08 ސެޕްޓެމްބަރ 2022 - 15:36
ކުރީގެ ރައީސް އަބްދުﷲ ޔާމީންގެ މައްޗަށް ކުރާ މަނީ ލޯންޑަރިން އާއި ރިޝްވަތުގެ ދައުވާގެ ޝަރީއަތް މިއަދު ކެންސަލްކޮށްފައި ވާތީ، މިއީ ހެކިންނަށް ނުފޫޒު ފޯރުވަން ލިބޭ ފުރުސަތަކަށް ވެދާނެތީ މިއަދު ނޫނީ ހަފްތާ ބަންދުގައި ނަމަވެސް އެ އަޑުއެހުން ބާއްވައިދިނުމަށް ޕީޖީ އޮފީހުން ކްރިމިނަލް ކޯޓުގައި މިއަދު އެދެފި އެވެ.
ވ. އާރަށް ކުއްޔަށް ދިން މައްސަލާގައި ޔާމީނަށް އުފުލާފައިވާ ދައުވާތަކުގެ ދިފާއުގައި ހެކިންގެ ހެކިބަސް ނަގަން މިއަދު ހެނދުނު 10:00 އަށް ތާވަލްކުރި އަޑުއެހުން ކެންސަލްކުރީ ޔާމީން އާލާސްކަންފުޅާ އުޅުއްވާ ކަމަށް ވިދާޅުވެ ކޯޓަށް ފޮނުއްވި ސިޓީއަކާ ގުޅިގެންނެވެ.
ޕީޖީ އޮފީހުގެ އޮފިޝަލަކު ވިދާޅުވީ މީގެ ކުރީގެ އަޑުއެހުންތަކުގައި ވެސް، ދިފާއުން ހުށަހަޅާފައިވާ ހެކިންގެ ހެކިބަސް ވަކިވަކިން ނެގުމަކީ އެކަމުގެ ސަބަބުން ހެކި އުފެއްދުމުގެ ދޮރު ހުޅުވިދާނެ ކަމެއްގެ ގޮތުގައި ފާހަގަކޮށްފައިވާނެ ކަމަށެވެ. އަދި އިއްޔެ ދިފާއީ ހެކިވެރިޔާ ހެކިބަސް ދިންއިރު، ގިނަކަންތައްތަކެއް ހަނދާން ނެތުމާއި، ސަބަބުވެރި އިންސާނަކަށް ގަބޫލުނުކުރެވޭ ވާހަކަތަކެއް ދައްކާފައިވާ ކަމަށާއި ދިފާއަށް އިތުރު ވަގުތު ލިބޭގޮތަށް މައްސަލަ ތާވަލުކުރާ ނަމަ، ދިފާއީ ހެކިންގެ ހެކިބަސް އިތުރަށް ތަޣައްޔަރުވެ، އިންސާފުގެ ދޮރު ބަންދުވެދާނެ ކަމަށް ބަޔާންކޮށް ކޯޓަށް މިއަދު ސިޓީއެއް ފޮނުވާފައި ވާނެ ކަމަށް އޮފިޝަލް ވިދާޅުވި އެވެ.އިއްޔެ ޔާމީނާ އެއްކޮޅަށް ހެކިބަސް ދެއްވީ މާލޭގެ ޑެޕިއުޓީ މޭޔަރު އަހްމަދު ނަރީޝް އެވެ.
އޭނާ ވިދާޅުވީ ޔާމީނަށް ލިބިވަޑައިގެން އެއް މިލިއަން ޑޮލަރަކީ އެޔަށްވާ ދިވެހި ރުފިޔާ ފެލިދޫ ދާއިރާގެ ކުރީގެ މެންބަރު ޔޫސުފް ނައީމަށް ދީފައި ބައްލަވައިގެން އެއްޗެއް ކަމަށެވެ. އެ ޑޮލަރަށްވާ 15،420،000ރ.، ޔާމީންގެ ގެކޮޅަށް ހަމަ އެ ދުވަހު ގޮސް ގުނައި އަދި ހަމަ އެ ދުވަހު ޔޫސުފް ނައީމާ ހަވާލުކުރި ކަމަށް ނަރީޝް ވިދާޅުވި އެވެ.
އެހެންވެ ޕީޖީ އޮފީހުން އެދުނީ މިއަދު އެހެން ވަގުތެއްގައި މި މައްސަލަ ތާވަލުކުރެވެން އޮތް ނަމަ އެ ގޮތަށް ތާވަކުރުމަށެވެ، އެ އިންތިޒާމު ހަމަޖެއްސެން ނެތް ނަމަ ހުކުރު ނުވަތަ ހޮނިހިރު ދުވަހު ނަމަވެސް އަޑުއެހުން ބާއްވައިދޭން އެދިފައިވާނެ ކަމަށް އޮފިޝަލް ވިދާޅުވި އެވެ.
އޮފިޝަލް ވިދާޅުވި ގޮތުގައި، ދައުވާލިބޭ ފަރާތްތަކުން އެދިގެން ދައުލަތުގެ ހެކިންގެ ހެކިބަސް އެއް ދުވަހެއްގައި މީގެ ކުރިން ނަގާފައި ވާތީ، ދައުލަތަށް ވެސް ހަމަހަމަ ފުރުސަތު ދިނުމަށް ޝަރީއަތުގައި ވެސް އެދިފައިވާ ފަދައިން ސިޓީގައި ވެސް އެދިފައި ވާނެ އެވެ. އަދި ޝަރީއަތް ބޭއްވުމުގެ ކުރިން ހެކިވެރިންނާ ބައްދަލުނުކުރުމަށް ޝަރީއަތުން އަންގައިދިނުމަށް ވެސް އެދިފައިވާނެ ކަމަށް ވިދާޅުވި އެވެ.
މިދިޔަ ތިން ދުވަހު ވެސް މި މައްސަލާގައި ޝަރީއަތް ކުރިއަށް ގެންގޮސްފައި ވާއިރު މިއަދަށް ހެކި ބަސް ނެގުމަށް ތާވަލްކޮށް އިއްޔެ އިސް ގާޒީ އަހްމަދު ޝަކީލް އެކަން އިއުލާނުކެއްވުމުން ޔާމީންގެ ވަކީލުން އިއްޔެ ވެސް ވަނީ ޝަރީއަތް އެހެން ދުވަހަކަށް ތާވަލްކޮށްދިނުމަށް އެދިފަ އެވެ. އަދި ޔާމީނަށް ރިޝްވަތު ދިން ކަމުގެ ދައުވާ ލިބޭ ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ ފަރާތުން ވެސް އެގޮތަށް އެދުނެވެ. ނަމަވެސް އެކި ސަބަބުތަކާ ހުރެ ބައެއް އަޑުއެހުންތައް ކެންސަލް ވެފައި ވާތީ ގާޒީ ނިންމެވީ މިއަދު ވެސް އަޑުއެހުން ބާއްވާށެވެ.
މިއަދު ތިން ހެކިވެރިޔަކު ހާޒިރުކުރާނެ ކަމަށާއި ދެން އޭގެ ފަހުން އަޑުއެހުމެއް އޮންނާނީ މި މަހުގެ 25 އާއި 29 ގައި ކަމަށް ގާޒީ ވިދާޅުވި އެވެ. ގާޒީ ވިދާޅުވި ގޮތުގައި ޝަރީއަތުގެ ތާވަލެއް އަލުން ކަނޑައަޅާނީ އޭގެ ފަހުންނެވެ.