26 ޖެނުއަރީ 2017 - 13:31
ރައީސް އަބްދުﷲ ޔާމީން ހައްޔަރުކުރަން ކޯޓު އަމުރެއް ނެރެފައިވާ ކަން ދެއްކުމަށްޓަކައި ސައްހަ ނޫން ލިޔުމެއް ހެދި މައްސަލައިގައި 17 އަހަރަށް ޖަލަށް ލާފައިވާ އދ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާނާ ދެކޮޅަށް ހެކިބަސް ދިނީ ސިޔާސީ މަގާމުތަކެއްގައި ތިބި ބަޔަކު ކަމަށާއި އެ މީހުންގެ ހެކިބަސް ގަބޫލު ނުކުރެވޭނެ ކަމަށް ނިހާންގެ ފަރާތުން ހައި ކޯޓުގައި މިއަދު ބުނެފި އެވެ.
މިދިޔަ އަހަރުގެ ފެބްރުއަރީ މަހުގެ ހަ ވަނަ ދުވަހުގެ ރޭ މާމިގިލީ ކޯޓު ހުޅުވައިގެން ރައީސް ޔާމީން ހައްޔަރުކުރަން އަމުރެއް ނެރެފައިވާ ކަން ދައްކަން ކ. މާފުށީ ކޯޓުގެ ނަމުގައި ސައްހަ ނޫން ލިޔުމެއް އުފެއްދި މައްސަލައިގައި ނިހާން ޖަލަށް ލާން ކުރި ހުކުމް އޭނާގެ ފަރާތުން އިސްތިއުނާފް ކުރުމުން ހައި ކޯޓުން މިއަދު ވަނީ އިސްތިއުނާފް އަޑުއެހުންތައް ފަށައިފަ އެވެ.
ނިހާންގެ ވަކީލް ހުސްނުއްސުއޫދު ވިދާޅުވީ ނިހާނާ ދެކޮޅަށް ސިއްރުން ހެކިބަސް ދިން މީހުންގެ ތެރެއިން ދެ މީހަކީ ސިޔާސީ މަގާމެއްގައި ތިބި ދެ މީހުން ކަމަށާއި އެ މީހުންގެ އަދުލުވެރި ކަމާ މެދު ސުވާލު އުފެދޭ އިރު އެ މީހުންގެ ބަހަށް ކްރިމިނަލް ކޯޓުން ރިއާޔަތް ކޮށްފައިވާ ކަމަށެވެ. ސިއްރުން ހެކިބަސް ނެގި އެ ދެ މީހުންނަކީ ކޮން ބައެއްކަން އެނގޭ ކަމަށް ސުއޫދު ވިދާޅުވިޔަސް އެ މީހުންގެ މައުލޫމާތެއް ސުއޫދު ވިދާޅެއް ނުވެ އެވެ.
ސުއޫދު ވިދާޅުވީ މާފުށީ ކޯޓުގެ ނަމުގައި ހަދާފައި އޮއްވައި މާލެ އިން ފުލުހުން ހޯދި ސައްހަ ނޫން އަމުރަކީ ނިހާން ހެދި އެއްޗެއް ނޫން ކަމަށާއި ހެކިންގެ ބަހުން ވެސް އެކަން އެނގޭ ކަމަށެވެ. އެފަދަ އަމުރެއް ހޯދަން ފުލުހުންނާއި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިން މާމިގިއްޔަށް ދިއުމުން، އާންމު އުސޫލުގެ މަތިން އެކަން ކުރަން ނިހާން އެދުނު ކަމަށާއި، އެގޮތުން ކޯޓު އަމުރަށް އެދޭ ބާވަތުގެ ފޯމެއްގެ ނަމްބަރަކާއި ތަހުގީގުކުރާ ފުލުހުންގެ ނަން ބޭނުންވާނެ ކަމަށް ނިހާން ފުލުހުން ގާތު ވިދާޅުވި ކަމަށް ސުއޫދު ވިދާޅުވި އެވެ.
ފޯމުގައި ޖަހާނެ ނަމްބަރާއި ފުލުހެއްގެ ނަން ހޯދުމުގެ މަސައްކަތް ކުރަމުން ދަނިކޮށް މާލެ އިން އެފަދަ އަމުރެއް ލިބުނު ކަމަށް ފުލުހުން ބުނުމުން އެ ހިސާބުން އެ މަސައްކަތް ހުއްޓައިލީ ކަމަށާއި މާމިގިއްޔަށް ދިޔަ ފުލުހުން އެދުނު ފަދަ އަމުރެއް ނިހާން ނުދޭ ކަން އެ ފުލުހުންގެ ބަހުން ވެސް އެނގޭ ކަމަށް ސުއޫދު ވިދާޅުވި އެވެ.
ނިހާން ޖަލަށް ލީ ޓެރަރިޒަމްގެ ގާނޫނުގެ ދަށުން، ގަދަކަމުން މީހަކު ފޮރުވަން އުޅުނުކަން ސާބިތުވާ ކަމަށް ނިންމުމަށް ފަހު ކަމަށް ވިޔަސް ގަދަކަމުން މީހަކު ފޮރުވަން ނިހާން ކުރި އެއްވެސް އަމަލެއް ދައުލަތަށް ސާބިތުކޮށް ނުދެވޭ ކަމަށް ސުއޫދު ވިދާޅުވި އެވެ. އަދި އެފަދަ ކަމަކަށް ދައުލަތުން ތުހުމަތު ވެސް ނުކުރާ އިރު ނިހާންގެ މައްޗަށް އެ ކުށް ސާބިތުވީ ކީއްވެގެންކަން ދަށު ކޯޓުގެ ހުކުމުން ސާފުނުވާ ކަމަށް ސުއޫދު ވިދާޅުވި އެވެ.
ސުއޫދު ވިދާޅުވި ގޮތުގައި އެ މައްސަލަ ނިންމީ އެކަށީގެންވާ ވަގުތާއި ފުރުސަތު ނުދީ އެވެ. ހުރިހާ ހެކިންގެ ހެކިބަސް އެއް ދުވަހެއްގައި ކޯޓުން ނެގި އިރު ހެކިންގެ ބަހާ ބެހޭ ގޮތުން ވާހަކަ ދައްކަން ފުރުސަތު ނުދީ ޚުލާސާ ބަޔާން ހުށަހަޅަން އެންގި ކަމަށް އޭނާ ވިދާޅުވި އެވެ. އަދި ހެކި ބަސް ނެގުމާއި ޚުލާސާ ބަޔާން ހުށަހެޅުމާ ދެމެދު ހޭދަވީ ކުރު މުއްދަތެއް ކަން ސުއޫދު ފާހަގަ ކުރެއްވި އެވެ.
ސުއޫދުގެ ވާހަކަތަކާ ގުޅިގެން ދައުލަތުން ޖަވާބުދާރީ ވަމުން ދަނިކޮށް މިއަދަށް ކަނޑައެޅި ވަގުތު ހަމަވުމުން މިއަދުގެ އަޑުއެހުން ވަނީ ނިންމާލައިފަ އެވެ. ދެން އޮންނަ އަޑުއެހުމެއްގައި އޮންނާނީ ދައުލަތުން ޖަވާބުދާރީވުމެވެ.
އެ މައްސަލައިގައި އިތުރު ތިން ދައުވާއެއް ވެސް ނިހާނަށް ކުރެ އެވެ. އެ ތިން މައްސަލައިގެ އަޑުއެހުންތައް ނިމިފައި ވިޔަސް އެ މައްސަލަތަކުގެ ހުކުމް ކްރިމިނަލް ކޯޓުން އަދި ނީއްވަ އެވެ.
ނިހާން ހައްޔަރުކުރި ފަހުން މިއަދާ ހަމައަށް ވެސް އޭނާ ހުރީ ފަނޑިޔާރުކަމުން ސަސްޕެންޑްކޮށްފަ އެވެ. ޖުޑިޝަލް ސާވިސް ކޮމިޝަނުން ބުނެފައިވާ ގޮތުގައި ނިހާން މަގާމުން ވަކި ކުރުމާ މެދު ގޮތެއް ނިންމާނީ އިސްތިއުނާފް މަރުހަލާ ނިމުމުންނެވެ.
ނިހާންގެ އިތުރުން ކުރީގެ ޕީޖީ މުހުތާޒްގެ މައްޗަށް ވެސް އެ މައްސަލައިގައި ވަނީ 17 އަހަރުގެ ޖަލު ހުކުމެއް އައިސްފަ އެވެ. އެ މައްސަލަ މުހުތާޒްގެ ފަރާތުން އިސްތިއުނާފް ކޮށްފައި ވިޔަސް އެ މައްސަލަ އަދި ނުފަށަ އެވެ.