01 ނޮވެމްބަރ 2022 - 10:03
އަންނަ އަހަރަށް ލަފާ ކުރާ ބަޖެޓުގައި މި އަހަރުގެ ބަޖެޓު ފޫބައްދަން ފައިސާ ހިމަނާފައިވާތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަންބޮޑުވުން ފާޅު ކުރައްވައިފި އެވެ.
އަންނަ އަހަރަށް ލަފާ ކުރާ ބަޖެޓާއެކު މި އަހަރުގެ ބަޖެޓް ފޫބައްދަން 5.8 ބިލިއަން ރުފިޔާ އިތުރު ކުރަން ޖެހިވަޑައިގަންނަވާ ކަމަށް ފިނޭންސް މިނިސްޓަރު އިބްރާހިމް އަމީރު އިއްޔެ މަޖިލީހުގައި ވިދާޅުވި އެވެ.
މަޖިލީހުގެ މިއަދުގެ ޖަލްސާ ފައްޓަވަމުން ނަޝީދު ވިދާޅުވީ މި އަހަރަށް މަޖިލީހުން ފާސް ކޮށްފައި ވަނީ 36.9 ބިލިއަންގެ ބަޖެޓެއް ކަމަށާއި އަންނަ އަހަރަށް ލަފާ ކުރި ބަޖެޓުގައި މި އަހަރަށް އިތުރަށް ހިމެނި ފައިސާއާ އެކު އެ އަދަދު 42.8 ބިލިއަން ރުފިޔާ އަށް އަރާ ކަމަށެވެ.
މަޖިލީހުން ހުއްދަ ލިބިގެން މެނުވީ މަޖިލީޙުން ފާސްކޮށްފައިވާ ވަރަށް ވުރެ އިތުރަށް ބަޖެޓުން ހަރަދު ކޮށްގެން ނުވާނެ ކަމަށް ގާނޫނުއަސާސީގެ 96 ވަނަ މާއްދާގެ ނ. ގައި ވަރަށް ސާފުކޮށް ބަޔާން ކުރާ ކަމަށް ނަޝީދު ވިދާޅުވި އެވެ. އަދި ބަޖެޓަށް އިތުރަށް ބޭނުންވާ ފައިސާއެއް މަޖިލީހުން ފާސް ކުރުމަށް ސަޕްލިމެންޓަރީ ބަޖެޓެއް ހަދައި، އެ ފައިސާ ބޭނުންވާ ދުވަހުގެ އެއް މަސް ދުވަސް ކުރިން މަޖިލީހަށް ހުށަހަޅަން ޖެހޭނެ ކަމަށް ދައުލަތުގެ މާލިއްޔަތުގެ ގާނޫނުގެ 32 ވަނަ މާއްދާގެ ބ. ގައި ވެސް ބުނާ ކަމަށް ނަޝީދު ވިދާޅުވި އެވެ.
އެހެންވެ 2023 ގެ ބަޖެޓް ތެރޭގައި މި އަހަރުގެ ސަޕްލިމެންޓަރީ ބަޖަޓަކަށް ވާ ފައިސާ ހިމެނޭނެ ގޮތެއް ނުފެންނަ ކަމަށް ނަޝީދު ވިދާޅުވި އެވެ.
"ނޮވެމްބަރު މަހާއި ޑިސެމްބަރު މަހާ ދެ މަސް ތެރޭގައި 5.8 ބިލިއަން ރުފިޔާ އިތުރަށް ހަރަދު ކުރައްވާނެ ކަމަށް އަޅުގަނޑަށް އަންދާޒާއެއް ނުކުރެވޭ. އެހެންވީމަ މިހާތަނަށް އައިއިރު މަޖިލީހަށް ހުށަހަޅުއްވައި ފާސް ކުރުމެއް ނެތި އެ އިތުރުވާ މިންވަރުގެ ތެރެއިން ކިހާ މިންވަރެއް ހަރަދު ކުރައްވާފައިވާ ކަން ވެސް ސާފުވާކަށް ނެތް،" ނަޝީދު ވިދާޅުވި އެވެ.
މިއީ ވަރަށް ބޮޑު މައްސަލައެއް ކަމަށާއި މަޖިލީހުގެ މެމްބަރުން ވެސް ހަނދާނުގައި ބަހައްޓަން ޖެހޭ ކަމެއް ކަމަށް ނަޝީދު ވިދާޅުވި އެވެ.
މެމްބަރުން އެދިވަޑައިގަންނަވާ ގޮތަކަށް ކަންކަން ހިނގަމުން ދިޔަ ނަމަވެސް ސަރުކާރުން ހުށަހަޅާ ބިލުތަކާއި ބަޖެޓުތައް ގާނޫނީ އޮނިގަނޑުން ބޭރު ވާނަމަ ދުވަހަކަށް ވުރެ ދުވަހެއް އަތުން ކަންކަން ދޫވަމުންދާނެ ކަމަށް ނަޝީދު ވިދާޅުވި އެވެ.
"ވަކި އިޖުރާއަތުތަކެއް ގާނޫނުގައި ކަނޑައަޅާފައި ވަނިކޮށް މިތަނުގައި ސަރުކާރަށް ތާއީދު ކުރާ މެންބަރުން އިތުރުވީ ކަމަށް ވަޒީރު ބޭފުޅުން ދެކިވަޑައިގަންނަވާ ފަސޭހަ ގޮތަށް ކަންކަން ފިރުކާލެއްވީމަ އަޅުގަނޑު ދެކޭ ގޮތުގައި އެއީ އަޅުގަނޑުމެންގެ ޑިމޮކްރަސީ އަށް ވެސް އަދި މި ރައްޔިތުންގެ މަޖިލީހުގެ ގަދަރާއި ކަރާމާތާއި އިއްޒަތަށް ވެސް ލިބޭ އުނިކަމެއް،" ނަޝީދު ވިދާޅުވި އެވެ.