19 ފެބުރުއަރީ 2023 - 14:20
އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑް ގަތުމަށް ގަތަރުން ކުރާ މަސައްކަތް ހުއްޓުވައިދޭން، އިންސާނީ ހައްގުތަކަށް ވަކާލާތުކުރާ ބައިނަލްއަގްވާމީ ޖަމިއްޔާ ފެއާ-ސްކުއެއާ އިން ޔޫރަޕުގެ ފުޓްބޯޅަ އިދާރާ، ޔުއެފާގައި އެދިއްޖެ އެވެ.
ޔުނައިޓެޑުން މިހާރު ހިންގާ އެެމެރިކާގެ ގްލޭޒާ އާއިލާ ކްލަބް ވިއްކާލަން އިއުލާންކުރުމުން، ގަތަރުގެ ކުރީގެ ބޮޑުވަޒީރުގެ ދަރިކަލުން ޝެއިޚް ޖާސިމް ބިން ހަމަދު އަލް ތާނީ ވަނީ، ކްލަބް ގަތުމަށް ހުށަހަޅުއްވައިފަ އެވެ. އޭނާ އަކީ ގަތަރުގެ ގައުމީ ބޭންކް ކަމަށްވާ ކިއުއައިބީގެ ޗެއާމަން އެވެ.
ފެއާ-ސްކުއެއާ އިން ދެކޭ ގޮތުގައި ގަތަރުގެ ކުންފުންޏެއް ކަމަށްވާ ގަތަރު ސްޕޯޓްސް އިންވެސްޓްމަންޓުން ފްރާންސްގެ ޕީއެސްޖީ ހިންގާތީ، އެ ގައުމުން ޔޫރަޕުގެ އިތުރު ކްލަބެއް ގަތުމަކީ މަސްލަހަތު ފުށުއަރާ ކަމެއް ކަމަށެވެ.
ޕީއެސްޖީ ހިންގާ ކުންފުންޏަކީ، ގަތަރު ސަރުކާރުގެ ސޮވެރިން ފަންޑު ކަމަށްވާ ގަތަރު އިންވެސްޓްމަންޓް އޮތޯރިޓީއާ ގުޅުން އޮންނަ ކުންފުންޏެކެވެ.
ފެއާ-ސްކުއެއާ އިން ބުނި ގޮތުގައި ގަަތަރުގެ ސިޔާސީ އަދި އިގްތިސާދީ ކަންކަން ދިރާސާކޮށް ބަލާއިރު ފެންނަނީ، އެ ގައުމުގެ ވިޔަފާރި ކޮންސޯޓިއަމްތައް، ސަރުކާރުން ކޮންޓްރޯލްކުރާ މަންޒަރު ކަމަށެވެ.
އެހެންވެ ދެ ކުންފުންޏެއް ނަމަވެސް، ޕީއެސްޖީ ހިންގާ ކުންފުންޏާއި، ޔުނައިޓެޑް ގަންނަން މަސައްކަތްކުރާ ކޮންސޯޓިއަމްގެ އަސްލަކީ، ގަތަރު ސަރުކާރު ކަމަށް އެ ޖަމިއްޔާ އިން ދެކެ އެވެ.
ޔުއެފާގެ ގަވާއިދު ބުނާ ގޮތުގައި އެއް ކުންފުންޏަކުން ހިންގާ ދެ ކްލަބަކަށް އެއް ފަހަރާ ޗެމްޕިއަންސް ލީގުގައި ވާދަނުކުރެވޭނެ އެވެ. ފެއާސްކުއޭ އިން ދެކޭ ގޮތުގައި މި ގަވާއިދަށް ބަލާއިރު، ގަތަރުން ޔުނައިޓެޑް ގަނެފި ނަމަ، އެ ޓީމަށް ޕީއެސްޖީ ކުޅޭ ޗެމްޕިއަންސް ލީގު މުބާރާތެއްގައި ކުޅެވިގެން ނުވާނެ ކަމަށެވެ.
ގުދުރަތީ ގޭހުގެ މުއްސަނދިކަން ލިބިފައިވާ މެދުއިރުމަތީގެ ކުޑަކުޑަ ގައުމެއް ކަމަށްވާ ގަތަރުން އަންނަނީ ފުޓްބޯޅައިގެ ދުނިޔޭގައި ނުފޫޒު ގަދަކުރުމަށް މަސައްކަތްކުރަމުންނެވެ. ޕީއެސްޖީ ގަނެ އެ ކްލަބަށް ދުނިޔޭގެ މަޝްހޫރު ތަރިން ގެންދިއުމުގެ ފަހަތުގައި އޮތީ ވެސް އެ ސަބަބެވެ. އަދި އެ ޕްލޭނުގެ ދަށުން ގަތަރުން މިދިޔަ އަހަރު ވޯލްްޑް ކަޕް ބޭއްވުމުގެ ފުރުސަތު ހޯދި އެވެ.
އިންގްލެންޑުގެ އެންމެ ކާމިޔާބު އެއް ޓީމު ކަމަށްވާ ޔުނައިޓެޑަކީ، އެ އަމާޒަށް ވާސިލްވުމަށް، ގަތަރުން މުށުތެރެއަށް ލުމަށް އެންމެ އެކަށީގެންވާ ކްލަބް ކަމަށް ތަޖުރިބާކާރުން ބުނެ އެވެ. ސަބަބަކީ ޔުނައިޓެޑުގެ ބްރޭންޑް ވެލިއުގެ އަގުމަތިވުމާއި، ސަޕޯޓަރުންގެ އަދަދު ގިނަވުމެވެ. ދިރާސާތައް ދައްކާ ގޮތުގައި ޔުނައިޓެޑުގެ ސަޕޯޓަރުންގެ އަދަދު 650 މިލިއަނަށް އަރަ އެވެ.
ގްލޭޒާ އިން ޔުނައިޓެޑް ވިއްކާލަން ކިޔާ އަގަކީ، ކުޅިވަރުގެ ރެކޯޑް އަގެއް ކަމަށްވާ 8 ބިލިއަން ޑޮލަރެވެ. އެއީ، ޕްރިމިއާ ލީގުގެ ޗެލްސީ ގަންނަން އެމެރިކާގެ ޓޮޑް ބޮއެލީ ހޭދަކުރި ވަރަށް ވުރެ ތިން ބިލިއަން ޑޮލަރުގެ އިތުުރުވުމެކެވެ. ގްލޭޒާ އިން ޔުނައިޓެޑް ގަތީ 2005 ގައި 961 މިލިއަން ޑޮލަރަށެވެ.
ރިޕޯޓްތައް ބުނާ ގޮތުގައި ޔުނައިޓެޑް ގަންނަން ދެން ބިޑުކޮށްފައިވަނީ ކެމިކަލް ކުންފުންޏެއް ކަމަށްވާ އިނެއޮސްގެ ފައުންޑަރު އަދި ޔުނައިޓެޑުގެ ސަޕޯޓަރު ޖިމް ރެޓްކްލިފް އެވެ. މީގެ އިތުރުން އެމެރިކާގެ ޕްރައިވެޓް އިކުއިޓީ ކުންފުންޏަކުންނާއި ސައޫދީ އަރަބިއްޔާގެ ކުންފުންޏަކުން ވެސް ބިޑުކޮށްފައިވާ ކަމަށް ވާހަކަތައް ދެކެވެ އެވެ.