06 ނޮވެމްބަރ 2022 - 12:37
އިންޑިއާގެ ފަހުގެ ޖީލުގެ އެންމެ ކާމިޔާބު އަންހެން ބަތަލާ އާލިއާ ބަޓް މިއަދު ވިހައިފި އެވެ. އޭނާ އަށް ލިބުނީ އަންހެން ކުއްޖެކެވެ.
މިހާރު ބޮލީވުޑްގައި އެންމެ މަޝްހޫރު ޖޯޑު އާލިއާ ބަޓް އާއި ރަންބީރް ކަޕޫރުގެ ފުރަތަމަ އަލަތު ދަރި ވިހެއުމަށް އެޗް.އެން ރިލަޔަންސް ހޮސްޕިޓަލަށް ދިޔައީ މިއަދު ހެނދުނު 7:30 ގައި ކަމަށް ރިޕޯޓުތަކުން ބުނެ އެވެ.
މި ދެމަފިރިންނާ އެކު ރަންބީރު ކަޕޫރުގެ މަންމަ ނީތު ކަޕޫރާއި އާލިޔާގެ މަންމަ ސޯނީ ރަޒްދާން އަދި އާލިޔާގެ ދައްތަ ޝާހީން ބަޓް ވެސް ހޮސްޕިޓަލަށް ދިޔަ އެވެ.
ފަސް އަހަރުގެ ލޯބީގެ ގުޅުމަށް ފަހު، އާލިއާ އާއި ރަންބީރް ކައިވެނި ކުރީ މި އަހަރުގެ އޭޕްރީލް މަހު އެވެ.
ކައިވެންޏަށް މާގިނަ ދުވަސްތަކެއް ނުވަނީސް އާލިއާ އިންސްޓަގްރާމުގައި ވަނީ އަލްޓްރާސައުންޑް ލެބް ރިޕޯޓަކާއެކު އޭނާ ބަނޑުބޮޑުކަން އިއުލާން ކޮށްފަ އެވެ.
އާލިއާ ބަނޑުބޮޑު އިރު ވެސް ވަނީ ވަރަށް ގިނަ މަސައްކަތްތަކުގައި ބިޒީކޮށް މަސައްކަތް ކޮށްފަ އެވެ. އޭގެ ތެރެއިން ފިލްމް "ބްރަމަސްތުރާ"ގެ ގިނަ ޕްރޮމޯޝަނަލް އިވެންޓްސްތަކުގައި ބައިވެރިވި އެވެ.
މީގެ އިތުރުން ހޮލީވުޑް ފިލްމު "ދަ ހާޓް އޮފް ސްޓޯން" ޑެބް ކުރުމުގެ މަސައްކަތް ފާހަގަ ކުރެވެ އެވެ. އަދި އާލިއާ ވަނީ އޭނާގެ އަމިއްލަ މެޓާނިޓީ ބްރޭންޑެއް ވެސް ލޯންޗު ކޮށްފަ އެވެ.
ދެ ފަރާތުގެ އާއިލާ އިން ވަނީ ވަރަށް ފަހުން އާލިއާ އަށް ބޭބީ ޝަވާއެއް ވެސް ދީފަ އެވެ.