02 އެޕްރީލް 2023 - 12:11
ދިވެހިންނާއި ދިވެހި މާހައުލާ ގުޅޭ އެކި މެސެޖުތައް ރޯދައަށް ހާއްސަކޮށް ކުރު ފިލްމަކުން ގެނެސްދެމުން އަންނަ އުރީދޫން މި އަހަރުގެ ރޯދަ މަހު ކިޔައިދެނީ ފުވައްމަލަކު ޒުވާނެއްގެ ވާހަކަ އެވެ. އެ ވާހަކައިގެ ތެރެއިން ދެނީ ލިބިފައިވާ ނިއުމަތްތަކުގެ ބޭނުން ހެޔޮ ގޮތުގައި ހިފުމުގެ މެސެޖެވެ.
އެ ފިލްމުގައި އުޅޭ ޒުވާނާ، މާޒް މާލެއަށް ކިޔަވަން އަންނަން ބޭނުންވެގެން ރަށް ދޫކޮށް ދާން އުޅޭ މަންޒަރެވެ. ރޯދައާ ދިމާކޮށް މާޒްގެ ބޭބެގެ އާއިލާ ރަށަށް އައިސް، އާއިލާއާ އެކު މާހެފުމުގެ އުފާވެރިކަމުގެ ތެރޭގައި އުޅޭ ތަނާއި ރަށުތެރެ ބަލައި މަޖާ ކުރުމުގައި އުޅޭ މަންޒަރުތަކެވެ.
ފިލްމުގައި މާޒް އާއި އޭނާގެ ބޭބެއާ ދެމެދު ދައްކާ ވާހަކައިން، މާލެއަށް ބަދަލުވެ އާއިލާއާ ރަށާ ދުރުގައި ހުންނަން ޖެހުމުން އޭނާގެ ބޭބެއަށް ގެއްލުނު މުހިންމު ފުރުސަތުތައް ފާހަގަކުރެ އެވެ. އަދި ރަށް ކުރިއެރުވުމަށް ތައުލީމީ ޒުވާނުން ރަށުގައި ތިބެން ޖެހޭކަން މާޒަށް އޭނާގެ ބޭބެ ވިސްނައިދެ އެވެ.
ފިލްމުގައި މާޒް އޭނާގެ އާއިލާއާ އެކު ރަށުގައި ކުރި މަޖަލުގެ ތެރެއިން ރަށުގައި ހުރި ނިއުމަތްތައް ދެނެގަނެ އޭނާއަށް އެ ނިއުމަތްތަކުގެ އަގުވަޒަން ކުރެވި ރަށްދޫކޮށް ނުދާން ފަހުން ނިންމަ އެވެ.
މި ފިލްމުގައި ފުވައްމުލަކުގެ ރީތި މަންޒަރުތައް ގެނެސްދީފައި ވާއިރު ފިލްމުގެ ބޮޑުބައިގައި ފުވައްމުލަކުގެ ބަހުރުވަ ބޭނުންކޮށްފައިވެ އެވެ.
އުރީދޫން ބުނީ އެ ކުރު ފިލްމުގެ މަގުސަދަކީ ތައުލީމީ ޒުވާނުން ރަށަށް ހިދުމަތްކުރަން ހިތްވަރު ދިނުންކަމަށެވެ.
އުރީދޫން ބުނި ގޮތުގައި ރޯދަ މަހަށް ނެރޭ ކުރު ފިލްމު އެޑުތަކަކީ ދިވެހި މާހައުލު ދައްކައި ދިވެހިންނާ ގުޅޭ އެޑުތަކަކަށް ހެދުމަށް އަންނަނީ މަސައްކަތް ކުރަމުންނެވެ. އެ ކުންފުނިން މީގެ ކުރިން ގެނެސްދިން ހަނދު ރުނބާ ރޯދަ އެޑާއި މި ދިޔަ އަހަރު ކަނޑޫދޫ މިރުހަށް ހާއްސަކޮށް ނެރުނު ފިލްމު އެޑު ވެސް ފާހަގަކުރެ އެވެ.