07 ޑިސެމްބަރ 2022 - 06:48
ކުށް ކުރުން ގިނަ އިންޑިއާގައި އަންހެނުންނާ މެދު ހިންގާ ނޭދެވޭ އަމަލުތައް ގިނަކަމާއި އާންމުކަން ދެކުނު ކޮރެއާ އަންހެނަކު މުމްބާއީގެ މަގަކުން ލައިވްކުރި ވީޑިއޯއަކުން ދުނިޔެއަށް އިތުރަށް ހާމަވެއްޖެ އެވެ.
ސޯޝަލް މީޑިއާގައި މަޝްހޫރު، ދެކުނު ކޮރެއާގެ ލައިވްސްޓްރީމާއެއް ކަމަށްވާ މިޔޮޗި ޕާކް އިންޑިއާގެ މުމްބާއީގެ މަގެއްގެ މަތިން ހިނގާފައި ދަމުން ލައިވްކޮށް ކިޔައިދެމުން ދިޔައީ އިންޑިއާގެ ކާނާތަކާއި ޝައުގުވެރިވާ ކަންކަމުގެ ވާހަކަ އެވެ. އެކަމަކު އެ ވަގުތު ލައިވްސްޓްރީމް ބަލަން ތިބި 12،000 އަށް ވުރެ ގިނަ މީހުންނަށް ފެނުނީ ދެ މީހަކު އައިސް އޭނާގެ އަތުގައި ހިފައި ގެންދަން އުޅުނު ތަނެވެ.
އެ މީހުންނާ ވާހަކަ ދައްކައިގެން އެ މީހުންގެ ކިބައިން ސަލާމަތްވާން އުޅެނިކޮށް އެކަކު މިޔޮޗިގެ މޫނުގައި މޫނު ޖައްސައި އިތުރަށް ފުރައްސާރަކުރި އެވެ.
އެ މީހުންގެ ކިބައިން މިޔޮޗި ސަލާމަތްކުރަން އައީ އެ ވަގުތު މިޔޮޗީގެ ލައިވްސްޓްރީމް ފޮލޯކުރަމުން ދިޔަ މީހެކެވެ. އެކަމަކު މިޔޮޗީ ބުނީ މިހެން ދިމާވިޔަސް އިންޑިއާގެ ރީތިކަން ބަލައިލަން ރަނގަޅު ކަމަށެވެ.
މިވީޑިއޯ ސޯޝަލްމީޑިއާގައި އާންމުވެ ވައިރަލްވުމާ އެކު ފުލުހުން ވަނީ މިޔޮޗީއާ ބެހުނު މީހުން ހޯދައި ހައްޔަރުކޮށްފަ އެވެ.