11 ޖެނުއަރީ 2017 - 06:24
އެމެރިކާގައި ކޮންމެ އަހަރަކު ބާއްވާ ގޯލްޑަން ގްލޯބް އެވޯޑްސް ހަފުލާ ބާއްވަނީ އޮސްކާ އެވޯޑް ހަފުލާ ފަދައިން ވަރަށް ބޮޑުކޮށް އަދި ކުލަ ގަދަކޮށެވެ. އެމެރިކާ އާއި އެހެން ގައުމުތަކުގައި އުފައްދާ ޓީވީ ސީރީޒް އަދި އެކި ފިލްމްތަކަށް އެވޯޑް ދޭ މިހަފުލާ ދުނިޔޭގެ އެކި ކަންކޮޅުތަކުން ބަލަ އެވެ. ގޯލްޑަން ގްލޯބްގެ ރަތް ދޫލަ މަތީގައި ތަރިން ލައިގެން ތިބޭ ހެދުންތަކަށް މިހާރު ލިބޭ ސަމާލުކަން ވެސް ވަނީ ބޮޑުވެފަ އެވެ.
އެހެން އަހަރުތަކެކޭ އެއްފަދައިން މިއަހަރު ވެސް އެކި ފާޑުފާޑުގެ ގައުންތައް ފެނުނެވެ. އެމާ ސްޓޯން، ޒޯއީ ސެލްޑާނާ ފަދަ މަޝްހޫރު ތަރިން، ވަރަށް ހިތްގައިމު ގޮތްގޮތަށް ފަރުމާކޮށްފައިވާ ހެދުންތަކާ އެކު ފެނުނެވެ. ގަޔަށް ބާރު ހަމުގެ ކުލައާ އެއްގޮތް ކުލަތަކުން ގައުން ފަރުމާކޮށްފައި ހުރިތަން މީގެ ކުރިން ފެނުނަސް މިފަހަރުގެ ރެޑް ކާޕެޓް މަތިން ފެނުނު އެންމެ މަގުބޫލު ސްޓައިލަކީ ވިދާ ފޮތި، ފިޔާތޮށި އަދި ބްލަޝް ޓޯނުގެ ކުލަތަކެވެ.
އެހެން ފަހަރުތަކާ ހިލާފަށް މިއަހަރުގެ ހަފުލާގައި އަންހެން ތަރިންނަށްވުރެ ސްޓައިލްގެ ގޮތުން އެންމެ ބޮޑަށް ވިދާލީ ފިރިހެން ތަރިންނެވެ. އެގޮތުން ބަތަލާ ރާޔަން ގޮސްލިން ލައިގެން ހުރީ ގުޗީ ބްރޭންޑުގެ ހުދު ކުލައިގެ ޓަކްސީޑޯ އެކެވެ. މިއީ އެރޭގެ އެންމެ ފުރިހަމަ "ލުކް" ކަމަށް ގިނަ ބަޔަކު ބުނެފައިވެ އެވެ.
ގިލްމޯ ގާލްސް އަދި ރޮކީ ފަދަ މަގުބޫލު ފިލްމު ތަކުގައި އެކްޓު ކުރި މައިލޯ ވެންޓިމިގްލިއާގެ ނޫ ޓަކްސީޑޯ ސޫޓަކީ ރެލްފް ލައުރަންގެ ޑިޒައިނެކެވެ. އާއްމުކޮށް ގަދަ ނޫ ކުލަ އަކީ ހަފުލާތަކާ ގުޅުވާލަން ވަރަށް އުނދަގޫ ކުލަ އެކެވެ. ނަމަވެސް، މައިލޯގެ ނޫ ސޫޓު ފަރުމާކޮށްފައި ވަނީ ވަރަށް ފުރިހަމަކޮށް އޭނާގެ ގަޔަށް ފިޓުވާ ގޮތަށެވެ. އަދި ނޫ ކުލަ އާއި ކަޅު ކުލަ ގުޅުވާލާފައި ހުރި ގޮތް ވަރަށް ނަލަ އެވެ.
ލަވަކިޔުންތެރިއާ އަދި މޮޑެލް ކްރިސީ ޓީގެންގެ ފިރިމީހާ ޖޯން ލެޖެންޑުގެ ކަޅު ޓަކްސީޑޯ ފަރުމާކޮށްފައިވަނީ އޭނާގެ ގަޔަށް ވަރަށް ހެޔޮވަރުކޮށެވެ. ފެޝަން ޑިޒައިނާ ޓޮމް ފޯޑުގެ ފުރަތަމަ ފީޗާ ފިލްމް ނޮކްޓާނަލް އެނިމަލްސް އަކީ ގިނަ ބައެއްގެ ތައުރީފު ލިބިފައިވާ ފިލްމެކެވެ. ޓޮމް ފޯޑަކީ އޭނާގެ ފުރިހަމަ ސްޓައިލަށް އަބަދުވެސް ފާހަގަވެފައިވާ ޑިޒައިނަރެކެވެ.
ގޯލްޑަން ގްލޯބްސަށް އޭނާ ލައިގެން ހުރީ ކަޅު ކުލައިގެ ޓޮމް ފޯޑް ބްރޭންޑުގެ ކްލެސިކް ޓަކްސީޑޯ އެކެވެ. ސްޓްރޭންޖާ ތިންގްސް އަކީ މިދިޔަ އަހަރު މަގުބޫލުވި ސީރީޒެކެވެ. އަދި އޭގައި ފެންނަ ޒުވާން އެކްޓަރުން ވެސް މަޝްހޫރު ވެއްޖެ އެވެ. ކޭލެބް، ގޭޓަން އަދި ނޯއާ ހުދާއި ކަޅު ކުލައިގެ ސޫޓު ލައިގެން ރަތް ދޫލަ މަތީ ހިނގާލި އެވެ.