08 ޖޫން 2016 - 14:39
ނިއު ދިއްލީ (ޖޫން 8) - ވޭތުވެދިޔަ ހަތަރު ދުވަހު އިންޑިއާގެ ބޮޑު ވަޒީރު ނަރެންދުރަ މޯދީގެ ޝެޑިއުލަށް ބަލާއިރު އެމަނިކުފާނަށް ވަރަށް ބުރަ އެވެ. ތަފާތު ޓައިމް ޒޯނުގެ ތިން ކޮންޓިނެންޓުގެ ހަތަރު ގައުމަކަށް ވަޑައިގެންނެވި އެވެ. ޖޫން 9 ވަނަ ދުވަހު ފަސް ވަނަ ގައުމު ކަމަށްވާ މެކްސިކޯ އަށް ވަޑައިގަންނަވާނެ އެވެ.
މޯދީގެ ދަތުރުފުޅުގެ ޝެޑިއުލް ވަރަށް ބުރަ އެވެ. ކޮންމެ ގައުމެއްގައި ވެސް ހޭދަކުރައްވާ މަދު ގަޑިތަކުގައި ގިނަ ބައްދަލުވުންތައް ބާއްވަ އެވެ. އަނެއްކޮޅުން ޖޫން 10 ވަނަ ދުވަހު ނިއު ދިއްލީ އަށް ވަޑައިގެން ފުލް ދުވަހެއްގެ މަސައްކަތް ކުރައްވާނެ އެވެ.
ފަސް ގައުމަށް ވަޑައިގަތުމަށް މޯދީ 33،000 ކިލޯ މީޓަރަށް ދަތުރު ކުރައްވާނެ އެވެ. ފަސް ގައުމުގައި 45 އަށް ވުރެ ބައްދަލުވުން ބާއްވާނެ އެވެ. މި ގައުމުތަކަށް ވަޑައިގަތުމަށް އެއާ އިންޑިއާ ވަންގައި 44 ގަޑިއިރު ހޭދަކުރައްވާނެ އެވެ.
މޯދީ އިންޑިއާ އިން ފުރާވަޑައިގެންނެވީ ޖޫން 4 ވަނަ ދުވަހު ހެނދުނެވެ. އަފްޣާނިސްތާނަށް ވަޑައިގެން ހަތަރު ގަޑިއިރު ހޭދަކުރެއްވި އިރު ސަލްމާ ޑޭން އިފްތިތާހު ކުރެއްވި އެވެ. އެ ދުވަހު ހަވީރު ގަތަރަށް ވަޑައިގެން ދެ ގައުމުގެ މެދުގައި ހަތް އެއްބަސްވުމެއްގައި ސޮއިކުރެއްވި އެވެ. ދޯހާގައި އިންޑިއާގެ މަސައްކަތްތެރިންނާ އެކު ފަރިއްކޮޅެއްގައި ބައިވެރިވެވަޑައިގެންނެވި އެވެ.
ޖޫން 5 ވަނަ ދުވަހު ސްވިޒަލެންޑަށް ވަޑައިގެން އެ ގައުމުގެ އޮފިޝަލުންނާ އެކު ނިއުކްލިއާ ސަޕްލަޔާސް ގްރޫޕުގައި އިންޑިއާ ބައިވެރި ކުރުމާ ބެހޭ ގޮތުން ބައްދަލުވުންތައް ބޭއްވި އެވެ. ޖޫން 6 ވަނަ ދުވަހު އެމެރިކާ އަށް ވަޑައިގެން ރައީސް ބަރަކް އޮބާމާއާ ބައްދަލު ކުރެއްވި އެވެ. އަދި އެމެރިކާގެ ކޮންގްރެސްގައި ތަގްރީރު ކުރެއްވުމަށް ފަހު ވިޔަފާރިވެރިންނާ ބައްދަލު ކުރެއްވުމަށް ވަނީ ހަމަޖެހިފަ އެވެ. މޯދީގެ ދަތުރުފުޅުގެ ފަހު މަންޒިލަކީ މެކްސިކޯ އެވެ.