12 މާޗް 2023 - 14:54
ސަރުކާރު އޮފީސްތަކުގެ ބޭނުމަށް ކްރެޑިޓް ކާޑު ހެދުމުގެ ހުއްދަ ދޭން މިއަދު ނިންމައިފި އެވެ.
ފިނޭންސް މިިނިސްޓްރީން މިއަދު ވަނީ ދައުލަތުގެ އޮފީސްތަކުން ކްރެޑިޓް ކާޑު ބޭނުންކުރުމާ ބެހޭ އުސޫލު އެކުލަވާލައި ގެޒެޓްކޮށްފަ އެވެ. މިއަދުން ފެށިގެން މި އުސޫލަށް އަމަލުކުރާނެ ކަމަށް ވެސް މިނިސްޓްރީން ބުންޏެވެ.
މި އުސޫލުގައި ބުނެފައިވާ ގޮތުގައި، މިއީ ސަރުކާރު އޮފީސްތަކުން ބަޖެޓްކޮށްފައިވާ ކަންތައްތަކާއި މާއްލިޔަތު ގަވާއިދުގައި ހުއްދަކޮށްފައިވާ ހަރަދުތައް ކުރުމަށް ކްރެޑިޓް ކާޑުގެ ބޭނުން ކޮންމެހެން ކުރަން ޖެހޭ ހާލަތްތަކުގައި ކްރެޑިޓް ކާޑުން ހިދުމަތް ހޯދުމަށް މަގުފަހިކޮށްދީ، އެ ކާޑު ބޭނުންކުރުމުގައި އޮފީސްތަކުން އަމަލުކުރަން ޖެހޭ ގޮތް ބަޔާންކުރުމުގެ ގޮތުން، އެކުލަވާލާފައިވާ އުސޫލެކެވެ.
މި އުސޫލުގެ މަގުސަދަކީ ސަރުކާރުގެ އޮފީސްތަކުން ކުރަން ޖެހޭ މާލީ މުއާމަލާތްތައް، އޮންލައިން ބޭންކިން ނުވަތަ އިންޓަނެޓް ބޭންކިން މެދުވެރިކޮށް ނޫން ގޮތަކަށް ހިންގެން ނުހުންނަ ހާލަތްތަކުގައި އެފަދަ ހިދުމަތެއް ލިބިގަތުމުގެ ފުރުސަތު ހޯދައިދިނުމަށްޓަކައި ކަމަށް ބުނެފައިވެ އެވެ.
ކްރެޑިޓް ކާޑުގެ ހަދަން ބޭނުންވާ ސަރުކާރުގެ އޮފީސްތަކުން ފިނޭންސް މިނިސްޓްރީ އަށް ފޯމު ހުށަހަޅައިގެން އެކަމުގެ ހުއްދަ ހޯދަން ޖެހެ އެވެ.
ފިނޭންސް މިނިސްޓްރީން ހެދި އުސޫލުގައި ވަނީ ކާޑު ހަދަން ހުއްދަ ދޭނެ ގޮތާއި ކާޑު ބޭނުންކުރެވޭނެ ގޮތާއި ކާޑު ބޭނުންކުރުމުގެ ހުއްދަ ދެވޭނެ މީހުންނާއި ކާޑުން ކުރެވޭނެ ހަރަދުތަކާ އަދި އުސޫލާ ހިލާފުވުމުން ފިޔަވަޅު އަޅާނެ ގޮތް ވެސް ބަޔާންކޮށްފަ އެވެ.