04 މެއި 2023 - 14:17
މާލެ އިން ފުރައިގެން ވ. އަތޮޅަށް ދަތުރުކުރަނިކޮށް ގެއްލިގެން ހޯދި އެމްސާވާރީ ބޯޓު އަޑިއަށް ގޮސްފައިވާ ކަމަށާއި ބޯޓުން ދަތުރުކުރި ހަ މީހުން ކަނޑުމަތީގައި ތިއްބާ ސަލާމަތް ކޮށްފައިވާ ކަމަށް އެމްއެންޑީއެފް ކޯސްޓްގާޑުން ބުނެފި އެވެ.
އެ ބޯޓު މާލެއިން ފުރީ ރޭ ދަންވަރު 1:30 ގަ އެވެ.
ބޯޓުގެ ހަބަރެއް ނުވެގެން ހޯދުމުގެ މަސައްކަތް ފެށީ މިއަދު ހެނދުނު އެވެ.
އެމްއެންޑީއެފުން ބުނީ އެ މީހުން ފެނިފައި ވަނީ ކޯސްޓްގާޑުން ހޯދަމުންދިޔަ ސަރަހައްދު ތެރެއިން އެމްއެންޑީއެފް ޑޯނިއާ އެއާ ކްރާފްޓަށް ކަމަށެވެ. އެކަމަކު އެ ބޯޓާ ބެހޭ އިތުރު މައުލޫމާތެއް އަދި ނުދެ އެވެ. އެކަމަކު، އެމްއެންޑީއެފުން މީޑިއާ އަށް ދީފައިވާ ޗާޓުން ދައްކާ ގޮތުން މީހުން ފެނުނީ ބޯޓާ މާ ދުރުންނެވެ. ބޯޓު އަޑިއަށް ގޮސްފައި ވަނީ ފުލިދޫ ކަނޑު ބޭރުންނެވެ.
އެ ހަ މީހުން މިހާރު ކޯސްޓްގާޑް ޝިޕް ޣާޒީ އަށް ނަގާފައިވާ ކަމަށާއި އެންމެންގެ ހާލު ވެސް ރަނގަޅު ކަމަށް އެމްއެންޑީއެފުން ބުންޏެވެ.
މި ދުވަސްވަރަކީ ކަނޑުގަދަ ދުވަސްވަރަކަށް ދަތުރު ކުރުމުގައި ސަމާލު ވުމަށް މެޓުން ވަނީ އިލްތިމާސް ކޮށްފަ އެވެ.