07 ޖެނުއަރީ 2023 - 19:02
ރައީސް ކަމަށް އަލުން ކުރިމަތިލައްވަނީ "މައުމޫނީ ފިކުރެއް" އުފަންވަމުން ދާތީ އެކަމާ ކަންބޮޑުވެ ވަޑައިގެންނެވުމުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި ދ. ކުޑަހުވަދު އަށް ވަޑައިގެން އެ ރަށުގައި ވާހަކަފުޅު ދައްކަވަމުން ނަޝީދު ވިދާޅުވީ ތަރައްގީ ލިބޭނީ ވަޒީރުންނާއި ދައުލަތުގެ ވަޒީރުންގެ ކިބައިން އާދޭސްކޮށްގެން ކަމަށް ދެކިގެން ނުވާނެ ކަމަށެވެ. އަދި ކުރިން ރަައްޔިތުންނަށް ތަރައްގީ ލިބެނީ މަޖިލިސް މެމްބަރުންނާއި ވަޒީރުންނަށް ކަންކަން ކޮށްދީގެން ކަމަށް ވިދާޅުވެ، ވެރިކަމަށް އަލުން ކުރިމަތިލައްވަނީ އެ ފިކުރު އުފަންވަމުން ދާތީ އަދި އެކަމާ ކަންބޮޑުވާތީ ކަމަށް ވިދާޅުވި އެވެ.
"އަޅުގަނޑު އަލުން ނުކުމެ އެނބުރި އައިސް މި ހުރީ ކަންބޮޑުވެގެން. އަޅުގަނޑުމެންގެ ތެރޭގައި ޑިމޮކްރަސީއާ ދުރު، އަޅުގަނޑު ދަންނަވާނީ މައުމޫނީ ފިކުރެއް އެބަ ވަދެއޭ،" ކުރީގެ ރައީސް މައުމޫން އަބްދުލްގައްޔޫމްގެ ވެރިކަމަށް އިޝާރާތް ކުރައްވައި، ނަޝީދު ވިދާޅުވި އެވެ.
އެ މަނިކުފާނު ވިދާޅުވީ ރަށްރަށަށް ތަރައްގީ ގެނެވޭނީ ވަޒީރުންނަށް ކަންކަން ކޮށްދީގެން ކަމަށް މިހާރު ބައެއް ކައުންސިލަރުންނަށް ހީވާ ކަމަށެވެ. އެކަމަކު އެއީ އެކަން ވެގެންވާނެ ގޮތެއް ނޫން ކަމަށާއި ތަރައްގީ ހޯދާނީ ރައްޔިތުން އަމިއްލައަށް ކަމަށް ވިދާޅުވި އެވެ.
"އެކަނިވެރި މައިންގެ އިނާޔަތްތައް އެހެން ހުރިހާ އިޖްތިމާއީ ރައްކާތެރިކަމެއް އެއީ ވަޒީރެއްގެ ގޭދޮށުގައި މުގޯލި އަޅައިގެން އަޅުގަނޑުމެން ހޯދި އެއްޗެއް ނޫން. އެއީ އެކެއް އަނެކެއްގެ ކިބައިން އަޅުގަނޑުމެން ހިތްވަރު ހޯދައި، ބިރުފަހަނަ އަޅާ ގޮސް މި ރާއްޖެއަށް ތައާރަފްކުރި ވެރިކަމުގެ ނަތީޖާ،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި ތަރައްގީގެ މަޝްރޫއުތައް އިތުރުވެ، ރައްޔިތުންނަށް ފަސޭހަކަން ލިބިގެން ދިޔައީ ވެސް ޑިމޮކްރަސީގެ ސަބަބުންނެވެ. އަދި ވެރިންނާއި ވަޒީރުން ރުއްސައިގެން ލިބޭނެ އެދެވޭ ހެޔޮ ނަތީޖާއެއް ނެތް ކަމަށް އެމަނިކުފާނު ވިދާޅުވި އެވެ.
ސަރުކާރުގެ ތަރައްގީގެ މަޝްރޫއުތަކުގެ ސްޕީޑަށް ފާޑު ވިދާޅުވަމުން ނަޝީދު ވިދާޅުވީ ހަތަރު އަހަރުވީއިރު މަޝްރޫއުތައް ކުރިއަށް ދަނީ އެއްވެސް އަމާޒެއް ނެތި ކަމަށެވެ. އަދި އިންތިޚާބުތައް ކައިރިވެފައި އޮއްވާ ޓެކްސް ބޮޑު ކުރުން ފަދަ އެތައް ފިޔަވަޅުތަކެއް އެޅުމަކީ ސަރުކާރުން ހެދި ގޯހެއް ކަމަށް ވިދާޅުވި އެވެ.