30 ނޮވެމްބަރ 2022 - 15:48
ރަޖިސްޓްރީ ނުކުރާ ސިމް ބޭނުންކޮށްގެން ސްކޭމް ކޯލް ކުރުމާއި އެކަމާ ގުޅުން ހުރި މައްސަލަތައް ގިނަވާތީ އެކަން ހައްލު ކުރުމުގެ ގޮތުން، ޕްރީ އެކްޓިވޭޓަޑް ސީމް ކާޑު ވިއްކުން މާދަމާއިން ފެށިގެން މަނާވާނެ ކަމަށް ކޮމިއުނިކޭޝަން އޮތީރިޓީ އޮފް މޯލްޑިވްސް (ކެމް) އިން މިއަދު ބުނެފި އެވެ.
އެ އޮތޯރިޓީން ކުރި އިއުލާނެއްގައި ބުނީ މުއާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ދުވަހުން ދުވަހަށް އިތުރުވަމުން ދިއުމާ އެކު، އެފަދަ އަމަލުތައް މަދުކުރުމަށް އަޅާ ފިޔަވެޅެއްގެ ގޮތުން، މޯބައިލް ފޯނު ހިދުމަތް ހޯދުމަށް ބޭނުންކުރާ ސިމްކާޑު ދޫކުރާ އުސޫލަށް ބަދަލުތަކެއް ގެނެސްފައިވާ ކަމަށެވެ.
އުސޫލަށް ގެނައި ބަދަލުތަކާ އެކު، ސިމްކާޑު ކަސްޓަމަރުންނަށް ދޫކުރުމުގެ ކުރިން ހުންނާނީ ބޭނުންނުކުރެވޭ (ނޮން އެކްޓީވޭޓަޑް ސްޓޭޓަސް) ހާލަތުގައި ކަމަށް ކޭމް އިން ބުންޏެވެ.
"ސިމްކާޑު އެކްޓިވޭޓް ވާނީ، ސިމްކާޑު ދޫކުރާ ކަސްޓަމަރުގެ ފުރިހަމަ މައުލޫމާތު ސާވިސް ޕްރޮވައިޑަރަށް ލިބުމުންނެވެ،" އެ އޮތޯރިޓީން ބުންޏެވެ.
އެކަމާ ބެހޭ އިތުރު ތަފުސީލު، ހިދުމަތް ހޯދަން ބޭނުންވާ ސާވިސް ޕްރޮވައިޑަރުގެ ފަރާތުން ލިބޭނެ ކަމަށް ކެމް އިން ބުންޏެވެ. އަދި ސިމްކާޑު ދޫކުރުމުގެ އުސޫލު ހަރުދަނާކުރުމަށް އެ އޮތޯރިޓީން ކުރަމުން އަންނަ މަސައްކަތްތަކުގެ ދަށުން ކުރިއަށް އޮތްތަނުގައި އިތުރު ކަންކަން ވެސް ކުރާނެ ކަމަށް ބުންޏެވެ.
ޓެލެކޮމިއުނިކޭޝަން ހިދުމަތް ދޭ ކުންފުނިތަކުން އަމަލުކުރަން ޖެހޭ އުސޫލުތައް ލުއިކޮށް އޮތުމުގެ ސަބަބުން ރަޖިސްޓާ ނުކޮށް ހުންނަ ސިމްތައް ބޭނުން ކޮށްގެން ސްކޭމް ކޯލް ކުރުމުގެ މައްސަލަ އޮތީ ވަރަށް ބޮޑުވެފަ އެވެ.
އޮޅުވާލައިގެން ފައިސާ ހޯދަން ގުޅާ މީހުންގެ މައްސަލަ ތަހުގީގު ކުރުމުގައި ވެސް ދިމާވާ އެންމެ ބޮޑު އެއް ގޮންޖެހުމަކީ ސިމްތަކުގެ ރަޖިސްޓްރޭޝަންގެ މައްސަލަތަކާއި ލިމިޓެއް ނެތި ސިމް ވިއްކުން ކަމަށް ފުލުހުން ވެސް ވަނީ ބުނެފަ އެވެ.
ސްކޭމް ކޯލް ކުރާ މައްސަލާގައި "މިހާރު" އާ ވާހަކަ ދެއްކި މައުލޫމާތު އެނގޭ ބައެއް ފަރާތްތަކުން ބުނެފައިވާ ގޮތުގައި އެންމެ މީހެއްގެ ނަމުގައި އެތައް ހާސް ސިމް ނަގާފައި ހުރި މައްސަލަތައް ވެސް އެބަހުއްޓެވެ. އަދި ސްކޭމް ކޯލް ކުރާ ފަރާތްތަކުގެ ސިމް ގިނަ ފަހަރަށް ހުންނަނީ ރަޖިސްޓާ ނުކޮށް ކަމަށާއި ރަޖިސްޓާ ކޮށްފައި ހުންނަ ސިމްތައް ރާއްޖޭގައި ނޫޅޭ ބިދޭސީއެއްގެ ނަމުގައި ވެސް ހުރެދާނެ ކަމަށް ތަޖުރިބާކާރުން ބުނެ އެވެ.