06 ސެޕްޓެމްބަރ 2022 - 06:36
އިންޑިއާގައި ޓީޗަރުންގެ ދުވަހާ ގުޅުވައިގެން އެ މީހުންގެ މައްސަލަތައް ދައްކުވައިދޭ ފިލްމެއް އިއުލާންކޮށްފި އެވެ.
އިންޑިއާގައި ޓީޗަރުންގެ ދުވަސް ފާހަގަކުރަނީ ކޮންމެ އަހަރެއްގެ ސެޕްޓެމްބަރު 5 ވަނަ ދުވަހު އެވެ. މެޑްޑޮކް ފިލްމްސްގެ ވެރިޔާ ދިނޭޝް ވިޖަން ބުނީ ޓީޗަރުންނަށް ހާއްސަކޮށް ހަދާ އެ ފިލްމު އިއުލާންކުރުމަަށް މިއަށް ވުރެ ރަނގަޅު ވަގުތެއް ނެތް ކަމަށެވެ.
ބޮލީވުޑްގެ ދެ ތަރިން ކަމަށްވާ ނިމްރަތު ކޯރް އާއި ރަދިކާ މަންދަން ކުޅޭ ގޮތަށް ހަމަޖެހިފައިވާ ސޯޝަލް ތުރިލާއެއް ކަމަށްވާ އެ ފިލްމު އިއުލާންކޮށް، ކުރު ޓީޒާއެއް ވެސް އާންމުކުރި އެވެ.
ސާޅީސް ސިކުންތުގެ އެ ވީޑިއޯ ފަށަނީ ރަނގަބީލުގެ އަޑުން ކްލާސްރޫމެއްގެ މަންޒަރަކުންނެވެ. ޓީޗަރުން ކިޔަވައިދީ އެންމެންނަށް ދިރިއުޅުމެއް ބިނާކޮށްދޭއިރު އެ މީހުންގެ ދިރިއުޅުމެއް ނެތީތޯ ސުވާލު އުފައްދަ އެވެ. އަދި އެއާ އެކު ޓީޗަރުންނާ މެދު ހިތްހަމަނުޖެހި މީހުން ކިޔާފައިވާ އެކި ކަހަލަ ލިޔުންތައް ފެނެ އެވެ.
އޭގެ ތެރޭގައި ޓީޗަރުންނަށްވުމަށް ކުފޫ ހަމަނުވާ ކަމަށާއި ބައެއް ޓީޗަރުންގެ ސަބަބުން ކުދިންނަށް ނުރަނގަޅު ނުފޫޒު ފޯރާ ކަމަށް އަދި އެ މީހުންނާ މެދު ފިޔަވަޅު އެޅުމަށް ގޮވާލާފައިވާ އެކި ލިޔުންތައް ހިމެނެ އެވެ.
ދިނޭޝް ވިޖަން ޑައިރެކްޓްކުރާ އެ ފިލްމު އަންނަ އަހަރުގެ ސެޕްޓެމްބަރު 5 ގައި ރިލީޒްކުރާ ގޮތަށް ހަމަޖެހިފައިވާއިރު އެ ފިލްމާ ގުޅޭ ތަފްސީލެއް އަދި އާންމެއް ނުކުރެ އެވެ.