30 އެޕްރީލް 2023 - 14:25
ކ. ފޭދޫފިނޮޅު ކައިރީގައި އިއްޔެ ހަވީރު އެކްސިޑެންޓު ހިނގީ އެމްޑަބްލިއުއެސްސީގެ ލޯންޗެއް ޖެހިގެން ކަން "މިހާރު" އަށް އެނގިއްޖެ އެވެ.
ރާއްޖޭގައި ބޮޑު ހިލަ ޖެހުމުގެ ގިނަ މަޝްރޫއުތަކެއް ހިންގާ ސަސް އީ ކޮންސްޓްރަކްޝަން ކުންފުނީގެ މެނޭޖިން ޑިރެކްޓަރު ސައުދުﷲ އަހުމަދު އިން ލޯންޗުގައި ޖެހުނީ، އެނގިފައިވާ ގޮތުގައި، ތިލަފުށީގައި ކުރިއަށްގެންދާ ޕްރޮޖެކްޓެއް ބެލުމަށް ފަހު އޭނާ ދިރިއުޅޭ ހުޅުމާލެ އަށް އަނބުރާ ދަނިކޮށެވެ.
އެ ވަގުތު ސައުދާ އެކު ލޯންޗުގައި ކައްޕި އާއި ދެ ފަޅުވެރިން ތިއްބެވެ.
ހަވީރު 4:40 ހާއިރު އެކްސިޑެންޓު ހިނގުމާ އެކު ސައުދުﷲ، 53، އަށް ފަރުވާ ދިނުމަށް އޭޑީކޭ އަށް ގެންދިޔަ އެވެ. ނަމަވެސް، އެ ހޮސްޕިޓަލުގައި ފަރުވާ ދެނިކޮށް އޭނާ ވަނީ ނިޔާވެފަ އެވެ.
އެ އާއިލާއިން ވާހަކަދެއްކި މީހަކު ބުނީ އެމްޑަބްލިއުއެސްސީގެ ލޯންޗު ޖެހިފައި ވަނީ އަނެއް ލޯންޗުގެ އަރިމަތިން ކަމަށެވެ. ނަމަވެސް، މައްސަލަ ތަހުގީގުކުރާތީ އެކަމުގެ ތަފްސީލެއް އަދި ނުލިބެ އެވެ.
ޓްރާންސްޕޯޓު މިނިސްޓްރީގެ ޑިރެކްޓާ ހުސެއިން ނަޒީރު ވިދާޅުވީ އިއްޔެގެ އެކްސިޑެންޓާ ގުޅިގެން ދެ ލޯންޗުގައި ތިބި ކެޕްޓަނުންގެ ލައިސަންސް ވެސް ވަގުތީ ގޮތުން ހިފަހައްޓާފައިވާ ކަމަށެވެ.
ތަހުގީގު ނިންމުމަށް ފަހު ކުށްވެރިވާ ފަރާތެއްގެ ލައިސަންސް މަދުވެގެން ފަސް އަހަރަށް ހިފަހައްޓާނެ ކަމަށް އޭނާ ވިދާޅުވި އެވެ.