06 ޖެނުއަރީ 2017 - 05:48
އާމިރު ޚާންގެ "ދަންގަލް" އިންޑިއާގެ ބޮކްސް އޮފީހާއި ބޭރު ގައުމުތަކުގައި ވެސް ހުއްޓުމެއް ނެތި ކާމިޔާބީތައް ހޯދަމުން އެބަދެ އެވެ. ފިލްމު ރިލީޒްކުރިތާ މިއީ ދެ ވަނަ ހަފުތާ ނަމަވެސް ފިލްމުގެ ހިނގުމަކަށް ކުޑަވެސް މަޑުޖެހުމެއް ނާދެ އެވެ.
މިހާތަނަށް އިންޑިއާ އިން އެކަނިވެސް މި ފިލްމު 300 ކްރޯޑު (3000 މިލިއަން) އަށް ވުރެ ގިނައިން ހޯދައިފި އެވެ. ބޭރުގެ މާކެޓްތަކުން 13 ދުވަސް ތެރޭ މި ފިލްމު ވަނީ 158.7 ކްރޯޑު (1587 މިލިއަން) ހޯދާފަ އެވެ. އެހެންކަމުން މުޅި އެކު މި ފިލްމަށް މިހާރު ވަނީ 584.70 ކްރޯޑު (5847 މިލިއަން ރުޕީސް) ލިބިފަ އެވެ. އަދި އާމިރުގެ މި ފިލްމު ވަނީ "ސުލްތާން" އަށް މުޅިއެކު ލިބުނު ޖުމްލައަށް ވުރެ ގިނައިން ހޯދާ އެންމެ 13 ދުވަސް ތެރޭ "ސުލްތާން" އަށް ލިބުނު ޖުމްލަ އަށް ވުރެ ގިނައިން ހޯދައި ރެކޯޑް މުގުރާލައިފަ އެވެ.
"ސުލްތާން" އަށް ލިބފައިވަނީ 5.7 ބިލިއަން ރުޕީސް އެވެ. ހިންދީ ސިނަމާގެ ތާރީޚުގައި ވެސް އެންމެ ގިނައިން ފައިސާ ލިބުނު ފަސް ފިލްމުގެ ތެރޭގައި "ދަންގަލް" ވަނީ ހިމެނިފަ އެވެ.
މިހާތަނަށް އެންމެ ގިނަ ފައިސާ ލިބުނު ހިންދީ ފިލްމުގެ ރެކޯޑް އޮތީ ވެސް އާމިރު ޚާންގެ ފިލްމަކަށެވެ އެއީ "ޕީކޭ" އެވެ. އެ ފިލްމަށް 7.7 ބިލިއަން ރުޕީސް ލިބިފައިވެ އެވެ. ދެ ވަނައިގައި އޮތީ ސަލްމާން ޚާންގެ "ބަޖްރަންގީ ބައިޖާން" އެވެ. އެ ފިލްމަށް 6.3 ބިލިއަން ރުޕީސް ލިބިފައިވެ އެވެ. ތިން ވަނައިގައި އާމިރުގެ "ދޫމް 3" އެވެ. އެ ފިލްމަށް ލިބިފައިވަނީ 5.8 ބިލިއަން ރުޕީސް އެވެ. ހަތަރު ވަނައިގައި މިހާރު އޮތީ 5.8 ބިލިއަން ރުޕީސް ހޯދައިގެން "ދަންގަލް" އެވެ. އަދި ފަސް ވަނައިގައި 5.7 ބިލިއަން ހޯދައިގެން ސަލްމާން ޚާންގެ "ސުލްތާން" އެވެ.