17 ޖެނުއަރީ 2017 - 16:15
ހޮލީވުޑްގެ މަޝްހޫރު ބަތަލާ ލިންޒީ ލޯހަންގެ އިސްޓަގްރާމްގައި ހުރި ފޮޓޯތަކާއި ޕޯސްޓްކޮށްފައިވާ ލިޔުންތައް ކުއްލިއަކަށް ފޮހެލުމުން އެތައް ބަޔަކަށް ލިބުނީ ސިހުމެކެވެ.
އެކަމަކު އެންމެ ބޮޑު ހައިރާންކަމެއް ލިބުނީ އެ ހުރިހާ އެއްޗެއް ޑިލީޓްކޮށްލައި، މުސްލިމުން އެކަކު އަނެކަކާ ބައްދަލުވާ އިރު ސަލާމް ކުރުމުގެ ގޮތުން ބޭނުން ކުރާ އިބާރާތް ކަމަށްވާ "އަލައިކުމް ސަލާމް" އޭ ބުނެ، ކޮށްފައި އޮތް ޕޯސްޓުންނެވެ.
މީން ގާލްސް، ފްރީކީ ފްރައިޑޭ، އަދި ދަ ޕޭރަންޓް ޓްރެޕް ފަދަ ފިލްމްތައް ކުޅެފައިވާ ލިންޒީ، 30، އިސްޓަގްރާމް ސާފުކޮށްފައި މުސްލިމުންނާ ގުޅުން ހުރި އިބާރާތެއް ލިޔުމުން ގިނަ ބަޔަކު މިހާރު ގަބޫލްކޮށްގެން ތިބީ އޭނާ އިސްލާމް ދީން ގަބޫލުކުރީ ކަމަށެވެ.
އޭނާ އެކަން ކަށަވަރުކޮށް ނުދިން ނަމަވެސް މުސްލިމުން އަންނަނީ އިސްލާމް ދީނުގެ ހިދާޔަތް ލިންޒީ އަށް ލިބުނު ކަމަށް ގަބޫލުކޮށް، މަރުހަބާ ކިޔައި، ތަހުނިޔާގެ މެސެޖްތައް ވެސް ފޮނުވަމުންނެވެ.
ޓްވިޓާގައި މި ފޯރި ވަރަށް ގަދަ އެވެ.
"އަހަރެން ވަރަށް އުފާކޮށްފިން ލިންޒީ ލޯހަން އިސްލާމް ދީން ގަބޫލު ކުރި ކަމަށްޓަކައި. ބަރަކާތް ލައްވާށި،" މުސްލިމް ޒުވާން އަންހެނަކު ކުރި ޓްވީޓެއްގައި ބުންޏެވެ.
އެހެން މީހަކު ކުރި ޓްވީޓެއްގައި ބުނީ އޭނާ އިސްލާމްވި ވާހަކައަކީ ތެދެއް ނަމަ، އޭނާ އަށް މާތް ﷲ ތެދުމަގު ދައްކަވައިފި ކަމަށެވެ.
ލިންޒީ އިސްލާމް ދީން ގަބޫލު ކުރި ކަމަށް ވާހަކަ ފެތުރުމާ އެކު، މަޝްހޫރު ވަރަށް ގިނަ މީޑިއާތަކުން އެކަން އޭނާގެ ގާތުން ސާފު ކުރަން މަސަައްކަތް ކުރި އެވެ. އެކަމަކު އެކަމާ ބެހޭ ގޮތުން ލިންޒީ އެއްވެސް ވާހަކައެއް މިހާތަނަށް ނުދައްކަ އެވެ.
އިނގިރޭސިވިލާތުގެ ޑެއިލީ މެއިލުން ބުނި ގޮތުގައި އިސްލާމް ދީން ގަބޫލުކުރުމާ ބެހޭ ގޮތުން ލިންޒީގެ ތަރުޖަމާނާ ސުވާލު ކުރުމުން އޭނާ ވެސް ވަނީ އެކަމާ ބެހޭ ގޮތުން އެއްޗެއް ބުނަން އިންކާރުކޮށްފަ އެވެ.
މިދިޔަ އަހަރު ތުރުކީ އަށް ކުރި ދަތުރެއްގައި އެ ގައުމުގެ ޓީވީ ޝޯއަކަށް ދިން އިންޓަވިއުއެއްގައި ލިންޒީ ވަނީ ސައުދީ އަރަބިޔާ އާއި ލަންޑަނުގައި އުޅޭ އޭނާގެ މުސްލިމް ރައްޓެހިންގެ ފަރާތުން ހަދިޔާއަކަށް ކީރިތި ޤުރުއާން ލިބިފައި ހުރި ކަމަށް ބުނެފަ އެވެ.
އަދި ނިއުޔޯކްގައި އެ ފޮތް ކިޔަވައި، އޭގައި ބުނާ އެއްޗެއް ދަސްކުރަމުން އަންނަ ކަމަށް ލިންޒީ ބުންޏެވެ. އޭނާ އަދި ބުނީ ގުރުއާނުގައި ވަނީ ކޮން ވާހަކަތަކެއްކަން އެނގެން ފެށުމުން "ރޫހާނީ ގޮތުން" އޭނާގެ ޖިސްމަށް އާދަޔާހިލާފު ތަޖުރިބާތަކެއް ކުރެވެމުންދާ ކަމަށެވެ.
ދެހާސް ފަނަރަ ވަނަ އަހަރުގެ ލިންޒީ ހަތިމެއް ހިފައިގެން އުޅެނިކޮށް ނަގާފައިވާ ފޮޓޯއެއް މީޑިއާތަކުގައި ދައުރު ވާން ފެށުމުން، އޭނާ ގުރުއާނަށް އޭނާ އިހުތިރާމް ކުޑަވާ ގޮތަށް އަމަލުކޮށްފައިވާ ކަމަށް ބުނެ ވަރަށް ބޮޑަށް ފާޑު ވެސް ކިޔާފައިވެ އެވެ.