01 ޖެނުއަރީ 2023 - 03:55
ވުލްވަހެމްޓަން (ޑިސެމްބަރު 31) - ވުލްވްސް އާ ދެކޮޅަށް ދެ ވަނަ ހާފުގައި ކުޅެން އަރައި، މެޗުގެ ހަމައެކަނި ލަނޑު ޖަހައި މާކަސް ރަޝްފޯޑް މެންޗެސްޓާ ޔުނައިޓެޑް 1-0 އިން މޮޅު ކޮށްދީފި އެވެ.
މިރޭ ވުލްވްސް އާ ދެކޮޅަށް ކުޅުނު މެޗުގައި ޔުނައިޓެޑްގެ ކޯޗު އެރިކް ޓެން ހަގް ވަނީ ޔުނައިޓެޑުގެ އެންމެ ފޯމުގައި ހުރި ފޯވާޑް ރަޝްފޯޑް ފުރަތަމަ 11 އިން ބޭރު ކޮށްފަ އެވެ.
ރަޝްފޯޑް ފުރަތަމަ 11 އިން ބޭރު ކުރީ މެޗުގެ ކުރިން އޮތް ޓީމު ބައްދަލުވުމަށް ހާޒިރު ނުވެވިގެން ކަމަށް އޭނާ ވަނީ މެޗަށް ފަހު ހާމަ ކޮށްފަ އެވެ.
"އަހަރެންނަށް މާ ގިނައިރު ނިދުނީ، އެހެންވެ ޕްރީމެޗް މީޓިން އަށް ނާދެވުނީ. ކުޑަކޮށް ލަސްވީ. އެއީ ޓީމުގެ ގަވާއިދު، ކޯޗުގެ އެ ނިންމުން އަހަރެން ބަލައިގަންނަން،" މެޗަށް ފަހު ރަޝްފޯޑް ބުންޏެވެ.
ރަޝްފޯޑްގެ ބަދަލުގައި ޔުނައިޓެޑުން މިރޭގެ މެޗުގައި ފެށި އެޓީމުގެ ޒުވާޏް ފޯވާޑް އަލެހަންޑްރޯ ގާނާޗޯ އެވެ. އޭނާ އަށް ވަނީ މެޗުގެ ފުރަތަމަ ހާފުގައި ގޯލު ޖަހާނެ ހުސް ފުރުސަތެއް ލިބިފަ އެވެ. ނަމަވެސް އޭނާގެ ހަމަލާ، ވުލްވްސްގެ ކީޕަރު ޖޯސޭ ސާ ވަނީ ދިފާއު ކޮށްފަ އެވެ.
ދެ ވަނަ ހާފުގައި ގާނާޗޯ ގެ ބަދަލުގައި ކުޅެން އެރި ރަޝްފޯޑް 76 ވަނަ މިނިޓުގައި ގޯލު ޖެހީ ބްރޫނޯ ފެނާންޑޭޒް އާއެކު ރީތި ވަން-ޓޫ އެއް ހަދާލުމަށް ފަހު އެވެ. މެޗު ނިމެން ހަ މިނިޓަށް ވެފައި ވަނިކޮށް ރަޝްފޯޑް ދެ ވަނަ ގޯލެއް ޖެހި ނަމަވެސް ވީއޭއާރުން ވަނީ އޭނާ އޮފްސައިޑް ކަމަށް ނިންމައިފަ އެވެ.
އަދަބު ދިނުމުން ވެސް ރަޝްފޯޑް ކުޅެން އަރައި އޭނާގެ ފޯމުގައި ޓީމު މޮޅު ކޮށްދިނުމުން ކޯޗު ޓެން ހަގް ވެސް ހުރީ ހިތްހަމަޖެހިފަ އެވެ.
"އޭނާ ވަރަށް ރަނގަޅު، [އަދަބު ދޭން ނިންމި] ނިންމުމަށް ފަހު ވެސް. ގޯލެއް ޖަހައި، ވަރަށް އުޖާލާ ކޮށް ފެނުނީ. ނިންމުން ވަރަށް ރަނގަޅު،" ޓެން ހަގް ބުންޏެވެ.
މެޗުގެ އިތުރު ވަގުތުގައި ވުލްވްސްގެ ރަޔާން އައިޓް ނޫރީ ނެގި ކޯނަރަކުން ރައުލް ހިމިނޭޒް ބޮލުން ނުރައްކާތެރި ހަމަލާއެއް ފޮނުވާލި ނަމަވެސް ޔުނައިޓެޑްގެ ކީޕަރު ޑޭވިޑް ޑެހެއާ ވަނީ ހުށިޔާރު ކަމާއެކު ބޯޅަ ދިފާއު ކޮށްފަ އެވެ.
މި ނަތީޖާއާ އެކު ޔުނައިޓެޑް ވަނީ 16 މެޗުން 32 ޕޮއިންޓް ހޯދައިގެން ޕްރިމިއާ ލީގު ޓޭބަލްގެ ހަތަރު ވަނައަށް ޖެހިލައިފަ އެވެ.