04 އޮކްޓޯބަރ 2022 - 13:56
މިހާރު ކުރިއަށްދާ އެމެރިކާގެ މޭޖާ ލީގު ނިމުމުން ފުޓްބޯޅަ ކުޅުން ހުއްޓާލާނެ ކަމަށް އެ ލީގުގެ އިންޓަ މަޔާމީގެ އާޖެންޓީނާގެ ފޯވާޑް ގޮންޒާލޯ ހިގުއައިން ބުނެފި އެވެ.
ލެޖެންޑްރީ ފޯވާޑް ބުނީ މިވަގުތު އެންމެ ބޮޑު ފޯކަސްއަކީ ރަނގަޅު ކާމިޔާބަކާ އެކު ކެރިއަރު ނިންމާލުން ކަމަށެވެ. އޭނާގެ އަމާޒަކީ ފިލް ނެވިލް ކޯޗުކޮށްދޭ ޓީމު ލީގުގެ ޕްލޭ އޮފާ ހަމައަށް ގެންގޮސްދިނުމެވެ. އެކަމަކު ތަށީގެ ވިސްނުން ވެސް އެބަހުއްޓެވެ.
"މޭޖާ ލީގުގެ ޗެމްޕިއަނެއްގެ ގޮތުގައި ކެރިއަރު ނިންމާލުން ވެގެންދާނީ ހުވަފެނަކަށް،" އޭނާ ބުންޏެވެ.
އުމުރުން 34 އަހަރުގެ ފޯވާޑް ކުޅުން މި ހުއްޓާލަނީ ރަނގަޅު ފޯމެއްގައި ހުއްޓަ އެވެ. އޭނާ ވަނީ މިދިޔަ 14 މެޗުން 12 ގޯލް ޖަހައިދީފަ އެވެ.
"ފުޓްބޯޅަ އަށް އަލްވަދާއު ކިޔަން ޖެހޭ ދުވަސް އަތުވެއްޖެ. ރަނގަޅާއި ގޯސް ހިނދުކޮޅުތަކާ އެކު، މި ކުޅިވަރުގެ ތެރޭގައި އުޅެވުމަކީ ފަހުރެއް. މި ދާއިރާ އިން އަހަންނަށް އެތައް ކަމެއް ހާސިލްކޮށްދީފި،" ހިގުއައިން ބުންޏެވެ.
ހިގުއައިން ވަނީ އާޖެންޓީނާ ގައުމީ ޓީމަށް 75 މެޗުން 31 ގޯލް ޖަހައިދީފަ އެވެ. އޭނާ ވަނީ އާޖެންޓީނާއާ އެކު 2014 ގެ ވޯލްޑް ކަޕާއި 2015 ގެ ކޮޕާ އެމެރިކާގެ ފައިނަލަށް ދަތުރުކޮށްފަ އެވެ. ގައުމީ ޓީމުގައި އޭނާގެ ދަތުރު ނިމުނީ 2018 ގެ ވޯލްޑް ކަޕުގެ ދެ ވަނަ ބުރުން އާޖެންޓީނާ ކެޓުމުންނެވެ.
އާޖެންޓީނާގެ ރިވާ ޕްލޭޓުން 2005 ގައި ކްލަބް ކެރިއަރު ފެށި ހިގުއައިން ވަނީ ސްޕެއިނުގެ ރެއާލް މެޑްރިޑަށް 264 މެޗުން 121 ގޯލް ޖަހައިދީފަ އެވެ. އެ ޓީމާ އެކު ސްޕެނިޝް ލީގު ތިން ފަހަރު ކާމިޔާބުކުރި އެވެ.
ފަހުން އޭނާ ވަނީ އިޓަލީގެ ނަޕޯލީ އަށް ބަދަލުވެ އެ ލީގުގެ ރެކޯޑް އަދަދަކަށް ގޯލް ޖަހައިފަ އެވެ. އެކަމަކު އެ ޓީމާ އެކު ލިބުނު ހަމައެކަނި ކާމިޔާބަކީ އިޓާލިއަން ކަޕް ކާމިޔާބުކުރުމެވެ.
ފަހުން އިޓަލީގެ ޔުވެންޓަސް އަށް ބަދަލުވެ އިޓަލީ ލީގު ތިން ފަހަރު، އިޓާލިއަން ކަޕް ދެ ފަހަރު ހޯދައި ޗެމްޕިއަންސް ލީގު ފައިނަލަށް ދަތުރުކޮށްފަ އެވެ. އޭނާ ވަނީ ޔުވެންޓަސްގެ ލޯނެއްގެ ދަށުން އޭސީ މިލާނާއި ޗެލްސީ އަށް ވެސް ކުޅެފަ އެވެ.