26 ފެބުރުއަރީ 2023 - 11:11
ފ. މަގޫދޫން އެ އަތޮޅުގެ ނިލަންދު އަށް ވެރިކަން ބަދަލުކުރުމުގެ ތެރޭގައި ދިމާވި ކަންތައްތަކުގެ މައްޗަށް ދިވެހި ފިލްމެއް ހަދަން މަގޫދޫ ކައުންސިލުން ނިންމައިފި އެވެ.
މަގޫދޫ ކައުންސިލްގެ ރައީސް އަބްދުﷲ ވަހީދު މިއަދު ވިދާޅުވީ އެ ފިލްމު ހަދަން ދިވެހި ފިލްމު އިންޑަސްޓްރީގެ ބަޔަކާ ވާހަކަ ވެސް ދައްކައި އެކަން ކުރެވިދާނެ ގޮތްތަކަކާ ދޭތެރޭ ވާހަކަ ދައްކަމުން އަންނަ ކަމަށެވެ.
"ފިލްމު އުފައްދާ ބަޔަކު ހޯދައި އެ ބޭފުޅުން ވަރަށް ފަހުން މި ރަށަށް ވަޑައިގެން އޭގެ އިންޓަވިއުތައް ވެސް ނަގައިގެން ދިރާސާ ކުރަމުން މިހާރު އެބަދޭ،" އޭނާ ވިދާޅުވި އެވެ.
މީގެ 100 އަށް ވުރެ ގިނަ އަހަރު ކުރިން ހިމިތީގައި ވެރިކަން ކުރުމަށް ފަހު، މަގޫދު އަށް ވެރިކަން ބަދަލުވެ، އޭގެ ފަހުން ވެރިކަން ހިނގަމުން ދިޔައީ އެ ރަށުގަ އެވެ. އެކަމަކު، ޖެނުއަރީ 24، 1999 ގައި ނިލަންދު އަށް ވެރިކަން ބަދަލުވީ ހަމަ ކުއްލިއަކަށެވެ.
"އޭގެ ތިން ހަތަރު ދުވަހެއް ކުރިން އަތޮޅުވެރިޔާ [ޒަކަރިއްޔާ ހަމީދު] އަތޮޅުގޭގެ ބައެއް މުވައްޒަފުންނާ ބައްދަލު ކުރައްވައި މި ވިދާޅުވަނީ ނިލަންދޫ އަށް ވެރިކަން ބަދަލުވެއްޖިއްޔާ ކިހިނެއް ހެއްޔޭ ވާނީ. ދެން މި ރަށުގެ ބައެއް މީހުން އޭރު އެޓޯލްސް މިނިސްޓަރާ ވެސް ބައްދަލު ކުރި ވެރިކަން ބަދަލުވަނީތޯ ބަލަން. އެކަމަކު ސީދާ އެޓޯލްސް މިނިސްޓަރު ވިދާޅުވި އެކަހަލަ ކަމެއް ނެތޭ،" ވަހީދު ވިދާޅުވި އެވެ.
"އެކަމަކު ހަމަ ކުއްލިއަކަށް ދެ ދުވަސް ތެރޭގައި ސަރުކާރުން އިއުލާނުކުރީ ވެރިކަން ނިލަންދު އަށް ބަދަލުވެއްޖެކަން."
ވެރިކަން ބަދަލުވި މައިގަނޑު އުޒުރެއް ކަމަށް ސަރުކާރުން އޭރު ދެއްކީ އަތޮޅުވެރިޔާގެ ގައިގައި މަގޫދޫ ބަޔަކު ތަޅައިގަނެ މާރާމާރީ ހިންގުމެވެ. އެހެންވެ، އަތޮޅުވެރިޔާ އެ ރަށުގައި ހުރުން ރައްކާތެރި ނޫން ކަމަށް ސަރުކާރުން ގަބޫލުކުރި އެވެ. އެކަމަކު، މަގޫދޫ މީހުން ގަބޫލުކުރަނީ އެއީ އޭރު އަތޮޅުވެރިޔަކަށް ހުންނެވި ޒަކަރިއްޔާ އޭނާގެ ވަރަށް ބޮޑު މަސްލަހަތެއް އޮތް ރަށް، ނިލަންދު އަށް ވެރިކަން ފުރޮޅާލައްވަން ރޭއްވެވި ރޭވުމެއްގެ ގޮތުގަ އެވެ. އަދި އަތޮޅުވެރިޔާގެ ގައިގައި ތަޅައިގަތް މައްސަލައިގައި މަގޫދު އަށް ހަތިޔާރާ އެކު ސިފައިން އަރައި 42 މީހަކު ހައްޔަރުކޮށް ޖަލަށް ލި އެވެ.
ވަހީދު ވިދާޅުވި ގޮތުގައި ކުޑަކުދިންނާއި އަންހެނުން ވެސް ހިމެނޭ ގޮތަށް، އެތައް ބަޔަކު ޖަލަށް ލައި، ޝަރީއަތެއް ވެސް ނުކޮށް ތިން އަހަރުވަރު ވަންދެން ޖަލުގައި ބައިތިއްބައި އަދި ބައެއް މީހުން އަރުވާލައި ހެދުމަކީ އޭރުގެ ސަރުކާރުން މަގޫދޫ ރައްޔިތުންނާ މެދު ހިންގި ވަރަށް ލާއިންސާނީ އަމަލެކެވެ.
"އޭގެ ސަބަބުން ނަފުސާނީ ބިރުވެރިކަމެއްގެ ތެރެއަށް ވެއްޓި މުޅި ރަށުގެ އިގްތިސާދު ފުނޑުފުނޑުވެގެން ދިޔަ. އަޅުގަނޑުމެންގެ ރަށަކީ އޭރު ދ. އަތޮޅުން ވެސް މީހުން ޑޮކްޓަރަށް ދައްކަން އަންނަ ރަށެއް. ވެރިކަން ބަދަލުވުމާ އެކު ސިއްހީ މަރުކަޒު ވެސް ގެއްލުނީ. ލައިބްރަރީ ވެސް ގެއްލުނީ. ދެން ހުރި އެއްޗެއް ވެސް ގެއްލުނީ."
ވަހީދު ވިދާޅުވި ގޮތުގައި، ފިލްމެއް ހަދަން ނިންމީ އެ ހާދިސާ ދެން އަންނަން އޮތް ޖީލުތަކަށް ވެސް ޑޮކިއުމެންޓް ކުރުމުގެ ބޭނުމުގަ އެވެ.
"ކައުންސިލުން މިހާރު ނިންމާފައި އޮތީ ހަމަ އޯޕަން ބަޖެޓެއްގައި އެކަން ކުރަން. އެކަމަކު އަޅުގަނޑުމެން މި ބަލަނީ 500،000ރ. އިން ފިލްމު ހަދައި ނިމޭނެ ކަމަށް،" އޭނާ ވިދާޅުވި އެވެ.
"އަޅުގަނޑުމެން އުންމީދުކުރަނީ އަންނަ އަހަރުގެ ތެރޭގައި އާންމުންނާ ހަމައަށް މި ފިލްމު ގެނެސްދެވޭނެ ކަމަށް."