވުމުގެ ފުރުސަތު ދޭ ކަމަށެވެ. އެގޮތުން އަންލިމިމޓެޑް ކޮށް "ސްޓަޑީ ލީވް" ދޭ ކަން ފާހަގަ ކުރިއެވެ. އަދި ރާއްޖޭގައި ހިންގާ ގިނަ އިންޓާންޝިޕްތަކާއި ހިލާފަށް އެ ޕްރޮގްރާމުގައި ބައިވެރިންނަށް މަހަކު 6000ރ. މުސާރައިގެ ގޮތުގައި ދޭ ކަމަށް ވެސް ބެންކުން ބުނެއެވެ.
ބީއެމްއެލްގެ އިންޓާންޝިޕް ޕްރޮގްރާމަކީ 2018 ވަނަ އަހަރު ފެށި ޕްރޮގްރާމެކެވެ. މަތީ ސާނަވީ ތައުލީމު ނިންމާ ދަރިވަރުންނަށް ކުރިމަގު ބިނާކޮށް ދިނުމުގެ ގޮތުން އެ ޕްރޮގްރާމުގެ އިތުރުން ސްކޮލާޝިޕްތަކުގެ ފުރުސަތު ވެސް ދަނީ ހޯދައި ދެމުންނެވެ.