08 މާޗް 2023 - 11:46
ރާއްޖޭގެ 16 އަހަރުން ދަށުގެ ގައުމީ ކްރިކެޓް ސްކޮޑެއް އެކުލަވާލަން މާލެ އާއި ފުވައްމުލަކުގައި ޓްރަޔަލް އެއް ބާއްވަން ކްރިކެޓް ބޯޑް އޮފް މޯލްޑިވްސް (ސީބީއެމް) އިން ނިންމައިފި އެވެ.
ސީބީއެމް އިން މި ޓްރަޔަލް ބާއްވަނީ އަންނަ މެއި މަހުގެ 17 އިން 27 އަށް އޭޝިއަން ކްރިކެޓް ކައުންސިލް (އޭސީސީ) އިން ބާއްވަން ހަމަޖެހިފައިވާ 16 އަހަރުން ދަށުގެ ޗެލެންޖާސް ކަޕަށް ގައުމީ ސްކޮޑެއް އެކުލަވާލުމުގެ ގޮތުންނެވެ.
ސީބީއެމް އިން ނިންމާފައި ވާ ގޮތުގައި މި މަހުގެ 12 ވަނަ ދުވަހުގެ ހަވީރު 5-6 އަށް މާލޭ އެކުވެނި ކްރިކެޓް ދަނޑާއި ފުވައްމުލަކު ކްރިކެޓް ދަނޑުގައި ޓްރަޔަލް ކުރިއަށް ދާނެ އެވެ.
ގައުމީ ސްކޮޑު އެކުލަވާލަން ބާއްވާ ޓްރަޔަލް ގައި ބައިވެރިވާން އެދޭ ކުދިން، ޓްރަޔަލް އޮންނަ ދުވަހު ފަށާ ގަޑިއަށް އެކުވެނި ދަނޑާއި ފުވައްމުލަކު ދަނޑަށް ހާޒިރުވާން ސީބީއެމް އިން އެދެ އެވެ.
ސީބީއެމް އިން އެދެނީ މި ޓްރަޔަލް އާ ގުޅޭ އިތުރު މައުލޫމާތު ހޯދަން ބޭނުންފުޅުވާ ފަރާތްތަކުން ޑެވެލޮޕްމަންޓް ސްޓާފާ ގުޅުއްވައިގެން މައުލީމާތު ސާފު ކުރެއްވުމަށެވެ. މާލޭން ނަމަ ގުޅާނެ ނަމްބަރަކީ 7774761 އެވެ. އަދި ފުވައްމުލަކުން ނަމަ ގުޅަން ޖެހޭނީ 9648183 އަށެވެ.
ރާއްޖޭގެ ކްރިކެޓް ބޯޑުން އަންނަނީ މުޅި ރާއްޖެ އަށް ކުޅިވަރު ފުޅާކުރަން ގިނަގުނަ މަސައްކަތްތަކެއް ކުރައްވަމުންނެވެ.
ގައުމީ 16 އަހަރުން ދަށުގެ ސްކޮޑު އެކުލަވާލަން ޓްރަޔަލް ބާއްވާ ފުވައްމުލަކަކީ މި ފަހަކުން ކޮންމެ އަހަރަކު ވެސް ކްރިކެތްގެ ގިނަ ހަރަކާތްތަކެއް ހިންގާ ތަނެކެވެ. މި އަހަރުގެ މިހާތަނަށް ވަނީ ފުވައްމުލަކުގައި ކޮންމެ އަހަރަކު ބާއްވަމުން އަންނަ ޓީ10 ކްރިކެޓް ކަޕް ވެސް ކާމިޔާބު ކަމާ އެކު ނިންމާލައިފަ އެވެ.
މީގެ އިތުރުން ވެސް ފިރިހެން އަދި އަންހެން މުބާރާތްތަކަކާއި އިންޓަ ސްކޫލް ކްރިކެޓް މުބާރާތްތަކެއްގެ އިތުރުން ކްރިކެޓް ކޯޗުންނާއި އަމްޕަޔަރުން ތަމްރީނުކުރާ ކޯސްތަކެއް ވެސް މި އަހަރުތެރޭ ފުވައްމުލަކުގައި ކުރިއަށް ގެންދަން ސީބީއެމް އިން ތާވަލް ކޮށްފައި ވެއެވެ.