27 ޖެނުއަރީ 2023 - 00:31
އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ރައީސް އިބްރާހިމް މުހައްމަދު ސޯލިހު މި ފަހަރު ފުރަތަމަ ވަޑައިގަތް އިރު އެ މަނިކުފާނުގެ ބައްދަލުވުންތަކަށް އައްޑޫގެ އެކި ރަށްރަށުން ނުކުތް މީހުންގެ އަދަދު މަދުކަމުގެ ވާހަކަ ދެއްކެވުނެވެ. ރައީސް، މި މަހުގެ 13 އިން 15 އަށް ކުރެއްވި އެ ދަތުރުފުޅުގައި އެ މަނިކުފާނަށް މަރުހަބާ ކިޔަން ފޭދޫގައި ބޭއްވި އެއްވުމުގައި ވެސް މީހުން މަދުކަން ފާހަގަކުރެވުނެވެ. އެކަަމަކު ކެމްޕެއިން ނިންމަން އައްޑޫ ހިތަދޫގައި މިރޭ ބޭއްވި ޖަލްސާ ވަރަށް ތަފާތެވެ. ހިތަދޫ ސިޓީ ބާޒާރު ސަރަހައްދުގައި ބޭއްވި ޖަލްސާ އޮތީ ފުރި ބާރުވެފަ އެވެ.
އެތައް ހާސް ބަޔަކު ނުކުމެ، ރައީސް އިބްރާހިމް މުހައްމަދު ސޯލިހަށް އައްޑޫން އޮތް ތާއީދު ދައްކައިލި އެވެ. ގޮނޑިތައް ފުރިގެން އެތައް ބަޔަކު ތިބީ ކޮޅަށެވެ.
ހޮނިހިރު ދުވަހު ބާއްވާ އެމްޑީޕީގެ ޕްރައިމަރީގައި އެންމެ ގިނަ ބަޔަކު ވޯޓުލަނީ އައްޑޫންނެވެ. އެހެންވެ، އައްޑޫގެ ތާއީދު ރައީސަށް ވަރަށް މުހިންމުކަން ކެމްޕެއިންގެ އިސްވެރިން ވެސް ވިދާޅުވެ އެވެ.
ރައީސްއާއެކު ޖަލްސާ އަށް މިރޭ ވަޑައިގަތް ރައްޔިތުންގެ މަޖިލީހުގެ އައްޑޫގެ ތިން މެންބަރުން ވެސް ފާހަގަ ކުރެއްވީ އެއް ކަމެކެވެ. މީހުން މިރޭ އާދަޔާޚިލާފަށް ގިނަ ކަމެވެ.
އެ މެމްބަރުން ވިދާޅުވީ މިރޭގެ މަންޒަރުން އެނގޭ އެއްޗަކީ އައްޑޫން ރައީސް އިބްރާހިމް މުހައްމަދު ސޯލިހަށް ކާމިޔާބުކުރާނެ ކަމުގެ ޔަގީން ކަން ކަމަށެވެ. އައްޑޫގެ އަޣުލަބިޔަތު އެ މަނިކުފާނު ނަންނަގަވާނެ ކަމެވެ.
"އައްޑުއަށް ކޮށްދީފައިވާ މަސައްކަތްތަކަށް ފުރިހަމަ އަށް އާނއެކޭ ތިބޭފުޅުން ވިދާޅުވެއްޖެ. މިތަނަށް އެއްވެފައި ތި ތިބީ އެ މަސައްކަތްތައް ރަނގަޅު ވީމަ،" ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވި އެވެ.
"އަޅުގަނޑަށް ފެންނަނީ އައްޑޫ ސިޓީން ގޮތް ނިންމައިފިކަން،" އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވި އެވެ.
މިރޭގެ ޖަލްސާގައި ވާހަކަފުޅު ދައްކަވަމުން ރައީސް ވެސް ވިދާޅުވީ އެ މަނިކުފާނު ވަޑައިގަންނަވާ ކޮންމެ ރަށަކުން ވެސް ދިމާވާ ކޮންމެ މެންބަރެއް ވެސް ވިދާޅުވަނީ 30-40 އަހަރުން ވެސް ނުފެންނަ ތަރައްގީ އައި ގޮތުގެ ވާހަކަ ކަމަށެވެ.
ރިޔާސީ އިންތިހާބު ކާމިޔާބު ކުރަން އެމްޑީޕީގެ ގިނަ ސަޕޯޓަރުން ތިއްބެވީ އެ މަނިކުފާނާ އެކުގައި ކަމަށާއި އިންތިހާބު ބޮޑުތަނުން ކާމިޔާބު ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
"ހއ. ތުރާކުނުން ފެށިގެން އައްޑޫ ސިޓީ އާ ހަމައަށް މި ކުރާ ދަތުރުގައި ވަރަށް ސާފުކޮށް ފެންނަން އޮތީ މި ޕްރައިމަރީ އަޅުގަނޑުމެން ބޮޑު ތަނުން ކާމިޔާބުކޮށް ރިޔާސީ އިންތިހާބު ކާމިޔާބު ކޮށްދެވޭނެ ކަމުގެ ޔަގީން ކަން،" ރައީސް ވިދާޅުވި އެވެ.
އިންތިހާބުގައި ވާދަ ކުރައްވާ ދެ ލީޑަރުން ވެސް ވަނީ ކްމެޕެއިންގެ ފަހު ޖަލްސާ ނިންމާލައިފަ އެވެ.