24 ޖެނުއަރީ 2017 - 05:57
ޕާކިސްތާނުގެ ދެ އެކްޓަރުން ކަމަށްވާ އަދްނާން ސިއްދީގީ އާއި ސަޖަލް އަލީ އަށް އިންޑިއާ އަށް ގޮސް ބޮލީވުޑް ފިލްމެއްގައި މަސައްކަތްކުރަން ވިސާ ލިބިފައިވާ ކަމަށް އެ ގައުމުގެ ނޫސްތަކުން ބުނެފި އެވެ. މި އެ އެކްޓަރުން ބައިވެރިވާނީ މަޝްހޫރު ބަތަލާ ޝްރީދޭވީ އުފައްދާ "މަމް" ކިޔާ ފިލްމެއްގަ އެވެ.
އިންޑިއާ ސަރުކާރުން މި ދެ އެކްޓަރުންނަށް ވިސާ ދޭން ނިންމުމާ ގުޅިގެން ޕާކިސްތާނުގެ ފިލްމީ ދާއިރާއިން ވަނީ އެކަމަށް މަރުހަބާ ކިޔާފަ އެވެ. އަދި މިއީ ދެ ގައުމުގެ މެދުގައި އޮތް ސިޔާސީ ނުތަނަވަސްކަމަށް ފިނިކަމެއް އަންނަ ކަމުގެ ހެއްކެއް ކަމަށް ބުނެފައިވެ އެވެ.
ބެލެވޭ ގޮތުގައި މި ފިލްމުގައި ސިއްދީގީ ކުޅޭނީ "ޝްރީދޭވީ"ގެ ފިރިމީހާގެ ބައި ކަމަށް ހިންދުސްތާން ޓައިމްސް ގައިވާ ރިޕޯޓެއްގައިވެ އެވެ. އަދި ސަޖަލް ކުޅެނީ ޝްރީދޭވީގެ އަންހެންދަރިފުޅެއްގެ ރޯލު ކަމަށްވެ އެވެ.
އިންޑިއާގެ މި ފިޔަވަޅުގެ ސަބަބުން، ދެ ގައުމުގެ ހީނަރުވެފައިވާ ގުޅުމަށް ކޮންމެވެސް ވަރެއްގެ ފިނިކަމެއް އަންނާނެކަމަށް ގަބޫލުކުރާ ކަމަށް ޕާކިސްތާނުގެ ފިލްމު ޕްރޮޑއުސަރު މަހްމޫދް މަންޑްވީވާލާ ބުނެފައިވެ އެވެ.
އެގްޒިބިޓަރުން ވެސް އުންމީދުކުރަނީ އިންޑިއާގެ މި ނިންމުމުން ދެ ގައުމުގެ އާޓިސްޓުންނަށް ދެ ގައުމުގައި މަސައްކަތްކުރުމުގެ ފުރުސަތު ލިބިގެން ދާނެ ކަމަށެވެ.