14 ޖެނުއަރީ 2023 - 13:19
ތެހެރާން (ޖެނުއަރީ 14) - އިރާންގެ ޑިފެންސް މިނިސްޓްރީގެ ކުރީގެ ޑެޕިއުޓީ މިނިސްޓަރު އަލީ ރިޒާ އަކުބަރީ އަށް މަރުގެ އަދަބު ދީފި އެވެ.
އިރާންގެ އިތުރުން އިނގިރޭސިވިލާތުގެ ރައްޔިތުކަން ވެސް ހޯދައިފައިވާ އަކުބަރީ އަށް މަރުގެ އަދަބު ދިނީ ޖޫސޫކުރުމުގެ ތުހުމަތުގަ އެވެ. އޭނާ އަށް މަރުގެ އަދަބު ދިނީ ދަންޖައްސައިގެންނެވެ.
އިރާންގެ ސަރުކާރުން ބުނީ ސަރުކާރުގެ އިސްވެރިންގެ ހަރަކާތްތަކުގެ މައުލޫމާތު އިނގިރޭސި ޖާސޫސީ އިދާރާ އަށް އަކުބަރީ ފޯރުކޮށްދީފައިވާ ކަމަށެވެ. އޭނާ އަށް މަރުގެ އަދަބު ދިން އަނެއް ސަބަބަކަށް އިރާންގެ ސަރުކާރުން ބުނީ ގައުމުގެ އެތެރެއިންނާއި ބޭރުން ގައުމީ ސަލާމަތަށް ނުރައްކާވާ ފަދަ މައުލޫމާތުތައް ފޯރުކޮށްދިނުމެވެ. ޖާސޫސީ ބައްދަލުވުންތައް އޮސްޓްރިއާ އަދި ޔުނައިޓެޑް އެރަބް އެމިރޭޓްސްގައި ވެސް އޭނާ ބައިވެރިވެގެން ކުރިއަށް ގެންގޮސްފައިވާ ކަމަށް އިރާންގެ ސަރުކާރުން ބުނެ އެވެ.
އެ ތުހުމަތުތަކުގައި އަކުބަރީ ހައްޔަރު ކުރީ 2019 ގަ އެވެ. އިރާންގެ ސަރުކާރުން ވަނީ އެ ކުށްތަކަށް އޭނާ އިއުތިރާފުވެފައިވާ ވީޑިއޯއެއް އާންމުކޮށްފަ އެވެ. އެކަމަކު ބީބީސީ ފާރިސީން ފޮނުވި އޯޑިއޯއެއްގައި އަކުބަރީ ވިދާޅުވީ ވީޑިއޯގައި އޭނާ އިއުތިރާފް ވީ މަޖުބޫރުކޮށްގެން ކަމަށެވެ.
އަކުބަރީ ދަން ޖެއްސި ދުވަހެއް ސީދާ ނޭނގެ އެވެ. އެމެރިކާ އާއި އިނގިރޭސި ވިލާތުން ވެސް ބުނީ އަކުބަރީ އަށް މަރުގެ އަދަބު ދިނީ ސިޔާސީ ގޮތުން ކަންތައްތަކެއް ހާސިލު ކުރަން ކަމަށެވެ.